ຂ່າວຕ່າງປະເທດລາຍງານໃນທ້າຍອາທິດຜ່ານມາວ່າ: ລັດຖະບານຍີ່ປຸ່ນພິຈາລະນາໃຫ້ເງິນສະໜັບສະໜູນແບບຄັ້ງດຽວ ຈຳນວນ 30,000 ເຢນແກ່ຄົວເຮືອນທີ່ມີລາຍຮັບຕ່ຳ,ຍົກເວັ້ນພາສີຜູ້ມີບ່ອນຢູ່ອາໄສ ແລະ ເພີ່ມເງິນສະຫວັດດີການສຳລັບເດັກນ້ອຍໃນຄົວເຮືອນທີ່ມີລາຍຮັບຕໍ່າ ຈຳນວນ 20,000 ເຢນຕໍ່ຄົນ.

ລາຍງານລະບຸວ່າ: ການໃຫ້ເງິນຄັ້ງນີ້ ເປັນສ່ວນໜຶ່ງຂອງມາດຕະການທາງເສດຖະກິດ ຊຶ່ງຍີ່ປຸ່ນເນັ້ນໃສ່ສະໜັບສະໜູນຄົວເຮືອນທີ່ມີລາຍຮັບຕໍ່າ ທີ່ໄດ້ຮັບຜົນກະທົບຈາກຄ່າໃຊ້ຈ່າຍດ້ານອາຫານ ແລະ ປັດໄຈຈຳເປັນໃນຊີວິດປະຈຳວັນອື່ນໆເພີ່ມຂຶ້ນ.

ນອກຈາກນັ້ນ, ມາດຕະການກະຕຸ້ນເສດຖະກິດນີ້ ຍັງຈະກັບມາໃຫ້ເງິນອຸດໜູນຄ່າໄຟຟ້າ ແລະ ຄ່າແກັສໃນເດືອນມັງກອນ ປີ 2025 ພ້ອມດ້ວຍເປົ້າໝາຍຈັດສັນການສະໜັບສະໜູນຈົນເຖິງເດືອນມີນາ 2025 ໂດຍຈຳນວນເງິນທີ່ສະໜັບສະໜູນອາດເພີ່ມຂຶ້ນຕາມການປຶກສາຫາລືຂອງພັກລັດຖະບານ.