ໂດຍ: ວັນເພັງ

ວຽກງານການທ່ອງທ່ຽວ ເປັນໜຶ່ງວຽກງານທີ່ພັກ-ລັດຖະບານ ຍາມໃດກໍເຫັນຄວາມສຳຄັນ. ດັ່ງນັ້ນ, ເພື່ອຜົນສໍາເລັດໃນການພັດທະນາເສດຖະກິດ-ສັງຄົມແຫ່ງຊາດ 2021-2025 ຕໍ່ເວທີສາກົນ. ຕ້ອງໄດ້ປັບປຸງພື້ນຖານໂຄງລ່າງສິ່ງອໍານວຍຄວາມສະດວກທາງດ້ານການທ່ອງທ່ຽວ, ປັບປຸງຄຸນນະພາບຂອງການບໍລິການການທ່ອງທ່ຽວເຂົ້າສູ່ມາດຕະຖານສາກົນເທື່ອລະກ້າວ ເພື່ອຮອງຮັບນັກທ່ອງທ່ຽວຕ່າງປະເທດເຂົ້າມາທ່ຽວລາວນັບມື້ນັບຫຼາຍຂຶ້ນ. ໃນນັ້ນ, ຄາດຄະເນວ່າ ປີ 2024 ມີຈໍານວນນັກທ່ອງທ່ຽວຕ່າງປະເທດເຂົ້າມາທ່ຽວລາວ ປະມານ 2.728.181 ຄົນ (2 ລ້ານກວ່າຄົນ), ສ້າງລາຍຮັບ 401.153.373 ໂດລາ (401 ລ້ານກວ່າໂດລາ).

ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ລາຍງານການກະກຽມການຈັດປີທ່ອງທ່ຽວລາວ 2024 ຕໍ່ກອງປະຊຸມ ລະດັບຊາດກະກຽມຄວາມພ້ອມ ເປີດປີທ່ອງທ່ຽວລາວ 2024 ເມື່ອບໍ່ດົນມານີ້ ວ່າ: ເພື່ອຊຸກຍູ້ຂະບວນການພັດທະນາ, ສົ່ງເສີມ ແລະ ຄຸ້ມຄອງການທ່ອງທ່ຽວຂອງລາວ ທາງດ້ານທຳມະຊາດ, ວັດທະນະທຳ, ປະຫວັດສາດ ແລະ ການທ່ອງທ່ຽວແບບປະຊາຊົນມີສ່ວນຮ່ວມໃຫ້ມີຄວາມຍືນຍົງ; ສ້າງຜະລິດຕະພັນທ່ອງທ່ຽວໃຫ້ມີຄວາມຫຼາກຫຼາຍ, ຍົກລະດັບຄຸນນະພາບການບໍລິການ, ເຂົ້າເຖິງກຸ່ມຕະຫຼາດເປົ້າໝາຍ, ເຊື່ອມໂຍງກັບພາກພື້ນ ແລະ ສາກົນ; ສົ່ງເສີມກິດຈະກຳບຸນປະເພນີ ແລະ ເທດສະການຕ່າງໆ ຢູ່ສູນກາງ ເເລະ ທ້ອງຖິ່ນ ແລະ ການມີສ່ວນຮ່ວມຂອງທຸກພາກສ່ວນ; ສົ່ງເສີມການທ່ອງທ່ຽວພາຍໃນ ແລະ ດຶງດູດນັກທ່ອງທ່ຽວສາກົນເຂົ້າມາທ່ຽວລາວນັບມື້ນັບຫຼາຍຂຶ້ນ ແນໃສ່ສ້າງວຽກເຮັດງານທໍາໃຫ້ແກ່ສັງຄົມ ແລະ ສ້າງລາຍຮັບເງິນຕາເຂົ້າສູ່ປະເທດ. ພ້ອມນັ້ນ, ເພື່ອເຮັດໃຫ້ບັ້ນໂຄສະນາປີທ່ອງທ່ຽວລາວ 2024 ສອດຄ່ອງກັບແຜນພັດທະນາການທ່ອງທ່ຽວ 2021-2025 ທີ່ໄດ້ລະບຸໄວ້ວ່າ: ສປປ ລາວ ເປັນຈຸດໝາຍປາຍທາງການທ່ອງທ່ຽວທີ່ມີຄຸນນະພາບ, ຄວາມປອດໄພ ແລະ ການທ່ອງທ່ຽວສີຂຽວຍືນຍົງ. ກົມວິຊາການກ່ຽວຂ້ອງຈຶ່ງໄດ້ຄົ້ນຄວ້າ 2 ຄໍາຂວັນ ເພື່ອປຶກສາຫາລື ນໍາບັນດາພາກ ສ່ວນທີ່ກ່ຽວຂ້ອງດັ່ງມີເນື້ອໃນຄື: ທ່ອງທ່ຽວລາວ ແບບຍືນຍົງ, ສຳຜັດທຳມະຊາດ, ວັດທະນະທຳທີ່ຫຼາກຫຼາຍ, ປະຫວັດສາດທີ່ຍາວນານ ດ້ວຍຄວາມສະບາຍໃຈ ແລະ ອົບອຸ່ນ; ທ່ອງທ່ຽວລາວ ປອດໄພ, ຊື່ນໃຈໃນວັດທະນະທຳ, ປະຫວັດສາດ ແລະ ທຳມະຊາດ. ການສ້າງຄຳຂວັນສຳລັບປີທ່ອງທ່ຽວ ກົມວິຊາການ ໄດ້ຈັດກອງປະຊຸມປຶສາຫາລື ນຳບັນດາພາກສ່ວນທີ່ກ່ຽວຂ້ອງ ຈຶ່ງໄດ້ຄັດເລືອກເອົາຫົວຂໍ້ທີ 2 ຄື: ທ່ອງທ່ຽວລາວ ປອດໄພ, ຊື່ນໃຈໃນວັດທະນະທຳ, ປະຫວັດສາດ ແລະ ທຳມະຊາດ.

ສຳລັບກິດຈະກຳປີທ່ອງທ່ຽວລາວ 2024 ໂດຍສົມທົບນຳ ບັນດາພະແນກ ຖວທ ນະຄອນຫຼວງ ແລະ ແຂວງໃນຂອບເຂດທົ່ວປະເທດ ສັງລວມລາຍການກິດຈະກໍາປີທ່ອງທ່ຽວລາວ 2024 ໄດ້ທັງໝົດ 75 ກິດຈະກຳ ຊຶ່ງແບ່ງອອກເປັນ 2 ລະດັບ ຄື: ກິດຈະກຳລະດັບຊາດ ຈຳນວນ 14 ກິດຈະກຳ ແລະ ລະດັບແຂວງ ຈຳນວນ 61 ກິດຈະກຳ.

ທ່ານ ນາງ ສວນສະຫວັນ ວິຍະເກດ ຍັງກ່າວຕື່ມວ່າ: ຄາດຄະເນຜົນໄດ້ຮັບ ການເປີດປີທ່ອງທ່ຽວລາວ 2024 ຄື: ເປັນການໂຄສະນາແນວທາງນະໂຍບາຍຂອງພັກ-ລັດ, ຜົນສຳເລັດໃນການພັດທະນາເສດຖະກິດ-ສັງຄົມແຫ່ງຊາດ 2021-2025 ຕໍ່ເວທີສາກົນ; ພັດທະນາ ແລະ ສົ່ງເສີມການທ່ອງທ່ຽວລາວໃຫ້ມີການຂະຫຍາຍຕົວຢ່າງແຂງແຮງ, ຕໍ່ເນື່ອງ ແລະ ມີຄວາມຍືນຍົງ ໂດຍການມີສ່ວນຮ່ວມຂອງທົ່ວສັງຄົມ ແລະ ຂອງປະຊາຊົນລາວບັນດາເຜົ່າ; ປັບປຸງພື້ນຖານໂຄງລ່າງສິ່ງອໍານວຍຄວາມສະດວກທາງດ້ານການທ່ອງທ່ຽວ, ປັບປຸງຄຸນນະພາບຂອງການບໍລິການການທ່ອງທ່ຽວເຂົ້າສູ່ມາດຕະຖານສາກົນເທື່ອລະກ້າວ. ພ້ອມນັ້ນ, ອຸດສາຫະກຳການທ່ອງທ່ຽວສາມາດແຂ່ງຂັນ ແລະ ເຊື່ອມໂຍງກັບພາກພື້ນ ແລະ ສາກົນ; ນັກທ່ອງທ່ຽວສາກົນເຂົ້າມາທ່ຽວລາວນັບມື້ນັບຫຼາຍຂຶ້ນ, ສ້າງວຽກເຮັດງານທຳທາງກົງ ແລະ ທາງອ້ອມໃຫ້ທົ່ວສັງຄົມ ເເລະ ສ້າງລາຍຮັບເປັນເງິນຕາຕ່າງປະເທດເຂົ້າສູ່ປະເທດ. ໃນນັ້ນ, ຄາດຄະເນຈໍານວນນັກທ່ອງທ່ຽວ ແລະ ລາຍຮັບ ດັ່ງນີ້: ປີ 2023 ຄາດຄະເນນັກທ່ອງທ່ຽວສາກົນ (ນັກທ່ອງທ່ຽວຕ່າງປະເທດ) ເຂົ້າມາທ່ຽວລາວ 2.504.213 ຄົນ (2 ລ້ານກວ່າຄົນ), ສ້າງລາຍຮັບ 367.588.360 ໂດລາ (367 ລ້ານກວ່າໂດລາ); ໃນປີ 2024 ມີ 2.728.181 ຄົນ, ສ້າງລາຍຮັບ 401.153.373 ໂດລາ. ໃນນັ້ນ, ຄາດຄະເນວ່າ ໃນປີ 2023 ນັກທ່ອງທ່ຽວພາຍໃນມີ 1.751.666 ຄົນ (1 ລ້ານກວ່າຄົນ), ສ້າງລາຍຮັບ 283.830.360 ໂດລາ (283 ລ້ານກວ່າໂດລາ), ໃນປີ 2024 ມີ 1.881.717 ຄົນ (1 ລ້ານກວ່າຄົນ), ສ້າງລາຍຮັບ 311.699.582 ໂດລາ (311ລ້ານກວ່າໂດລາ).