ໜັງສືພິມ ປະຊາຊົນ

ສປປ ລາວ ຢຶດໝັ້ນສົ່ງເສີມການລົງທຶນຕ່າງປະເທດ ເພື່ອປະກອບສ່ວນພັດທະນາປະເທດຊາດ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 26/10/2020 15:29:12 ຈຳນວນຢ້ຽມຊົມ 5359 ຄັ້ງ

ໂດຍ: ລູກເຂົ້າໜຽວ

ພັກ ແລະ ລັດຖະບານແຫ່ງ ສປປ ລາວ ຍາມໃດກໍຢຶດ ໝັ້ນການສົ່ງເສີມການລົງທຶນຂອງຕ່າງປະເທດ ໂດຍມີກົດ ໝາຍວ່າດ້ວຍການສົ່ງເສີມການລົງທຶນຕ່າງປະເທດເປັນສິ່ງຄ້ຳປະກັນ, ແນໃສ່ເສີມຂະຫຍາຍການພົວພັນ, ການຮ່ວມມືທາງດ້ານເສດຖະກິດກັບຕ່າງປະເທດ, ການນຳໃຊ້ແຫຼ່ງທຶນ, ສະຕິປັນຍາເພື່ອຂະຫຍາຍກຳລັງການຜະລິດຢ່າງມີປະສິດທິຜົນ, ຮັບໃຊ້ການຫັນເປັນອຸດສາຫະກຳ ແລະ ການຫັນເປັນທັນສະໄໝເທື່ອລະກ້າວ, ປະກອບສ່ວນເຂົ້າໃນການແກ້ໄຂຊີວິດການເປັນຢູ່ຂອງປະຊາຊົນໃຫ້ດີຂຶ້ນ ແລະ ສ້າງສາປະເທດຊາດໃຫ້ຮັ່ງມີເຂັ້ມແຂງ. ເວົ້າສະເພາະການສົ່ງເສີມການລົງທຶນຂອງຕ່າງປະເທດໃນຂົງເຂດກະສິກຳຈຸດປະສົງແມ່ນໃຫ້ຕ່າງປະເທດນຳໃຊ້ເງິນທຶນ, ພາຫະນະ, ເຕັກນິກ ແລະ ວິຊາການລົງທຶນເຂົ້າໃສ່ການດຳເນີນກິດຈະການປູກພືດກະສິກຳທີ່ຕິດພັນກັບການເຊົ່າ ຫຼື ສຳປະທານທີ່ດິນຈາກລັດ ຫຼື ເຊົ່າທີ່ດິນຈາກພົນລະເມືອງລາວຢ່າງຖືກຕ້ອງຕາມກົດໝາຍແຫ່ງສປປ ລາວ.
ດ້ວຍຜົນສຳເລັດໃນການ ສົ່ງເສີມການລົງທຶນຂອງຕ່າງ ປະເທດໄດ້ປະກອບສ່ວນເຮັດ ໃຫ້ການພັດທະນາເສດຖະກິດ-ສັງຄົມຂອງປະເທດເຮົາຂະຫຍາຍຕົວ, ຄືໄລຍະປີ 2001-2015 ເສດຖະກິດແຫ່ງຊາດ GDP ໄດ້ຂະຫຍາຍ ຕົວດ້ວຍຈັງຫວະໄວ ແລະ ຕໍ່ເນື່ອງສະເລ່ຍ 7,4% ຕໍ່ປີ, ໂຄງປະກອບເສດຖະກິດໄດ້ ກ້າວໄປຕາມທິດຫັນເປັນອຸດ ສາຫະກຳ ແລະ ທັນສະໄໝ. ສະເພາະໄລຍະ 5 ປີ ແຕ່ 2011-2015 ເສດຖະກິດຂະຫຍາຍຕົວດ້ວຍຈັງຫວະສະເລ່ຍ 7,9% ຕໍ່ປີ. ການລົງທຶນທັງໝົດທົ່ວສັງຄົມບັນລຸສູງກວ່າ 236 ພັນຕື້ກີບ, ລື່ນຄາດໝາຍທີ່ກຳນົດໄວ້.
ຈາກການລົງທຶນຕ່າງປະ ເທດໃນຂົງເຂດກະສິກຳໄດ້ປະກອບສ່ວນເຮັດໃຫ້ຜົນຜະລິດດ້ານກະສິກຳຂອງປະເທດເຮົາມີຈຳນວນເພີ່ມຂຶ້ນໃນແຕ່ລະປີ, ສາມາດຕອບສະໜອງໄດ້ຄວາມຕ້ອງການຊົມໃຊ້ພາຍໃນປະເທດ ແລະມີຈຳນວນສົ່ງອອກຂາຍຕ່າງ ປະເທດນັບມື້ນັບຫຼາຍຂຶ້ນ.ທ່ານ ອາໂນສັກ ແພງທິມມະວົງ ຮອງຫົວໜ້າກົມແຜນການແລະ ການເງິນ ກະຊວງກະ ສິກຳ ແລະ ປ່າໄມ້ ໄດ້ກ່າວໄວ້ວ່າ: ການລົງທຶນຂອງພາຍໃນ ແລະ ຕ່າງປະເທດ ມີສ່ວນ ປະກອບສຳຄັນເຮັດໃຫ້ປະເທດພວກເຮົາສາມາດຮັບປະກັນໄດ້ຜົນຜະລິດທາງດ້ານສະບຽງອາຫານຢ່າງພຽງພໍກັບຄວາມຕ້ອງການພາຍໃນ ແລະ ມີສິນຄ້າສົ່ງອອກຈຳນວນໜຶ່ງ, ເສີມຂະຫຍາຍໄດ້ທ່າແຮງການຜະລິດສິນຄ້າກະສິກຳຕາມທິດທີ່ມີຄຸນນະພາບ, ສີຂຽວ ແລະ ຍືນຍົງ, ທັງຖືເອົາການປົກປັກຮັກສາສິ່ງແວດລ້ອມເປັນສິ່ງຈຳເປັນ ໂດຍມີການຄຸ້ມຄອງ ແລະ ນຳໃຊ້ຊັບພະຍາກອນທຳມະຊາດຢ່າງມີປະສິດທິຜົນ, ກໍ່ສ້າງໃຫ້ມີການຫັນປ່ຽນຮູບແບບການພັດທະນາຕາມທິດເສີມຂະຫຍາຍທ່າແຮງບົ່ມຊ້ອນ ແລະ ຂໍ້ໄດ້ປຽບຂອງປະເທດເຮົາ. ພ້ອມນັ້ນກໍເຂົ້າຮ່ວມໃນການເຊື່ອມໂຍງກັບພາກພື້ນ ແລະ ສາກົນຢ່າງເປັນເຈົ້າການ ແລະ ໄດ້ຫັນວຽກງານກະສິກຳໄປສູ່ຄວາມທັນສະໄໝໃຫ້ຫຼາຍຂຶ້ນກວ່າເກົ່າ, ມາຮອດປັດຈຸບັນການລົງທຶນຂອງເອກະຊົນພາຍໃນ ແລະຕ່າງປະເທດໃນຂົງເຂດກະສິກຳແລະ ປ່າໄມ້ ໃນຂອບເຂດທົ່ວປະເທດເຮົາແມ່ນລວມມີທັງໝົດ 1.562 ບໍລິສັດ, ດ້ວຍມູນຄ່າການລົງທຶນທັງໝົດ 4,2 ຕື້ໂດລາ, (ທຶນຈົດທະບຽນ 2,6 ຕື້ໂດລາ) ໃນເນື້ອທີ່ດິນສຳປະທານທັງໝົດ 208.000 ກວ່າເຮັກຕາ. ໃນນັ້ນເປັນການລົງທຶນຂອງຕ່າງປະເທດໃນທຸລະກິດກະສິກຳມີ 515 ບໍລິສັດ ດ້ວຍທຶນທັງໝົດ 2,2 ຕື້ໂດລາ (ທຶນຈົດທະບຽນ 876,2 ລ້ານໂດລາ). ປະເທດທີ່ມາລົງທຶນແມ່ນມາຈາກສະຫະພາບເອີຣົບ, ຈີນ, ຫວຽດນາມ, ໄທ, ຍີ່ປຸ່ນ, ມາເລເຊຍ, ອິນໂດເນເຊຍ, ສ ເກົາຫຼີ, ຝຣັ່ງ... ໃນນັ້ນສປ ຈີນ ເປັນອັນດັບໜຶ່ງໃນການລົງທຶນດ້ານກະສິກຳຢູ່ປະເທດເຮົາ, ຈຳນວນ 239 ບໍລິສັດ, ມີມູນຄ່າການລົງທຶນທັງໝົດ 589 ລ້ານໂດລາ. ສະເພາະປີ 2020 ສິນຄ້າສົ່ງອອກຂາຍຕ່າງປະເທດອັນດັບທີໜຶ່ງແມ່ນອ້ອຍ ບັນລຸສົ່ງອອກຂາຍໃຫ້ສປ ຈີນ 300.000 ໂຕນ, ຖັດມາແມ່ນມັນຕົ້ນ, ສາລີ, ກ້ວຍ, ໝາກໂມ, ມັນດ້າງ, ຕະກຸນຖົ່ວ ແລະ ພືດຜັກຊະນິດອື່ນໆ. ສະເພາະເຂົ້າສານຕາມແຜນຈະສົ່ງຂາຍໃຫ້ ສປ ຈີນ 50.000 ໂຕນ, ມາຮອດປັດຈຸບັນໄດ້ສົ່ງຂາຍອອກໄປແລ້ວ 15.000 ໂຕນ ແລະ ປັດຈຸບັນກຳລັງກະ ກຽມສືບຕໍ່ສົ່ງໃຫ້ສຳເລັດຕາມແຜນການທີ່ໄດ້ກຳນົດໄວ້. ໂດຍລວມການລົງທຶນໃນຂະແໜງກະສິກຳໄດ້ປະກອບສ່ວນໃຫ້ແກ່ການພັດທະນາເສດຖະກິດ-ສັງຄົມຢູ່ປະເທດເຮົາໃຫ້ມີການຂະຫຍາຍຕົວຢ່າງຕໍ່ເນື່ອງ. ນອກນັ້ນການລົງທຶນຂອງຜູ້ປະກອບການທັງພາຍໃນ ແລະຕ່າງປະເທດໄດ້ສ້າງວຽກເຮັດງານທຳໃຫ້ແກ່ປະຊາຊົນໃນເຂດຊົນນະບົດ, ເພີ່ມລາຍຮັບໃຫ້ແກ່ຄອບຄົວ, ແກ້ໄຂໄດ້ຊີວິດການເປັນຢູ່ໃຫ້ດີຂຶ້ນເປັນກ້າວໆ.
ຢ່າງໃດກໍຕາມ, ເຖິງຈະມີຜົນສຳເລັດ, ແຕ່ທຽບໃສ່ແຜນຍຸດທະສາດ, ການພັດທະນາຂອງປະເທດເຮົາກໍຍັງມີຂໍ້ຈຳກັດຫຼາຍດ້ານ, ດັ່ງກອງປະຊຸມຄົບຄະນະຄັ້ງທີ 10 ຂອງຄະນະບໍລິຫານງານສູນກາງພັກສະໄໝທີ X ໄດ້ຕີລາຄາວ່າ: ການພັດທະນາດ້ານກະສິກຳບາງດ້ານຍັງມີຄວາມຊັກຊ້າ, ບໍ່ເປັນລະບົບຄົບຊຸດ, ເຖິງວ່າ ໄດ້ຮັບການປັບປຸງ ແລະ ປະຕິບັດນິຕິກຳຕິດພັນກັບການຫັນເປັນທັນສະໄໝ… ແຕ່ການຈັດຕັ້ງຜັນຂະຫຍາຍຍັງບໍ່ທັນເອົາໃຈໃສ່ຢ່າງຈິງຈັງ, ກວ້າງຂວາງ ແລະ ເຂັ້ມງວດ. ການຊຸກຍູ້ການຜະລິດ ແລະ ການປຸງແຕ່ງເປັນສິນຄ້າຍັງບໍ່ທັນແຂງແຮງບວກກັບການລະບາດຂອງພະຍາດໂຄວິດ-19, ການປ່ຽນແປງຂອງດິນຟ້າອາກາດ ແລະ ຄວາມອ່ອນນ້ອຍຂອງພື້ນຖານການຜະລິດເຮັດໃຫ້ໂຕເລກແຕ່ລະດ້ານໃນໄຕມາດທຳອິດຂອງແຜນການປີ 2020 ສ່ວນຫຼາຍຫຼຸດຄາດໝາຍ.
ເພື່ອແກ້ໄຂບັນຫາສິ່ງຫຍໍ້ທໍ້ ແລະ ເຮັດໃຫ້ການຈັດຕັ້ງປະຕິບັດມາດຕະການຕ່າງໆໄດ້ດຳເນີນໄປຢ່າງໜັກແໜ້ນ ແລະ ຖືກຕ້ອງຕາມທິດທີ່ກຳນົດໄວ້, ບັນຫາໜຶ່ງທີ່ສຳຄັນກໍແມ່ນການສືບຕໍ່ຍູ້ແຮງການປະຕິບັດມາດຕະການກະຕຸ້ນເສດຖະກິດໂດຍສຸມໃສ່ຟື້ນຟູການຜະລິດ, ທຸລະກິດທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19, ຊຸກຍູ້ສົ່ງເສີມ ແລະ ດຶງດູດການລົງທຶນຈາກພາຍໃນ ແລະ ຕ່າງປະເທດ, ຍູ້ແຮງ ການຜະລິດພາຍໃນໂດຍສະ ເພາະການຜະລິດກະສິກຳ ເພື່ອຄ້ຳປະກັນຄວາມໝັ້ນຄົງ ແລະ ປອດໄພດ້ານສະບຽງອາຫານທັງສົ່ງເສີມການຊົມໃຊ້ພາຍໃນ ແລະ ທັງຮັບໃຊ້ການປຸງແຕ່ງເພື່ອສົ່ງອອກໄປຕ່າງປະເທດ. ນອກນັ້ນແມ່ນສືບຕໍ່ສຸມໃສ່ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ, ແກ້ໄຂຄວາມຫຍຸ້ງຍາກຂອງເສດຖະກິດ, ການເງິນ-ເງິນຕາ, ສົ່ງເສີມການຜະລິດສິນຄ້າໂດຍຮັບປະກັນການພັດທະນາຕາມທິດຄຸນນະພາບ, ມີຈຸດສຸມ, ຍືນຍົງ ແລະ ສີຂຽວ. ທັງໝົດນີ້ແມ່ນແນໃສ່ນຳພາປະເທດຊາດຫຼຸດພົ້ນອອກຈາກສະຖານະພາບດ້ອຍພັດທະນາໃນ 5 ປີຕໍ່ໜ້າ (2021-2025) ເຮັດໃຫ້ປະຊາຊົນພົ້ນທຸກ, ຢູ່ດີກິນດີ, ສັງຄົມມີຄວາມສະຫງົບປອດໄພ ແລະ ຍຸຕິທຳ.

ຂ່າວທີ່ໄດ້ຮັບຄວາມນິຍົມ