ພິທີປະກາດຮັບຮອງບ້ານນໍ້າລ້ອງ ເມືອງທ່າໂທມ ແຂວງໄຊສົມບູນ ເປັນບ້ານວັດທະນະທໍາແຫ່ງທີ 23 ຂອງເມືອງ ໄດ້ຈັດຂຶ້ນໃນຕອນເຊົ້າຂອງວັນທີ 20 ພະຈິກ ນີ້ ທີ່ເດີ່ນໂຮງຮຽນປະຖົມບ້ານນໍ້າລ້ອງ ໂດຍການເຂົ້າຮ່ວມພິທີຂອງທ່ານ ຕົ່ງມົວ ຊົວໂກ້ ຮອງເຈົ້າແຂວງໄຊສົມບູນ ຜູ້ຊີ້ນໍາວຽກງານວັດທະນະທໍາ-ສັງຄົມ, ທ່ານ ວັນດີ ທໍາມະຕານ ຮອງເລຂາພັກເມືອງ, ທ່ານ ຊົ່ງ ໄຊຮົ່ວ ຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນພິທີ, ທ່ານ ພຸດສະໄໝ ໂພທີສານ ເລຂາພັກບ້ານ ນາຍບ້ານໆນໍ້າລ້ອງ ໄດ້ຜ່ານບົດສະຫຼຸບ ກ່ຽວກັບການສ້າງບ້ານວັດທະນະທໍາໃໝ່ ໂດຍໄດ້ໃຫ້ຮູ້ວ່າບ້ານນໍ້າລ້ອງ ແມ່ນໜຶ່ງໃນ 10 ບ້ານທີ່ຂຶ້ນກັບກຸ່ມເທດສະບານ ມີ 7 ໜ່ວຍສາມັກຄີ, ມີ 86 ຄອບຄົວ, ມີ 480 ຄົນ ຍິງ 230 ຄົນ, ມີ 3 ຊົນເຜົ່າຢູ່ຮ່ວມກັນ, ປະຊາຊົນສ່ວນຫຼາຍແມ່ນຢຶດຖືອາຊີບປູກຝັງ ແລະ ລ້ຽງສັດ ເພື່ອສ້າງລາຍຮັບເຂົ້າໃນຄອບຄົວ ຊຶ່ງສະເລ່ຍລາຍຮັບຈາກຢາງພາລາ, ມັນຕົ້ນ, ພືດຜັກອື່ນໆ ແລະ ສັດລ້ຽງ. ບ້ານສາມາດສ້າງລາຍຮັບໄດ້ປະມານ 3 ຕື້ກວ່າກີບຕໍ່ປີ ຊຶ່ງໄດ້ເຮັດໃຫ້ຊີວິດການເປັນຢູ່ຂອງປະຊາຊົນ ມີທ່າກ້າວດີຂຶ້ນກວ່າເກົ່າ.

ຜ່ານການປະເມີນຕາມມາດຕະຖານ ຂອງການສ້າງຄອບຄົວ ແລະ ບ້ານວັດທະນະທໍາແລ້ວ ສາມາດປະເມີນຄອບຄົວວັດທະນະທໍາໄດ້ 81 ຄອບຄົວ ເທົ່າກັບ 94.2%. ຈາກນັ້ນ ທ່ານ ຕົ່ງມົວ ຊົວໂກ້ ໄດ້ມອບໃບຢັ້ງຢືນ ບ້ານວັດທະນະທໍາ ໃຫ້ບ້ານນໍ້າລ້ອງ ຢ່າງເປັນທາງການ.

(ຂ່າວ: ພາພອນ ນະວົງໄຊ)