ຕະຫຼອດ 2 ປີເຄິ່ງຜ່ານມາ, ແຂວງອັດຕະປື ໄດ້ເອົາໃຈໃສ່ປັບປຸງ ແລະ ພັດທະນາການທ່ອງທ່ຽວຂອງແຂວງຢ່າງຕໍ່ເນື່ອງ ມີຈຸດສຸມເພື່ອສົ່ງເສີມການທ່ອງທ່ຽວທຳມະຊາດ, ວັດທະນະທຳ ແລະ ປະຫວັດສາດ ຕິດພັນກັບການທ່ອງທ່ຽວກະສິກຳຕາມທິດສີຂຽວ, ຍືນຍົງ ແລະ ມີສ່ວນຮ່ວມຂອງປະຊາຊົນໄດ້ 3 ແຫ່ງ (ເພີ່ມເປັນ 7 ແຫ່ງ) ຄື: ສວນອະນຸສາວະລີພະເຈົ້າໄຊຍະເຊດຖາທິຣາດ, ຕາດຈໍ ເມືອງຊານໄຊ ແລະ ຕາດຫົວຄົນ ເມືອງສາມັກຄີໄຊ; ສຳເລັດການຮັບຮອງແບບ ແລະ ແນວຄວາມຄິດພັດທະນາແຫຼ່ງທ່ອງທ່ຽວ (3 ແຫ່ງ); ຂຶ້ນແຜນຟື້ນຟູການທ່ອງທ່ຽວຂອງແຂວງ 2022-2025 ແລະ ສ້າງແຜນກິດຈະກຳພັດທະນາຜະລິດຕະພັນການທ່ອງທ່ຽວ ເພື່ອເຊື່ອມຕໍ່ກັບບັນດາແຂວງພາກໃຕ້ ແລະ ບັນດາແຂວງຂອງເຂດສາມຫຼ່ຽມພັດທະນາ CLV; ຊຸກຍູ້ຜູ້ປະກອບການຫົວໜ່ວຍທຸລະກິດຮ້ານອາຫານ, ໂຮງແຮມ, ເຮືອນພັກ ປັບປຸງຕົນເອງເພື່ອໃຫ້ໄດ້ມາດຕະຖານ ຊຶ່ງຫົວໜ່ວຍທຸລະກິດໄດ້ຮັບການຢັ້ງຢືນມາດຕະຖານ Lao Safe ໄດ້ 7 ຫົວໜ່ວຍ, ໃນນັ້ນ: ໂຮງແຮມ 5 ຫົວໜ່ວຍ, ຮ້ານອາຫານ 2 ຫົວໜ່ວຍ; ໄດ້ຊຸກຍູ້ສະມາຄົມທຸລະກິດທ່ອງທ່ຽວ ໄດ້ມີການເຄື່ອນໄຫວຕາມພາລະບົດບາດມີຄວາມເຂັ້ມແຂງດີຂຶ້ນເທື່ອລະກ້າວ.

ປັດຈຸບັນມີຫົວໜ່ວຍທຸລະກິດທັງໝົດໃນທົ່ວແຂວງ 142 ຫົວໜ່ວຍ, ໃນນັ້ນ: ມີໂຮງແຮມ 21 ຫົວໜ່ວຍ, ເຮືອນພັກ 26 ຫົວໜ່ວຍ, ບໍລິສັດທ່ອງທ່ຽວ 3 ຫົວໜ່ວຍ, ພັດທະຄານ 1 ຫົວໜ່ວຍ, ຮ້ານອາຫານ 41 ຫົວໜ່ວຍ, ຮ້ານກິນດື່ມ 47 ຫົວໜ່ວຍ ແລະ ຮ້ານບັນເທິງ 3 ຫົວໜ່ວຍ. ໃນໄລຍະ 2 ປີ 6 ເດືອນມີນັກທ່ອງທ່ຽວເຂົ້າມາທ່ຽວແຂວງທັງໝົດ 159.613 ເທື່ອຄົນ (ປີ 2021: 17.539 ເທື່ອຄົນ, ປີ 2022: 98.492 ເທື່ອຄົນ ແລະ 6 ເດືອນຕົ້ນປີ 2023: 43.582 ເທື່ອຄົນ) ເທົ່າກັບ 16% ຂອງແຜນການ (ແຜນການ 973.327 ເທື່ອຄົນ) ທຽບໃສ່ໄລຍະດຽວກັນຂອງແຜນ 5 ປີ ຄັ້ງທີ VIII ຫຼຸດລົງ 70.623 ເທື່ອຄົນ ເທົ່າກັບ 31%; ກະຈາຍລາຍໄດ້ເຂົ້າສູ່ເສດຖະກິດຂອງແຂວງ 60,88 ຕື້ກີບ (ປີ 2021: 6,21 ຕື້ກີບ, ປີ 2022: 35,54 ຕື້ກີບ ແລະ 6 ເດືອນຕົ້ນປີ 2023: 19,13 ຕື້ກີບ) ເທົ່າກັບ 17,4% ຂອງແຜນການ (ແຜນການ 350 ຕື້ກີບ). ຂ່າວ: ຕະວິນຍານ