ວິທະຍຸກະຈາຍສຽງຫວຽດນາມລາຍງານວ່າ: ເນື່ອງໃນໂອກາດເຂົ້າຮ່ວມກອງປະຊຸມສຸດຍອດການຮ່ວມມືອະນຸພາກພື້ນແມ່ນ້ຳຂອງເປີດກວ້າງ (GMS) ຄັ້ງທີ 8, ໃນວັນທີ 7 ພະຈິກ ຜ່ານມາຢູ່ແຂວງ ຢຸນໜານ ປະເທດຈີນ, ທ່ານ ຟ້າມມິງຈິງ ນາຍົກລັດຖະມນຕີ ຫວຽດນາມ ໄດ້ພົບປະສອງຝ່າຍກັບທ່ານ ຫຼີສຽງ ນາຍົກລັດຖະມົນຕີຈີນ. ໃນການພົບປະ, ທ່ານ ຟ້າມມິງຈິງໄດ້ຢັ້ງຢືນການພັດທະນາການພົວພັນກັບຈີນ ແມ່ນແຜນນະໂຍບາຍສະເໝີຕົ້ນສະເໝີປາຍ, ຄວາມຮຽກຮ້ອງພາວະວິໄສ, ການເລືອກເຟັ້ນຍຸດທະສາດ ແລະ ບຸລິມະສິດແຖວໜ້າຂອງນະໂຍບາຍພົວພັນຕ່າງປະເທດຂອງ ຫວຽດນາມ.

ຂ່າວລະບຸວ່າ: ສຳລັບທິດທາງການຮ່ວມມືໃນໄລຍະຈະມາເຖິງ, ທ່ານ ຟ້າມມິງຈິງ ສະເໜີໃຫ້ສອງຝ່າຍສືບຕໍ່ຜັນຂະຫຍາຍຄວາມຮັບຮູ້ລວມລະຫວ່າງການນຳສູງສຸດຂອງສອງພັກ, ສອງລັດໃຫ້ມີປະສິດທິຜົນ, ຮັກສາການພົບປະຂັ້ນສູງ ແລະ ທຸກຂັ້ນເພື່ອແລກປ່ຽນກ່ຽວກັບການພົວພັນສອງຝ່າຍ ແລະ ບັນດາບັນຫາຕ່າງຝ່າຍຕ່າງມີຄວາມສົນໃຈ. ທ່ານ ຟ້າມມິງຈິງ ຍັງສະເໜີໃຫ້ສອງຝ່າຍພະຍາຍາມປັບປຸງພື້ນຖານສັງຄົມຂອງການພົວພັນສອງຝ່າຍ, ຜັນຂະຫຍາຍປີພົບປະແລກປ່ຽນວັດທະນະທຳມະນຸດ ຫວຽດນາມ - ຈີນ ປີ 2025 ໃຫ້ເປັນຢ່າງດີ ແລະ ຖືນີ້ແມ່ນໂອກາດທີ່ດີເພື່ອຍູ້ແຮງການພົວພັນແລກປ່ຽນປະຊາຊົນ ແລະ ການໂຄສະນາເຜີຍແຜ່ກ່ຽວກັບໄມຕີຈິດມິດຕະພາບລະຫວ່າງສອງປະເທດ.

ສ່ວນທ່ານ ຫຼີສຽງ ຢັ້ງຢືນວ່າ: ຈີນ ຈະເປີດປະຕູຕະຫຼາດໃຫ້ແກ່ສິນຄ້າທີ່ມີຄຸນນະພາບສູງຂອງ ຫວຽດນາມ ຫຼາຍກວ່າເກົ່າອີກ, ໃນນັ້ນ ມີປະເພດສິນຄ້າຜະລິດຕະພັນກະເສດ; ເຫັນດີເພີ່ມທະວີການເຊື່ອມຕໍ່ພື້ນຖານໂຄງລ່າງທາງຄົມມະນາຄົມ, ຊຸກຍູ້ການຮ່ວມມືສ້າງ ແລະ ຮັກສາລະບົບສະໜອງ, ລະບົບການຜະລິດຢູ່ພາກພື້ນເປັນປົກກະຕິ, ສະໜັບສະໜູນຫວຽດນາມ ເປັນເຈົ້າພາບຈັດເວທີປາໄສຮ່ວມມືເສດຖະກິດ ອາຊີ - ປາຊີຟິກ ປີ 2027 (APEC 2027).

ເນື່ອງໃນໂອກາດນີ້, ໂດຍການເປັນສັກຂີພິຍານຂອງທ່ານນາຍົກລັດຖະມົນຕີສອງທ່ານໃຫ້ກັບຜູ້ຕາງໜ້າກະຊວງການຕ່າງປະເທດຂອງ ຫວຽດນາມ ແລະ ຈີນ ໄດ້ມອບ-ຮັບຈົດໝາຍທາງການລະຫວ່າງສອງກະຊວງ ວ່າດ້ວຍການສ້າງຕັ້ງສະຖານກົງສູນ ຫວຽດນາມ ປະຈຳ ນະຄອນຈູງຊິງສປ ຈີນ.