ຂ່າວສານຫວຽດນາມລາຍງານວ່າ: ເມື່ອບໍ່ດົນມານີ້, ທ່ານ ຄາຊູໂອະ ອູເອດະ ຜູ້ວ່າການທະນາຄານແຫ່ງຍີ່ປຸ່ນ (BoJ) ໃຫ້ຮູ້ວ່າ: ຍີ່ປຸ່ນ ຫວັງວ່າຈະຮັກສາເປົ້າໝາຍອັດຕາເງິນເຟີ້ 2% ເຖິງແມ່ນວ່າການປ່ຽນແປງຂອງດິນຟ້າອາກາດຈະເຮັດໃຫ້ເກີດຄວາມກົດດັນໃນໄລຍະຍາວຕໍ່ລາຄາສິນຄ້າໃນອະນາຄົດ.

ຂ່າວລະບຸວ່າ, ທ່ານ ຄາຊູໂອະ ອູເອດະ ກ່າວວ່າ: BoJ ຈະຕິດຕາມຢ່າງໃກ້ຊິດຜົນກະທົບຂອງການປ່ຽນແປງດິນຟ້າອາກາດຕໍ່ເສດຖະກິດ, ເຊັ່ນດຽວກັນກັບຜົນໄດ້ຮັບຈາກມາດຕະການຂອງລັດຖະບານເພື່ອສົ່ງເສີມການຫັນປ່ຽນສີຂຽວທີ່ອາດຈະສົ່ງຜົນກະທົບຕໍ່ອັດຕາເງິນເຟີ້.

ໃນກອງປະຊຸມປຶກສາຫາລືກ່ຽວກັບຜົນກະທົບຈາກການປ່ຽນແປງຂອງດິນຟ້າອາກາດຕໍ່ເສດຖະກິດ ແລະ ນະໂຍບາຍເງິນຕາ, ທ່ານ ຄາຊູໂອະ ອູເອດະ ກ່າວວ່າ: ຍີ່ປຸ່ນ ອາດຈະເກັບພາສີກາກບອນໃນອະນາຄົດ ແລະ ຈະສົ່ງຜົນກະທົບຕໍ່ໄພເງິນເຟີ້.

ເງິນອຸດໜູນຂອງລັດຖະບານ ເພື່ອສົ່ງເສີມການຫັນປ່ຽນສີຂຽວຍັງສາມາດກົດດັນອັດຕາເງິນເຟີ້ໃນໄລຍະສັ້ນ, ເຖິງແມ່ນວ່າຍີ່ປຸ່ນອາດຈະທົນຕໍ່ກໍາລັງເງິນເຟີ້ດັ່ງກ່າວໃນໄລຍະໜຶ່ງ ຍ້ອນວ່າອັດຕາເງິນເຟີ້ພື້ນຖານຍັງຕໍ່າກວ່າ 2%.

ຕາມຍຸດທະສາດຫັນເປັນສີຂຽວ, ລັດຖະບານ ຍີ່ປຸ່ນ ຈະໜູນຊ່ວຍດ້ານການເງິນໃນມູນຄ່າ 20.000 ຕື້ເຢນ (131 ຕື້ໂດລາ)ຫຼືເທົ່າກັບ 3% ຂອງລວມຍອດຜະລິດຕະພັນພາຍໃນປະເທດ (GDP) ໃຫ້ແກ່ບັນດາບໍລິສັດລົງທຶນດ້ານເຕັກໂນໂລຊີທີ່ເປັນມິດກັບສິ່ງແວດລ້ອມໃນ 10 ປີຕໍ່ໜ້າ.