ຂ່າວຕ່າງປະເທດລາຍງານ ຫວ່າງມໍ່ໆມານີ້ວ່າ: ຜົນການສຶກສາຮ່ວມກັນໂດຍອົງການອຸຕຸນິຍົມຂອງໂອຕຣິດ, ເຢຍລະມັນແລະ ສະວິດ ລະບຸວ່າ: ມີຄວາມເປັນໄປໄດ້ວ່າປີ 2024 ຈະກາຍເປັນໜຶ່ງໃນປີທີ່ທັງສາມປະເທດປະສົບກັບອຸນຫະພູມສູງແບບບໍ່ເຄີຍມາກ່ອນ.
ອຸນຫະພູມສະເລ່ຍປະຈໍາເດືອນມັງກອນຫາເດືອນຕຸລາປີນີ້ໃນໂອຕຣິດສູງກວ່າລະດັບອຸນຫະພູມໃນໄລຍະກ່ອນຍຸກອຸດສາຫະກຳ (ປີ 1881 – 1910) ທີ່ 4.1 ອົງສາ ເຮັດໃຫ້ມີທ່າອ່ຽງວ່າປີ 2024 ຈະເປັນປີທີ່ອຸນຫະພູມສູງສຸດແບບບໍ່ເຄີຍມີມາກ່ອນຂອງໂອຕຣິດ.
ຜົນການສຶກສາດັ່ງກ່າວໄດ້ເຜີຍແຜ່ໃນວັນທີ 8 ຕຸລາ ຜ່ານມາ ເປັນຜົນການສຶກສາຮ່ວມກັນຂອງສະຖາບັນທໍລະນີສາດ, ພູມສາດ, ສະພາບອາກາດ ແລະ ອຸຕຸນິຍົມ ຂອງໂອຕຣິດ (GeoSphere Austria), ຫ້ອງການອຸຕຸນິຍົມຂອງເຢຍລະມັນ (DWD) ແລະຫ້ອງການອຸຕຸນິຍົມ ແລະ ສະພາບອາກາດ ສະວິດ (MeteoSwiss).
ໃນເຢຍລະມັນແລະສະວິດ ກໍມີທ່າອ່ຽງທີ່ຄ້າຍຄືກັນ. ໂດຍອຸນຫະພູມສະເລ່ຍຕັ້ງແຕ່ເດືອນມັງກອນຫາເດືອນຕຸລາປີນີ້ ສູງກວ່າຄ່າສະເລ່ຍໄລຍະກ່ອນຍຸກອຸດສາຫະກຳ ທີ່ 3.3 ແລະ 3.5 ອົງສາ ຕາມລໍາດັບ.
ດ້ານ Geosphere Austriaໄດ້ເນັ້ນຢໍ້າເຖິງຜົນກະທົບຈາກການປ່ຽນແປງດິນຟ້າອາກາດທີ່ສຳຄັນໃນສາມປະເທດດັ່ງກ່າວເຊັ່ນ: ຝົນຕົກໜັກຂຶ້ນເລື້ອຍໆສ່ຽງຕໍ່ການປະເຊີນກັບໄພແຫ້ງແລ້ງແລະມີຫິມະຕົກໜ້ອຍລົງໃນພື້ນທີ່ທີ່ມີຄວາມສູງຕໍ່າ ແລະຮຽກຮ້ອງໃຫ້ສືບຕໍ່ການດຳເນີນງານດ້ານດິນຟ້າອາກາດຢ່າງຕໍ່ເນື່ອງໃນທົ່ວໂລກ ເພື່ອຫຼຸດຜ່ອນຜົນກະທົບທາງລົບເຫຼົ່ານີ້.
