ໃນວັນທີ 19 ພະຈິກ ຜ່ານມານີ້ ທີ່ຫ້ອງຮັບແຂກຫ້ອງວ່າການແຂວງ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ພ້ອມດ້ວຍຄະນະ ໄດ້ຕ້ອນຮັບ ທ່ານ ຈັນສະແຫວງ ບຸນຍົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່.

ທ່ານ ເຈົ້າແຂວງໄຊຍະບູລີ ໄດ້ລາຍງານສະພາບຂອງແຂວງວ່າ: ການພັດທະນາເສດຖະກິດຂອງແຂວງ ແມ່ນອີງໃສ່ 3 ທ່າແຮງຕົ້ນຕໍ ທີ່ເປັນເສົາຄໍ້າຄື: ການຜະລິດກະສິກໍາຮອບດ້ານຕິດພັນກັບການປຸງແຕ່ງ, ອຸດສາຫະກໍາພະລັງງານໄຟຟ້າ, ການບໍລິການ ແລະ ການຄ້າຊາຍແດນ. ໂດຍອີງໃສ່ 3 ທ່າແຮງບົ່ມຊ້ອນດັ່ງກ່າວ ຄາດວ່າໝົດປີອັດຕາການເຕີບໂຕເສດຖະກິດຂອງແຂວງ ຈະບັນລຸໃນລະດັບ 5.5% ລວມຍອດຜະລິດຕະພັນພາຍໃນ 15,762 ຕື້ກີບ, ສະເລ່ຍຕໍ່ຫົວຄົນໃຫ້ໄດ້ 36.93 ລ້ານກີບ. ສໍາລັບວຽກງານພະລັງງານ ແລະ ບໍ່ແຮ່ ປັດຈຸບັນມີໂຄງການພັດທະນາແຫຼ່ງຜະລິດໄຟຟ້າ ທີ່ຂັ້ນສູນກາງ ແລະ ຂັ້ນແຂວງອະນຸຍາດທັງໝົດມີ 16 ໂຄງການ, ໂຄງການດໍາເນີນການຜະລິດໄຟຟ້າມີ 3 ໂຄງການ, ໂຄງການດໍາເນີນການກໍ່ສ້າງມີ 4 ໂຄງການ, ໂຄງການດໍາເນີນສຶກສາຄວາມເປັນໄປໄດ້ເບື້ອງຕົ້ນ ມີ 7 ໂຄງການ. ທົ່ວແຂວງໄດ້ຊົມໃຊ້ໄຟຟ້າຖາວອນໃນລະບົບ ຈໍານວນ 424 ບ້ານ ເທົ່າກັບ 98.60% ຂອງຈໍານວນບ້ານທັງໝົດ ແລະ ມີ 80,920 ຄອບຄົວ ເທົ່າກັບ 98,35% ຂອງຈໍານວນຄອບຄົວທັງໝົດ (ຍັງ 6 ບ້ານ) ປັດຈຸບັນພວມກໍ່ສ້າງຕາຂ່າຍໄຟຟ້າ 22kv, 0,4kv ແລະ ຕິດຕັ້ງໝໍ້ແປງເຂົ້າບ້ານໂພນສີດາ ແລະ ບ້ານຂອນແກ່ນ ເມືອງໄຊຍະບູລີ ສໍາເລັດແລ້ວ 80%; ມີໂຄງການຊອກຄົ້ນ-ສໍາຫຼວດ, ຂຸດຄົ້ນ ແລະ ປຸງແຕ່ງແຮ່ທາດແບບປົກກະຕິ ແລະ ແບບທົດລອງ ທີ່ຂັ້ນສູນກາງ ແລະ ຂັ້ນແຂວງຄຸ້ມຄອງ ທັງໝົດມີ 34 ໂຄງການ, ຂັ້ນສູນກາງຄຸ້ມຄອງ 13 ໂຄງການ, ຂັ້ນແຂວງຄຸ້ມຄອງ 21 ໂຄງການ, ໂຄງການຂຸດຄົ້ນຫີນປູນມີ 14 ໂຄງການ, ໂຄງການຂຸດຄົ້ນແຮ່ມັງການ ມີ 1 ໂຄງການ ໃນເນື້ອທີ່ 4.9 ເຮັກຕາ. ປັດຈຸບັນສາມາດຂຸດຄົ້ນແຮ່ມັງການໄດ້ 80,000 ໂຕນ ແລະ ພວມກໍາລັງປະກອບເອກະສານ ເພື່ອຂໍໂກ່ຕ່າສົ່ງແຮ່ທາດອອກໄປຈໍາໜ່າຍຕ່າງປະເທດນໍາກະຊວງພະລັງງານ ແລະ ບໍ່ແຮ່. ຈາກນັ້ນ ກໍ່ໄດ້ພ້ອມກັນປະກອບຄໍາຄິດຄໍາເຫັນ ເພື່ອເຮັດໃຫ້ວຽກງານດັ່ງກ່າວ ໄດ້ຮັບການຈັດຕັ້ງປະຕິບັດໃຫ້ມີຜົນສໍາເລັດ.

(ຂ່າວ: ມະໄລວັນ)