ໂຮງ​ໝໍ​ມະ​ໂຫ​ສົດ ຮ່ວມກັບມູນ​ນິ​ທິ​ພົງ​ສະ​ຫວັນແລະອົງ​ການA New Vision (ປະເທດສິງກະໂປ)ໄດ້​ຈັດພິທີເປີດກິດຈະກໍາໂຄງການຜ່າຕັດພະຍາດແກ່ນຕາຂຸ້ນໂດຍບໍ່ເສຍຄ່າ​ຂຶ້ນ​ໃນ​ວັນ4 ກຸມພານີ້ ທີ່ໂຮງໝໍມະໂຫສົດໂດຍ​ການ​ເຂົ້າ​ຮ່ວມ​ຂອງ​ທ່ານບຸນໂຮມ ກັນທະວົງ ຮອງຜູ້ອໍານວຍການໂຮງໝໍມະໂຫສົດ, ທ່ານ ຕັນ ຊີ່ງ ກູນ (Tan Ching Khoon)ປະທານມູນນິທິ A New Vision ປະເທດສິງກະໂປ,ທ່ານ ​ຄຳຫຼ້າ​ ລໍລອນສີ​ ປະທານມູນນິທິພົງສະຫວັນ ແລະ ທ່ານ​ Ong Chin Leeຮອງ​ປະທານ​ມູນິທິພົງສະຫວັນ ພ້ອມດ້ວຍຄະ​ນະ​ຊ່ຽວ​ຊານ​ຈາກ​ຕ່າງ​ປະ​ເທດເຂົ້າຮ່ວມ.

ທ່ານ ບຸນໂຮມ ກັນທະວົງ ກ່າວວ່າ: ການຈັດກິດຈະກຳໃນຄັ້ງນີ້ໂດຍເລັງເຫັນຄວາມສໍາຄັນບັນຫາພະຍາດແກ່ນຕາຂຸ້ນຢູ່ໃນລາວເພື່ອຍົກລະດັບຄຸນນະພາບຊີວິດໃຫ້ປະຊາຊົນ ໂດຍສະເພາະຜູ້ທີ່ປະສົບປັນຫາດ້ານສຸຂະພາບຕາ ແລະ ຂາດໂອກາດໃນການເຂົ້າເຖິງການຮັກສາທີ່ມີປະສິດທິຜົນ, ໂຄງການດັ່ງກ່າວຈັດຂຶ້ນເປັນຄັ້ງທໍາອິດ ນັບແຕ່ວັນທີ 3-8 ກຸມພາ 2025 ໂດຍການສະໜັບສະໜູນຈາກມູນນິທິພົງສະຫວັນ A New Vision ປະເທດສິງກະໂປທາງດ້ານງົບປະມານ ແລະ ວິຊາການສົມທົບກັບຊ່ຽວຊານຈາກປະເທດເນປານເພື່ອມາຊ່ວຍເຫຼືອປິ່ນປົວຄົນເຈັບທີ່ເປັນພະຍາດແກ່ນຕາຂຸ້ນ. ເປົ້າໝາຍເອົາໂຮງໝໍມະໂຫສົດເປັນສະຖານທີ່ ແລະ ວິຊາການຊ່ຽວຊານຕາກວດ ແລະ ຄັດກອງຄົນເຈັບ.

ຂ່າວ-ພາບ: ບຸນອູ້ມ