ໜັງສືພິມ ປະຊາຊົນ

ເສີມຂະຫຍາຍມູນເຊື້ອ 12 ຕຸລາ ມະຫາໄຊ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 13/10/2020 09:01:55 ຈຳນວນຢ້ຽມຊົມ 5508 ຄັ້ງ

ວັນທີ 12 ຕຸລາ ແມ່ນວັນປະກາດເອກະລາດ ຊຶ່ງປີນີ້ໄດ້ໝູນວຽນມາບັນຈົບຄົບຮອບ 75 ປີ.
ການປະກາດເອກະລາດ ວັນທີ 12 ຕຸລາ 1945, ໄດ້ເຮັດໃຫ້ຊາວໂລກຮັບຮູ້ກ່ຽວກັບຄວາມເປັນຊາດລາວຂອງພວກເຮົາ, ຮັບຮູ້ອະທິປະໄຕ ແລະ ເຂດນ້ຳແດນດິນຂອງລາວ. ພ້ອມນັ້ນ, ກໍຮັບຮູ້ລັດຖະບານຊົ່ວຄາວຂອງລາວ ແລະ ຮັບຮູ້ວ່າ ຊາດລາວ-ຄົນລາວ ກໍເປັນຄົນທີ່ມີກຽດສັກສີເໝືອນຄົນຊາດອື່ນໆ ແລະ ຢາກມີອິດສະຫຼະພາບ, ເປັນເຈົ້າຊາຕາກຳຂອງຕົນເອງ, ຢາກມີການພັດທະນາຕົນ ເພື່ອຄວາມຢູ່ດີກິນດີ ແລະ ຄວາມຈະເລີນວັດທະນາຖາວອນ. ຍ້ອນແນວນັ້ນ, ພວກເຮົາ ຈຶ່ງຖືເອົາວັນປະກາດເອກະລາດ 12 ຕຸລາ 1945 ເປັນວັນປະຫວັດສາດຂອງຊາດ, ເປັນວັນແຫ່ງຄວາມເອກອ້າງທະນົງໃຈຕໍ່ຄວາມອາດຫານໃນການຕໍ່ສູ້ດ້ວຍຄໍາຂວັນ; “ຍອມຕາຍດີກວ່າເປັນຂ້ອຍຂ້າ, ຕາຍເພື່ອເອກະລາດດີກວ່າຢູ່ພາຍໃຕ້ແອກປົກຄອງຂອງຕ່າງຊາດ”. ຈາກນັ້ນມາ ນ້ຳໃຈວັນທີ 12 ຕຸລາ ຈຶ່ງກາຍເປັນມູນ ເຊື້ອແຫ່ງການຕໍ່ສູ້ຢ່າງມີໄຊຂອງຄົນລາວຜູ້ຮັກຊາດ, ຮັກບ້ານ ເກີດເມືອງນອນ ພາຍໃຕ້ການນຳພາອັນສະຫຼາດສ່ອງໃສຂອງ ພັກ, ສາມາດປົດປ່ອຍປະເທດຊາດໄດ້ຢ່າງສົມບູນ ແລະ ສະຖາປະນາເປັນສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975.
ກ່ອນໜ້ານີ້ 70 ກວ່າປີຄື: ວັນທີ 12 ຕຸລາ 1945 ໄດ້ມີການໂຮມຊຸມນຸມໃຫຍ່ຢູ່ວຽງຈັນ ເພື່ອປະກາດຄວາມເປັນເອກະລາດຂອງຊາດລາວເຮົາ ເປັນຄັ້ງທຳອິດຈາກແອກປົກຄອງຂອງພວກລ່າເມືອງຂຶ້ນ ແລະ ພວກຮຸກຮານຕ່າງຊາດ. ວັນດັ່ງກ່າວນັ້ນ, ໄດ້ເປັນຂີດໝາຍແຫ່ງໄຊຊະນະຂອງການຕໍ່ສູ້ຢ່າງພິລະອາດຫານ ດ້ວຍຄວາມສາມັກຄີ ແລະ ການເສຍສະຫຼະອັນໃຫຍ່ຫຼວງຂອງກອງທັບ ແລະ ປະຊາຊົນລາວບັນດາເຜົ່າ ພາຍໃຕ້ການນຳພາຂອງພັກ ປປ ລາວ.
ວັນທີ 12 ຕຸລາ 1945 ໄດ້ກາຍເປັນເຫດການທີ່ມີຄວາມໝາຍປະຫວັດສາດຂອງຊາດລາວເຮົາ. ໃນມື້ນັ້ນ ໄດ້ມີການໂຮມຊຸມນຸມທີ່ສະໜາມກິລາແຫ່ງຊາດ (ສະໜາມກິລາເຈົ້າອານຸວົງ ໃນປັດຈຸບັນ) ຊຶ່ງມີມວນຊົນເຂົ້າຮ່ວມຫຼາຍກວ່າ 2 ໝື່ນຄົນ. ໃນມື້ດັ່ງກ່າວ ລັດຖະບານລາວອິດສະຫຼະ ໄດ້ເປັນຕົວແທນໃຫ້ແກ່ວົງຄະນາຍາດແຫ່ງຊາດ ປະກາດຄວາມເປັນເອກະລາດຂອງປະເທດລາວຕໍ່ໂລກຢ່າງເປັນທາງການ, ປະກາດໂຮມແຜ່ນດິນລາວເປັນເອກະລາດ. ພ້ອມກັນນັ້ນ, ກໍໄດ້ອອກຖະແຫຼງການກ່ຽວກັບການປ່ຽນແປງການປົກຄອງ, ລຶບລ້າງທຸກໆສັນຍາທີ່ລາວໄດ້ເຊັນກັບພວກລ່າເມືອງຂຶ້ນແບບເກົ່າ, ປະກາດໃຊ້ລັດຖະທຳມະນູນສະບັບທຳອິດ, ປະກາດໃຊ້ທຸງຊາດ (ທຸງຊາດລາວປັດຈຸບັນ), ປະກາດແຕ່ງຕັ້ງຄະນະລັດຖະບານຊົ່ວຄາວ ຊຶ່ງມີສົມເດັດ ສຸພານຸວົງ ເປັນລັດຖະມົນຕີວ່າການກະຊວງການຕ່າງປະເທດ ແລະ ຕໍ່ມາໄດ້ມາດຳລົງຕຳແໜ່ງເປັນຜູ້ບັນຊາການທະຫານສູງສຸດອີກດ້ວຍ.
ເພື່ອສືບຕໍ່ເສີມຂະຫຍາຍມູນເຊື້ອ 12 ຕຸລາ ມະຫາໄຊ, ຄະ ນະພັກ-ຄະນະນຳທຸກຂັ້ນ ຕ້ອງເອົາໃຈໃສ່ໂຄສະນາສຶກສາອົບ ຮົມການເມືອງ-ແນວຄິດຂອງພະນັກງານ, ສະມາຊິກພັກ ແລະ ປະຊາຊົນບັນດາຊັ້ນຄົນທີ່ຂຶ້ນກັບການນຳພາ-ຄຸ້ມຄອງຂອງຕົນ ເຊີດຊູນ້ຳໃຈຮັກຊາດຕິດພັນກັບການຊຸກຍູ້ການພັດທະນາໃຫ້ດຳເນີນໄປຢ່າງຕັ້ງໜ້າ ແລະ ເປັນຂະບວນການຕໍ່ເນື່ອງຄື: ການຮຽນ, ຄົ້ນຄວ້າເຊື່ອມຊຶມມະຕິກອງປະຊຸມໃຫຍ່ຂອງພັກໃຫ້ເລິກເຊິ່ງ-ທົ່ວເຖິງທຸກເປົ້າໝາຍ, ຫັນຄວາມຮັບຮູ້-ເຂົ້າໃຈໃຫ້ກາຍເປັນການກະທຳຕົວຈິງໂດຍສະເພາະການຜັນຂະຫຍາຍເປັນແຜນງານ-ເປັນໂຄງການເຄື່ອນໄຫວລະອຽດ ສຳລັບແຕ່ລະໄລຍະ ໂດຍແມ່ນຄະນະພັກນຳພາ-ຊີ້ນຳ ເຮັດໃຫ້ສອດຄ່ອງກັບໜ້າທີ່ການເມືອງ ແລະ ໜ້າທີ່ວິຊາສະເພາະຂອງແຕ່ລະກົມກອງ, ຂະແໜງການ-ໜ່ວຍງານ, ທັງມີການແບ່ງງານມອບໝາຍຄວາມຮັບຜິດຊອບຈັດຕັ້ງປະຕິບັດໃຫ້ຈະແຈ້ງ. ເພີ່ມທະວີຄວາມສາມັກຄີປອງດອງຂອງປະຊາຊົນລາວບັນດາເຜົ່າ ພາຍໃຕ້ການນຳພາຂອງພັກ, ເອົາໃຈໃສ່ຈຳກັດ ແລະ ແກ້ໄຂປະກົດການຫຍໍ້ທໍ້ຕ່າງໆໃນສັງຄົມ, ສ້າງບັນຍາກາດເບີກບານມ່ວນຊື່ນ, ເຮັດໃຫ້ປະເທດຊາດມີຄວາມສະຫງົບປອດໄພ, ມີຄວາມເປັນລະບຽບຮຽບຮ້ອຍ, ເປັນປະເທດທີ່ໜ້າທ່ຽວໜ້າຊົມ. ເອົາໃຈໃສ່ວຽກງານກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານ ເປັນຕົ້ນແມ່ນໃຫ້ສະຫຼຸບຕີລາຄາຢ່າງຖືກຕ້ອງ, ຊອກໃຫ້ເຫັນຕົວແບບດີເດັ່ນ ແລະ ປັດໄຈໃໝ່ ເພື່ອເສີມຂະຫຍາຍ, ຄົ້ນຄວ້າໃຫ້ເລິກເຊິ່ງກ່ຽວກັບທິດທາງ ແລະ ມາດຕະການ ເພື່ອສ້າງແຂວງໃຫ້ເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ. ເພີ່ມທະວີເອົາໃຈໃສ່ຕໍ່ການຄຸ້ມຄອງເສດຖະກິດ-ຄຸ້ມຄອງສັງຄົມ ໂດຍສະເພາະແມ່ນການຄຸ້ມຄອງຕະຫຼາດໃນໄລຍະວິກິດໂຄວິດ-19, ບໍ່ໃຫ້ມີການຂາດແຄນສິນຄ້າອັນຈຳເປັນ ແລະ ບໍ່ໃຫ້ມີການປັ່ນປ່ວນ, ເພີ່ມທະວີການຄຸ້ມຄອງລາຄາສິນຄ້າ ແລະ ຄ່າບໍລິການ ເພື່ອບໍ່ໃຫ້ມີການສວຍໂອກາດກອບໂກຍກຳໄລ; ຮັບປະກັນໃຫ້ຄ່າຄອງຊີບ ແລະ ຊີວິດການເປັນຢູ່ຂອງພະນັກງານ, ທະຫານ, ຕຳຫຼວດ ແລະ ພໍ່ແມ່ປະຊາຊົນເປັນປົກກະຕິ. ເພີ່ມທະວີຄວາມສັກສິດໃນການຄຸ້ມຄອງສັງຄົມຕາມລະບຽບກົດໝາຍ, ຊຸກຍູ້ວຽກງານການສຶກສາ, ສາທາລະນະສຸກ ແລະ ການປະຕິບັດນະ ໂຍບາຍຕໍ່ຜູ້ທີ່ມີຄຸນງາມຄວາມດີຕໍ່ປະເທດຊາດ ແລະ ການປະ ຕິວັດ; ເສີມສ້າງຄວາມເປັນທຳ ແລະ ຄຸນນະທຳໃນສັງຄົມ. ປະ ຕິບັດແນວທາງການຕ່າງປະເທດ ສັນຕິພາບ, ເອກະລາດ, ມິດ ຕະພາບ ແລະ ຮ່ວມມືຢ່າງຕັ້ງໜ້າ; ເສີມຂະຫຍາຍຄວາມຮັບ ຜິດຊອບ ແລະ ຄວາມເປັນເຈົ້າການໃຫ້ສູງຂຶ້ນ ໃນການພົວພັນຮ່ວມມືກັບບັນດາປະເທດເພື່ອນມິດຍຸດທະສາດ, ບັນດາປະເທດອາຊຽນ, ປະເທດເພື່ອນມິດ ແລະ ອົງການຈັດຕັ້ງສາກົນ.
ນ້ຳໃຈວັນປະກາດເອກະລາດ 12 ຕຸລາ ໝັ້ນຍືນ!

(ໂດຍ: ສີວັນ)

ຂ່າວທີ່ໄດ້ຮັບຄວາມນິຍົມ