ໃນວັນທີ 6 ພະຈິກ ຜ່ານມາ, ທ່ານ ກອງສີ ວົງສີ ເຈົ້າເມືອງປາກລາຍ ໄດ້ລົງຕິດຕາມການປູກໝາກໂມຂອງບໍລິສັດນໍ້າເຜິ້ງພັດທະນາກະສິກໍາ ທີ່ມາລົງທຶນປູກໝາກໂມຢູ່ບ້ານແສນພົນ ແລະ ບ້ານໃຫຍ່ພັດທະນາບວມເລົາ-ຜາແກ້ວ ເມືອງປາກລາຍ ແຂວງໄຊຍະບູລີ.
ໃນໂອກາດນີ້, ທ່ານ ວູ ຕົງເຊິນ ຫົວໜ້າບໍລິສັດ ນໍ້າເຜິ້ງພັດທະນາກະສິກໍາ ຈໍາກັດ ໄດ້ລາຍງານໃຫ້ຮູ້ວ່າ ບໍລິສັດໄດ້ເລີ່ມຕົ້ນລົງມືບຸກເບີກເນື້ອທີ່ມາແຕ່ຕົ້ນເດືອນຕຸລາ 2023 ເປັນຕົ້ນມາຮອດປັດຈຸບັນພວມກະກຽມດິນແປງໜານ ແລະ ປູກ, ການປູກໝາກໂມຂອງບໍລິສັດ ນໍ້າເຜິ້ງພັດທະນາກະສິກໍາ ມີເນື້ອທີ່ທັງໝົດ 200 ກວ່າເຮັກຕາ,ເນື້ອທີ່ດັ່ງກ່າວແມ່ນໄດ້ເຊົ່າທີ່ດິນຂອງປະຊາຊົນ ບ່ອນທີ່ມີເງື່ອນໄຂໃນໄລຍະເວລາ 4 ເດືອນ ຊຶ່ງບໍລິສັດເຊົ່າ 1 ເຮັກຕາ ຕໍ່ 9.500.000ກີບ ພາຍຫຼັງສຳເລັດການເກັບກູ້ໝາກໂມເຈົ້າຂອງທີ່ດິນກໍສາມາດປູກພືດຕາມລະດູປີຕາມຄວາມຕ້ອງການຂອງໃຜລາວ ນອກຈາກປະຊາຊົນໄດ້ຮັບເງິນຈາກການເຊົ່າທີ່ດິນແລ້ວຍັງເປັນການສ້າງວຽກເຮັດງານທຳໃຫ້ແກ່ປະຊາຊົນຊາວເມືອງປາກລາຍຕື່ມອີກ ໂດຍສະເພາະແມ່ນປະຊາຊົນທີ່ໄປເປັນແຮງງານໃນການປູກ ແລະ ບົວລະບັດຮັກສາໃຫ້ກັບບໍລິສັດແມ່ນຈະໄລ່ເປັນມື້ລະ120.000 ກີບຕໍ່ຄົນຕໍ່ມື້ ຫຼື 3.600.000-4.000.000ກີບຕໍ່ຄົນຕໍ່ເດືອນ. ນອກຈາກນີ້ບໍລິສັດຍັງໄດ້ປັບປຸງ ແລະ ພັດທະນາພື້ນຖານໂຄງລ່າງທີ່ໂຄງການຕັ້ງຢູ່ໂດຍສະເພາະ ປັບປຸງເສັ້ນທາງເຂົ້າບ້ານ ຫາບ່ອນທໍາການຜະລິດ, ເຈາະນໍ້າບາດານ ແລະ ດຶງຕາຂ່າຍໄຟຟ້າເຂົ້າໃນເຂດການຜະລິດ ເຮັດໃຫ້ເຂດດັ່ງກ່າວມີຄວາມສະດວກໃນການຂົນສົ່ງຜົນລິດຂອງພໍ່ແມ່ປະຊາຊົນກໍຄືບໍລິສັດໄດ້ຢ່າງສະດວກຂຶ້ນ ຊຶ່ງລວມມູນຄ່າ3ຮ້ອຍກວ່າລ້ານກີບ ທ່ານຫົວໜ້າບໍລິສັດກ່າວຕື່ມອີກວ່າ: ສໍາລັບການປູກໝາກໂມຂອງບໍລິສັດໃນເຂດດັ່ງກ່າວອາດບໍ່ບັນລຸຕາມແຜນການ ສາເຫດທີ່ປູກບໍ່ໄດ້ຕາມແຜນການ ຍ້ອນວ່າປະຊາຊົນຈໍານວນໜຶ່ງພາຍໃນບ້ານບໍ່ເຂົ້າໃຈ ຈຶ່ງບໍ່ໃຫ້ເຊົ່າດິນ ແລະ ເຊື່ອວ່າໃນປີຕໍ່ໄປປະຊາຊົນເຫັນໄດ້ຄຸນຄ່າຂອງດິນຫຼາຍຍິ່ງຂຶ້ນແລ້ວກໍຈະໃຫ້ການຮ່ວມມືເປັນຢ່າງດີແນ່ນອນ.
ຂ່າວ-ພາບ: ກ່າ ຄຸດທະວົງສັກ