ພາຍໃຕ້ວາລະກອງປະຊຸມສະມາຊິກ ມີເດຍລາວເພື່ອສ້າງຄວາມເຂັ້ມແຂງໃນການສົ່ງເສີມສະຫວັດດີການຂອງແມ່ຍິງແລະເດັກ ທີ່ຈັດຂຶ້ນໃນວັນທີ 10-12 ທັນວາ 2024; ຫຼັງການປະຊຸມເຊີງປະຕິບັດການ 1 ວັນ, ໃນວັນທີ 11 ທັນວານີ້ ບັນດາສະມາຊິກ ມີເດຍລາວ ໄດ້ພ້ອມກັນລົງເກັບກຳຂໍ້ມູນຕົວຈິງ ຢູ່ຂອບເຂດເທດສະບານແຂວງບໍ່ແກ້ວ ເພື່ອຈະສ້າງເປັນຜະລິດຕະພັນສື່ມວນຊົນ ຕາມບັນດາຫົວຂໍ້ທີ່ໄດ້ແບ່ງກຸ່ມຄົ້ນຄວ້າ.

ການລົງເຄື່ອນໄຫວເກັບກໍາຂໍ້ມູນຕົວຈິງຄັ້ງນີ້, ໄດ້ແບ່ງອອກເປັນ 3 ຫົວຂໍ້ຄົ້ນຄວ້າ ຄື: ກຸ່ມທີ 1 ກ່ຽວກັບການໃຫ້ບໍລິການການສັກວັກຊິນກັນມະເຮັງປາກມົດລູກ, ກຸ່ມທີ 2 ກ່ຽວກັບຄວາມສຳຄັນຂອງການສັກວັກຊິນກັນມະເຮັງປາກມົດລູກ ແລະ ກຸ່ມທີ 3 ກ່ຽວກັບຜົນກະທົບດ້ານສັງຄົມໃນການແຕ່ງດອງແຕ່ອາຍຸຍັງນ້ອຍແລະການໃຫ້ຄໍາປືກສາແກ່ໄວໝຸ່ມກ່ຽວກັບວຽກແຕ່ງດອງກ່ອນໄວອັນຄວນ.

ທັງນີ້ກໍເປັນການສ້າງຄວາມເຂັ້ມແຂງ ຜ່ານການປະຊຸມ ແລະ ລົງເຮັດຕົວຈິງ ເພື່ອໃຫ້ສະມາຊິກເພີ່ມທັກສະໃນການສຳພາດເກັບກຳຂໍ້ມູນຕ່າງໆທີ່ກ່ຽວຂ້ອງກັບຫົວຂໍ້ຄົ້ນຄວ້າຂອງກຸ່ມ ເພື່ອໃຫ້ມີສ່ວນຮ່ວມນໍາກັນ ສ້າງຜະລິດຕະພັນສື່ມວນຊົນ ເປັນຕົ້ນການເຮັດຄຣິບວິດີໂອ ລົງໃນເພສເຟສບຸກ, ຕິກຕ໊ອກ, ຢູທູບ ທີ່ໄວໜຸ່ມກຳລັງໃຫ້ຄວາມສົນໃຈ.

(ຂ່າວ-ພາບ: ສຸກສະຫວັນ)