ໂດຍ: ວັນໄຊ ຕະວິນຍານ

ຍ້ອນມີພັກປະຊາຊົນປະຕິວັດລາວນໍາພາປະຊາຊົນບັນດາເຜົ່າຕໍ່ສູ້ຢ່າງລະອິດລະອ້ຽວ,ຜ່ານແປວໄຟສົງຄາມ, ເສຍສະລະຊີວິດ-ເລືອດເນື້ອຂອງນັກຮົບປະຕິວັດ-ຂອງປະຊາຊົນລາວບັນດາເຜົ່າຜູ້ຮັກຊາດ ຈຶ່ງສາມາດປົດປ່ອຍປະເທດຊາດໄດ້ຢ່າງສົມບູນ ສ້າງຕັ້ງສາທາລະນະລັດ ປະຊາທິປະໄຕ ປະຊາຊົນລາວໃນວັນທີ 2 ທັນວາ 1975 ມາຮອດປັດຈຸບັນ; ນີ້ແມ່ນຄວາມຮູ້ສຶກຂອງ ທ່ານ ບຸນຂວາງ ທະວີສັກ ຮອງປະທານສານປະຊາຊົນສູງສຸດ ຕໍ່ວັນຊາດທີ 2 ທັນວາ ຄົບຮອບ 49 ປີ.

ທ່ານກ່າວຕື່ມວ່າ:ພັກປະຊາຊົນປະຕິວັດລາວ ຍາມໃດກໍຄິດເຫັນຊາດ ຫ່ວງໃຍປະຊາຊົນ ເຫັນປະຊາຊົນຖືກກົດຂີ່ຂົ່ມເຫັງ ຊີວິດທຸກທໍລະມານຈາກການທາລຸນຂອງພວກຈັກກະພັດ ແລະ ລູກແຫຼ້ງຕີນມືຂອງພວກເຂົາ. ພັກ ຈຶ່ງໄດ້ນໍາພາປະຊາຊົນບັນດາເຜົ່າລຸກຂຶ້ນຕໍ່ສູ້ຢ່າງອາດຫານຊານໄຊ ເຮັດໃຫ້ປະຊາຊົນລາວໄດ້ກາຍມາເປັນເຈົ້າຂອງປະທດຊາດຢ່າງແທ້ຈິງ.

ວັນຊາດ ທີ 2 ທັນວາ ຈຶ່ງເປັນວັນທີ່ມີຄວາມໝາຍປະຫວັດສາດຂອງຊາດ ເຮັດໃຫ້ຊາວໂລກຮັບຮູ້ ຄວາມເປັນຊາດລາວ,ມີສັນຕິພາບ,ເອກະລາດ, ປະຊາທິປະໄຕ ມີຜືນແຜ່ນດິນອັນຄົບຖ້ວນ.

ຕະຫຼອດ 49 ປີຜ່ານມາ, ເຖິງວ່າ ບ້ານເມືອງ ມີທັງຂໍ້ສະດວກ, ຂໍ້ຫຍຸ້ງຍາກປານໃດກໍຕາມ ພັກ ໄດ້ນໍາພາປະຊາຊົນລາວບັນດາເຜົ່າ ປົກປັກຮັກສາໄວ້ໄດ້ຢ່າງໝັ້ນຄົງ ແລະ ພັດທະນາປະເທດຊາດໄປຕາມທິດສັງຄົມນິຍົມ ເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າດີຂຶ້ນເປັນລໍາດັບ.ສິ່ງທີ່ພົ້ນເດັ່ນ ແລະ ໃຫ້ຊາວໂລກຮັບຮູ້ ແລະ ຍ້ອງຍໍຊົມເຊີຍ ແມ່ນລາວ ໄດ້ຮັບກຽດເປັນເຈົ້າພາບຈັດກອງປະຊຸມສຸດຍອດ ອາຊຽນ ຄັ້ງທີ 44-45 ແລະ ກອງປະຊຸມໄອປາ ຜ່ານມາ ປະສົບຜົນສໍາເລັດທຸກປະການ.

ເວົ້າສະເພາະວຽກງານຂອງສານປະຊາຊົນ. ຕະຫຼອດ 49 ປີຜ່ານມາ, ພັກປະຊາຊົນ ປະຕິບັດລາວ ໄດ້ເອົາໃຈໃສ່ນໍາພາພັດທະນາການຈັດຕັ້ງ ແລະ ບຸກຄະລາກອນຂອງສານໃຫ້ມີຄວາມໜັກແໜ້ນ, ເຂັ້ມແຂງ, ເຕີບໃຫຍ່ຂະຫຍາຍຕົວເປັນກ້າວໆ, ການຕັດສິນຄະດີຂອງສານມີຄວາມວ່ອງໄວ, ໂປ່ງໃສ, ຖືກຕ້ອງ ແລະ ຮັບປະກັນຄວາມຍຸຕິທໍາ, ຄູ່ຄວາມ ກໍຄືປະຊາຊົນ ມີຄວາມພໍໃຈ, ເຊື່ອຖືຕໍ່ການຕັດສິນຂອງສານດີຂຶ້ນຕາມລໍາດັບ, ພື້ນຖານໂຄງລ່າງ, ພາຫະນະອຸປະກອນຮັບໃຊ້, ບັນລັງຕັດສິນ ໄດ້ຮັບການປັບປຸງໃຫ້ເໝາະສົມ,​ຫັນສູ່ທັນສະໄໝ ເພື່ອບໍລິການຮັບໃຊ້ປະຊາຊົນໃຫ້ທົ່ວເຖິງ, ຜູ້ພິພາກສາ ແລະ ພະນັກງານຂອງສານ ໄດ້ຮັບການຍົກສູງທາງດ້ານຈັນຍາບັນ-ຈັນຍາທໍາ, ຄວາມຮູ້ຄວາມສາມາດທາງດ້ານວິຊາສະເພາະ-ວິຊາການສູງຂຶ້ນ ແລະ ກາຍເປັນມືອາຊີບ ສາມາດຮອງຮັບກັບໜ້າທີ່ການເມືອງໃນໄລຍະໃໝ່ໄດ້ດີຍິ່ງຂຶ້ນ ເພື່ອໃຫ້ສານປະຊາຊົນ ກໍຄືອົງການຕຸລາການກາຍເປັນເຄື່ອງມືທີ່ສັກສິດ ເຂັ້ມງວດຂອງພັກ, ເປັນທີ່ເພິ່ງດ້ານຍຸຕິທໍາໃຫ້ແກ່ປະຊາຊົນ ຕາມທິດການຕັດສິນ-ພິພາກສາຄະດີ: ໂປ່ງໃສ, ເປັນເອກະລາດ ແລະ ເປັນທໍາ.

ໂດຍເສີມຂະຫຍາຍມູນເຊື້ອອັນອົງອາດກ້າແກ່ນ, ຄວາມຮັກຊາດອັນດູດດື່ມ ໃນນາມພະນັກງານສະມາຊິກພັກຜູ້ໜຶ່ງ ຂໍຢຶດໝັ້ນ ຄໍາສັ່ງສອນຂອງພັກ, ເດີນຕາມເສັ້ນທາງສັງຄົມນິຍົມ.ຈະສືບຕໍ່ຕັ້ງໜ້າພັດທະນາວຽກງານຂອງສານປະຊາຊົນ ໃຫ້ດີຂຶ້ນໄປເລື້ອຍໆ.

ໂອກາດວັນຊາດທີ 2 ທັນວາ ຄົບຮອບ 49 ປີ ຂໍຈາລຶກບຸນຄຸນຢ່າງລົ້ນເຫຼືອ ມາຍັງການນໍາພັກ-ລັດ ທຸກຮຸ່ນໃນອະດີດ ແລະ ປັດຈຸບັນ. ຖ້າບໍ່ມີພວກເພິ່ນ ພວກເຮົາຈະບໍ່ເຫັນປະເທດຊາດເຕີບໃຫຍ່ເຂັ້ມແຂງຄືສູ່ມື້ນີ້.ຂໍຖືເອົາໂອກາດນີ້ ອວຍພອນໄຊອັນປະເສີດໃຫ້ການນໍາທຸກທ່ານ ຈົ່ງມີແຕ່ສຸຂະພາບເຂັ້ມແຂງ,ສືບຕໍ່ນໍາພາປະເທດຊາດກ້າວໄປສູ່ຈຸດໝາຍສັງຄົມນິຍົມທີ່ຕັ້ງເອົາໄວ້ ໃຫ້ປະສົບຜົນສໍາເລັດ.

ນໍ້າໃຈ ວັນຊາດທີ 2 ທັນວາ ໝັ້ນຍືນ !