ຂ່າວຕ່າງປະເທດລາຍງານ ໃນວັນທີ 11 ພະຈິກ ຜ່ານມາວ່າ: ຜົນການສໍາຫຼວດຈາກມະຫາວິທະຍາໄລBen-Gurion (BGU) ທີ່ເຜີຍແຜ່ໃນວັນທີ 10 ພະຈິກຜ່ານມາລະບຸວ່າ:ຊາວອິດສະຣາແອນ 77% ມີຄວາມກັງວົນກ່ຽວກັບການປ່ຽນແປງຂອງດິນຟ້າອາກາດ.

ການສໍາຫຼວດຈາກສະຖາບັນຄົ້ນຄວ້ານະໂຍບາຍດິນຟ້າອາກາດແຫ່ງຊາດ, ພາຍໃຕ້ມະຫາວິທະຍາໄລBGUທີ່ມີຜູ້ເຂົ້າຮ່ວມຕອບແບບສອບຖາມ 1,180ຄົນ ໃນອິດສະຣາແອນລະຫວ່າງວັນທີ 26 - 30 ມິຖຸນາ ຜ່ານມາ ພົບວ່າ: ຜູ້ຕອບແບບສອບຖາມ36% ເຫັນດີກັບການກິນຊີ້ນໃຫ້ນ້ອຍລົງ ເພື່ອປົກປ້ອງສິ່ງແວດລ້ອມ, ໃນຂະນະທີ່ 33% ເຫັນດີກັບການເດີນທາງດ້ວຍລະບົບຂົນສົ່ງສາທາລະນະແລະ 24% ເຫັນດີກັບການໂດຍສານເຮືອບິນນ້ອຍລົງ.

ຜົນການສໍາຫຼວດລະບຸວ່າ: ຜູ້ຕອບແບບສອບຖາມ 63%ພວກເຂົາເຊື່ອໃນວິທະຍາສາດ ແລະ ນັກວິທະຍາສາດກ່ຽວກັບຂໍ້ມູນເລື່ອງການປ່ຽນແປງຂອງດິນຟ້າອາກາດ.

ນອກຈາກນີ້, ການສໍາຫຼວດຄວາມຄິດເຫັນ ແບ່ງອອກຕາມເພດພົບວ່າ 85% ຂອງແມ່ຍິງມີຄວາມກັງວົນກ່ຽວກັບມົນລະພິດທາງອາກາດເພີ່ມຂຶ້ນຈາກກິດຈະກໍາຂອງມະນຸດ. ໃນຂະນະດຽວກັນ, 69% ຂອງຜູ້ຊາຍມີຄວາມກັງວົນທີ່ຄ້າຍຄືກັນແລະ ພົບວ່າ ແມ່ຍິງສະໜັບສະໜູນນະໂຍບາຍເພື່ອຫຼຸດຜ່ອນການປ່ຽນແປງຂອງດິນຟ້າອາກາດ. ອີກທັງເຕັມໃຈທີ່ຈະປ່ຽນພຶດຕິກໍາຂອງພວກເຂົາເພື່ອແກ້ໄຂບັນຫານີ້ຫຼາຍກວ່າຜູ້ຊາຍ.