ໜັງສືພິມ ປະຊາຊົນ

ຍ້ອນມີພັກນຳພາ ສະມາຄົມລົດຕູ້ຈຶ່ງໄດ້ຮັບການສ້າງຕັ້ງ ແລະ ເຕີບໃຫຍ່ຂຶ້ນ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 30/03/2020 09:00:11 ຈຳນວນຢ້ຽມຊົມ 6214 ຄັ້ງ

   ພັກປະຊາຊົນ ປະຕິວັດລາວ ໄດ້ນໍາພາປະຊາຊົນລາວ ບັນດາເຜົ່າ ໃນການພັດທະນາ ເສດຖະກິດ-ສັງຄົມຂະຫຍາຍ ຕົວຢ່າງຕໍ່ເນື່ອງ ຕາມທິດຫັນ ເປັນອຸດສາຫະກໍາທັນສະໄໝ, ເສດຖະກິດພູມປັນຍາໄດ້ມີການ ຂະຫຍາຍຕົວ ເຮັດໃຫ້ ປະເທດຊາດ ມີບາດກ້າວຂະ ຫຍາຍຕົວໃໝ່ຕາມທິດຍືນຍົງ, ທີ່ຕັ້ງ, ບົດບາດອິດທິພົນຂອງປະເທດຊາດ ໄດ້ຮັບການເຊີດຊູສູງຂຶ້ນ ໃນເວທີສາກົນແລະພາກພື້ນ.
   ໃນໂອກາດສະເຫຼີມສະ ຫຼອງວັນສ້າງຕັ້ງ ພັກ ປປ ລາວ ຄົບຮອບ 65 ປີ (22 ມີນາ 1955 -22 ມີນາ 2020) ທ່ານ ບຸນຄໍ້າ ລາດຊະວົງ ປະທານສະມາຄົມລົດຕູ້ ຂົນສົ່ງໂດຍສານ-ໃຫ້ເຊົ່າ-ເໝົາ ພະແນກໂຍທາທິການຂົນສົ່ງນະຄອນຫຼວງວຽງຈັນໄດ້ໃຫ້ສໍາພາດວ່າ: ຍ້ອນມີພັກນໍາພາສະມາຄົມລົດຕູ້ຈຶ່ງໄດ້ຮັບການສ້າງຕັ້ງຂຶ້ນ, ເລີ່ມທໍາອິດ ເຕົ້າໂຮມຢູ່ທີ່ຂົວມິດຕະພາບ ລາວ-ໄທແຫ່ງທີ 1 ອັນໄດ້ແຍກຕົວມາຈາກລົດຕຸກໆ, ລົດຈໍາໂບ້, ລົດແທັກຊີ; ຈາກນັ້ນ ກໍຄ່ອຍໆເພີ່ມຂຶ້ນ ຊຶ່ງເລີ່ມຕັ້ງ ແຕ່ປີ   2002 ເປັນຕົ້ນມາ, ມາເຖິງປີ 2008 - 2009, ມາເຖິງປັດຈຸບັນ ມີລົດຕູ້ຫຼາຍກວ່າ 260 ຄັນ ລົດທີ່ດໍາເນີນກິດຈະການຖືກຕ້ອງຕາມລະບຽບຂອງສະມາຄົມ ແມ່ນຕ້ອງໄດ້ລົງທະບຽນກັບສະມາຄົມ ແລະ ປະຕິບັດຕາມລະບຽບຂອງສະມາຄົມເທົ່ານັ້ນ. ຈາກນັ້ນມາ,ສະມາຄົມ ໄດ້ຮັບແຈ້ງການຈາກພະແນກ ຍທຂ ຢາກໃຫ້ມີການປັບປ່ຽນລົດຈາກລົດທີ່ເກົ່າແກ່ແດ່ ຂຶ້ນມາເປັນລົດໃໝ່ໆ ຕາມຈັ່ງຫວະການຂະຫຍາຍຕົວຂອງສັງຄົມ. ປັດຈຸບັນ, ລົດທີ່ນໍາໃຊ້ເຂົ້າໃນການບໍລິການແຂກພາຍໃນ- ຕ່າງປະເທດ ຈໍານວນຫຼາຍ ແມ່ນລົດຕູ້ແອັກວ້ານ, ລົດໂຕໂຢຕ້າ. ຍ້ອນພັກ-ລັດໃຫ້ການຊີ້ນໍາ-ນໍາພາສະມາຄົມ ຈຶ່ງໄດ້ພັດທະນາ ແລະ ເຕີບໃຫຍ່ຂະຫຍາຍຕົວຂຶ້ນເລື້ອຍໆ ຕາມທິດຫັນເປັນທັນສະໄໝເທື່ອລະກ້າວ ສະແດງອອກ ບັນດາສະມາຊິກທີ່ຂຶ້ນກັບສະມາຄົມ ຊີວິດການເປັນຢູ່ຂອງເຂົາເຈົ້ານັບມື້ນັບດີຂຶ້ນ ສັງເກດໄດ້ຈາກການປັບປ່ຽນລົດ ຈາກລົດທີ່ເກົ່າແກ່ ກ້າວໄປສູ່ລົດທີ່ດີ ແລະ ງາມ ເພື່ອສ້າງໃຫ້ບັນດາລູກຄ້າມີຄວາມເຊື່ອໝັ້ນ,ເພິ່ງພໍໃຈໃນການໃຫ້ບໍລິການຂອງສະມາຄົມ.
   ປະທານສະມາຄົມກ່າວ ຕື່ມວ່າ: ລົດທີ່ເຂົ້າຮ່ວມສະມາ ຄົມແມ່ນໄດ້ຜ່ານການກວດ ກາ ແລະ ຖືກຕ້ອງຢ່າງຄົບຖ້ວນແລ້ວ ພ້ອມທັງມີກ້ອງວົງຈອນປິດ ເພື່ອປ້ອງກັນການບໍລິການທີ່ດີກັບລູກຄ້າ ແລະ ຮັບປະກັນສໍາລັບຜູ້ໃຫ້ບໍລິການອີກດ້ວຍ, ຈະສັງເກດໄດ້ ຈາກການຕິດສະຕິກເກີ ທາດຫຼວງ 2020 ຊຶ່ງແຕ່ລະປີ ແມ່ນໄດ້ມີການປ່ຽນໂຕເລກຂອງປີເທົ່ານັ້ນ ສ່ວນສະຕິກເກີ ແມ່ນຄືເກົ່າ. ລົດທີ່ປະຈໍາຢູ່ຂົວມິດຕະພາບມີ 180 ຄັນ ໃນນັ້ນກໍພ້ອມບໍລິການຄອຍຮັບທີ່ຈຸດເສັ້ນທາງລົດໄຟທ່ານາແລ້ງ, ປະຈໍາທາງລົດໄຟມີພຽງ 5 ຄັນ ລູກຄ້າສ່ວນຫຼາຍແມ່ນກຸ່ມນັກທ່ອງທ່ຽວຄົນໄທ, ປະຈໍາຢູ່ສະໜາມບິນວັດໄຕ 32 ຄັນ ລູກຄ້າແມ່ນນັກທ່ອງທ່ຽວມາຈາກ ສ.ເກົາຫຼີ - ສປ ຈີນ ໃນນັ້ນບໍລິການຢູ່ທາງເຂດ ໜອງດາພ້ອມ, ຄິວລົດສາຍ ເໜືອ ມີຈໍານວນ 15 ຄັນ ແລະ ສ່ວນໜຶ່ງ ບໍລິການຢູ່ຕາມໂຮງ ແຮມ, ສາທາລະນະທົ່ວໆໄປ. ປັດຈຸບັນ, ລູກຄ້າຈໍານວນໜຶ່ງກໍແມ່ນຄົນລາວດ້ວຍກັນ ໝາຍຄວາມວ່າ ລາວທ່ຽວລາວກໍນັບມຶ້ນັບຫຼາຍຂຶ້ນ; ປະທານຍັງກ່າວຕື່ມອີກວ່າ: ການເຮັດໜ້າທີ່ສະມາຄົມດັ່ງກ່າວ, ແມ່ນບໍ່ມີເງິນເດືອນ ແຕ່ເປັນຫຍັງຈຶ່ງເຮັດ ຍ້ອນວ່າ ເມື່ອພັກ-ລັດມີຄວາມຕ້ອງການ ບວກກັບ ຕົນເອງເຄີຍເຮັດວຽກງານຂັບລົດບໍລິການລູກຄ້າມາກ່ອນ ຈຸດປະສົງ ແມ່ນຢາກຊ່ວຍພັດທະນາເລື່ອງການທ່ອງທ່ຽວ-ບໍລິການຊ່ວຍເຫຼືອສັງຄົມ ຄືກັບປະເທດອື່ນໆ ໃຫ້ນັບມື້ນັບດີຂຶ້ນ ແລະ ມີຄວາມເປັນລະບຽບຮຽບຮ້ອຍ. ປັດຈຸບັນ ແລະ ໃນອະນາຄົດໃກ້ໆນີ້ ສະມາຄົມ ແມ່ນໄດ້ຮ່ວມມືກັບພາກເອກະຊົນ ພັດທະນາ ການໃຫ້ບໍລິການ ຊຶ່ງຈະພະຍາຍາມຄິດໄລ່ເປັນກິໂລແມັດ ເພື່ອໃຫ້ລູກຄ້າມີຄວາມເພິ່ງພໍໃຈຕໍ່ກັບການບໍລິ ການຂອງສະມາຄົມຕື່ມອີກ.

ຂ່າວທີ່ໄດ້ຮັບຄວາມນິຍົມ