ຂ່າວຕ່າງປະເທດລາຍງານ; ເຈົ້າ​ໜ້າ​ທີ່​ອຸດ​ສາ​ຫະ​ກຳຂອງ​ອິນ​ໂດ​ເນ​ເຊຍ​ເປີດ​ເຜີຍ​ໃນ​ວັນ​ທີ 26 ກຸມ​ພາ ຜ່ານມາວ່າ: ການສົ່ງອອກນໍ້າມັນປາມຂອງອິນໂດເນເຊຍໃນປີ 2025 ມີທ່າອ່ຽງທີ່ຈະຫຼຸດລົງ 7.3% ຈາກ 2024 ເຫຼືອ 27.35 ລ້ານໂຕນ, ເຖິງແມ່ນວ່າການຜະລິດນ້ໍາມັນປາມຈະເພີ່ມຂຶ້ນກໍຕາມ, ທັງນີ້ເນື່ອງຈາກອິນໂດເນເຊຍ ຊຶ່ງເປັນປະເທດຜະລິດນໍ້າມັນປາມໃຫຍ່ທີ່ສຸດໃນໂລກ ເພີ່ມການຜະລິດໄບໂອດີເຊລ ພາຍໃນປະເທດຫຼາຍຂຶ້ນ​.

ທ່ານ ຟາດິລ ຮາຊັນ ຫົວໜ້າ​ດ້ານ​ການ​ຄ້າ ​ແລະ ​ສົ່ງ​ເສີມ​ການຂາຍ ຂອງສະມາຄົມ​ນ້ຳມັນ​ປາມ​ອິນ​ໂດ​ເນ​ເຊຍ ຄາດ​ຄະ​ເນ​ວ່າ: ການ​ຜະລິດ​ນ້ຳມັນ​ປາມ​ດິບ​ຂອງ​ອິນ​ໂດ​ເນ​ເຊຍ​ຈະ​ເພີ່ມ​ຂຶ້ນ​ເປັນ 50 ລ້ານ​ໂຕນ​ໃນ​ປີ 2025 ຈາກ 48.16 ລ້ານ​ໂຕນ​ໃນ​ປີ 2024.

ທ່ານ ເອນີຍາ ລິສເຕຍນີ ເດວີ ເຈົ້າ​ໜ້າ​ທີ່​ກະຊວງ​ພະລັງງານ​ຂອງ​ອິນ​ໂດ​ເນ​ເຊຍ ເປີດເຜີຍ​ໃນ​ວັນ​ທີ 14 ກຸມພາ ຜ່ານມາ​ວ່າ:ອິນ​ໂດ​ເນ​ເຊຍ​ຄາດ​ວ່າ​ຈະດຳເນີນ​ໂຄງການ B40 ຊຶ່ງເປັນການໃຊ້ໄບໂອດີເຊລທີ່ມີສ່ວນປະສົມຂອງນໍ້າມັນປາມ 40% ໄດ້ຢ່າງເຕັນສ່ວນໃນເດືອນມີນາຈະມາເຖິງນີ້. ຫຼັງ​ຈາກ​ເກີດຄວາມ​ຊັກ​ຊ້າ​ໃນ​ຕົ້ນ​ປີ​​.

ຂ່າວລະບຸວ່າ: ອິນ​ໂດ​ເນ​ເຊຍ ວາງ​ແຜນ​ທີ່ຈະ​ເປີດ​ໂຄງການ​ໄບໂອດີເຊລB40 ຊຶ່ງມີສ່ວນປະສົມຂອງນໍ້າມັນປາມ 40% ຕັ້ງແຕ່​ວັນ​ທີ 1 ມັງກອນ 2025 ​ແຕ່​ປະ​ເຊີນກັບ​ຄວາມ​ຊັກ​ຊ້າ. ຍ້ອນ​ບັນ​ຫາດ້ານກົດ​ລະ​ບຽບ​ ເຮັດໃຫ້ຜູ້ຈໍາໜ່າຍນ້ໍາມັນມີໄລຍະເວລາຜ່ອນຜັນຈົນເຖິງທ້າຍເດືອນກຸມພາ ນີ້.