ຂ່າວຕ່າງປະເທດລາຍງານ ໃນວັນທີ 6 ພະຈິກ ຜ່ານມາ, ສື່ມວນ​ຊົນ​​ຂອງ​ຍີ່ປຸ່ນ​ລາຍ​ງານ​ວ່າ: ຈຳນວນ​ຄົນເຈັບ​ພະຍາດ​ປອດ​ອັກເສບ ຈາກເຊື້ອ Mycoplasma ຊຶ່ງເປັນພະຍາດທາງເດີນຫາຍໃຈທີ່ເກີດຈາກເຊື້ອແບັກທີເຣຍ ​ກຳລັງ​ເພີ່ມ​ຂຶ້ນ​ສູງ​ໃນ​ຍີ່ປຸ່ນ ​ແລະ​ໄດ້​ຂຶ້ນ​ສູ່​ລະດັບ​ສູງສຸດ​ແບບບໍ່ເຄີຍມີມາກ່ອນຕິດຕໍ່ກັນ 4 ອາທິດ​ ເມື່ອ​ນັບມາເຖິງ​ວັນ​ທີ 20 ຕຸລາ ຜ່ານມາ​.

ຂ່າວລະບຸວ່າ, ສື່ມວນຊົນອ້າງອີງຂໍ້ມູນຈາກສະຖາບັນພະຍາດຕິດຕໍ່ແຫ່ງຊາດຂອງຍີ່ປຸ່ນ ລະບຸວ່າ:ຈຳນວນຄົນເຈັບສະເລ່ຍທີ່ລາຍງານໂດຍສະຖາບັນການແພດ ປະມານ 500 ແຫ່ງທົ່ວປະເທດ ຢູ່ທີ່ 2.01 ກໍລະນີຕໍ່ສະຖາບັນໃນວັນທີ 20 ເດືອນຕຸລາ ຜ່ານມາ, ໂດຍໂຕເລກດັ່ງກ່າວໄດ້ລື່ນກາຍ 2 ກໍລະນີ ເປັນຄັ້ງທໍາອິດແລະ ມີຈໍານວນຂອງຄົນເຈັບຕໍ່ອາທິດບັນລຸລະດັບສູງສຸດນັບຕັ້ງແຕ່ເລີ່ມເກັບກໍາຂໍ້ມູນໃນປີ 1999.

ກ່ອນ​ທີ່​ຈຳ​ນວນ​ຄົນ​ເຈັບ​ພະ​ຍາດ​ດັ່ງ​ກ່າວ​ຈະເພີ່ມ​ສູງ​ຂຶ້ນ​ໃນ​ຮອບ​ລ້າ​ສຸດ. ຍີ່ປຸ່ນມີຈຳນວນຄົນເຈັບສະເລ່ຍຕໍ່ອາທິດສູງແບບບໍ່ເຄີຍມີມາກ່ອນຢູ່ທີ່ 1.64 ກໍລະນີໃນເດືອນຕຸລາ 2016.

ນອກຈາກນັ້ນ, ພະຍາດປອດອັກເສບ ຈາກເຊື້ອmycoplasma ຄືການ​ຕິດ​ເຊື້ອ​ແບັກທີເຣຍໃນ​ລະບົບທາງເດີນ​ຫາຍ​ໃຈ ຊຶ່ງ​ແຜ່​ກະຈາຍ​ຜ່ານລະອອງຝອຍທີ່ລອຍໃນອາກາດຈາກການຈາມ ແລະ ໄອ ເຮັດໃຫ້ເກີດມີອາການໄຂ້, ໄອ, ອ່ອນເພຍແລະເຈັບຫົວ ຊຶ່ງເດັກນ້ອຍມີໂອກາດຕິດເຊື້ອຫຼາຍກ່ວາຄົນທົ່ວໄປ. ໂດຍບົດລາຍງານຍັງລະບຸວ່າຄົນເຈັບອາຍຸ 14 ປີ ຫຼື ຕໍ່າກວ່າກວມເອົາຫຼາຍກວ່າ 80% ຂອງຄົນເຈັບທັງໝົດ.