(ເນື່ອງ​ໃນ​ໂອ​ກາດ​ວັນ​ອາ​ຫານ​ໂລກ  ວັນ​ສາ​ກົນ ແລະ ສັບ​ປະ​ດາ​ ແຫ່ງ​ຊາດ ເພື່ອ​ລຶບ​ລ້າງ​ຄວາມ​ທຸກ​ຍາກ ປະ​ຈຳ​ປີ 2020)

ທ່ານຜູ້​ນໍາ​ພັກ​-​ລັດ ທີ່​ເຄົາ​ລົບ​ຢ່າງ​ສູງ. ພະນັກງານ, ທະ ຫານ, ຕໍາ​ຫຼວດ, ນັກທຸລະກິດ, ນັກ​ຮຽນ​-​ນັກ​ສຶກສາ ແລະ ພໍ່​ແມ່​ພີ່ນ້ອງ​ຮ່ວມ​ຊາດ ທີ່​ຮັກແພງ​ທັງ​ຫຼາຍ. ບັນດາ​ອົງການ​ຈັດ​ຕັ້ງ​ສາກົນ ແລະ ອົງການ​ຈັດ​ຕັ້ງ​ທີ່​ບໍ່​ສັງກັດ​ລັດຖະບານທີ່​ຮັກແພງ.
ຄື​ດັ່ງ​ຮູ້​ນໍາ​ກັນ​ແລ້ວ​ວ່າ ຄວາມທຸກ​ຍາກ ແລະ ໄພ​ອຶດຫິວ ໄດ້​ເປັນ​ບັນຫາ​ໃຫຍ່​ຂອງ​ໂລກ​ມາ​ເປັນ​ເວລາ​ຫຼາຍ​ສະຕະວັດ​ແລ້ວ. ຕະຫຼອດ​ໄລຍະ​ຜ່ານ​ມາ ໂລກ​ຂອງ​ພວກ​ເຮົາ ຍັງ​ໄດ້​ພົບ​ກັບ​ຫຼາຍໆ​ບັນຫາ​ຄວາມ​ຫຍຸ້ງຍາກ ແລະ ສິ່ງ​ທ້າ​ທາຍ​ຕ່າງໆເຊັ່ນ: ການ​ປ່ຽນແປງ​ທາງ​ດ້ານ​ດິນ​ຟ້າ​ອາກາດ​ຂອງ​ໂລກ ພາໃຫ້​ເກີດ​ໄພພິບັດ​ທາງ​ທໍາ​ມະ​ຊາດ, ການ​ລະບາດ​ຂອງ​ພະຍາດ, ຄວາມ​ວຸ້ນວາຍ​ທາງ​ສັງຄົມ, ເສິກ​ສົງຄາມ, ການ​ລະບາດ​ໂຄ​ວິດ-19 ທີ່​ກຳລັງ​ຄຸກ​ຄາມ​ໃນ​ທົ່ວ​ໂລກ ໄດ້​ສືບ​ຕໍ່​ສົ່ງ​ຜົນ​ກະທົບ​ໃຫ້​ແກ່​ປະຊາຊົນ​ເກືອບ 700 ລ້ານ​ຄົນ ຂາດ​ສານ​ອາຫານ ແລະ ຄາດ​ຄະເນ​ວ່າ ປະຊາຊົນ​ຕື່ມ​ອີກ 130 ລ້ານ​ຄົນ ໃນ​ທົ່ວ​ໂລກ ອາດ​ປະສົບ​ກັບ​ຄວາມ​ອຶດຫິວ​ ຍ້ອນ​ໂ​ຣກລະບາດ​ດັ່ງ​ກ່າວ.  
ປະກົດ​ການ​ດັ່ງກ່າວ​ນັ້ນ ໄດ້​ເປັນ​ການ​ເພີ່ມ​ທະວີ​ໃຫ້​ມີ​ຄວາມທຸກ​ຍາກ ແລະ ໄພ​ອຶດຫິວ​ຫຼາຍ​ຂຶ້ນ. ດັ່ງນັ້ນ, ອົງການ​ອາຫານ ແລະ ການ​ກະເສດ​ຂອງ​ສະຫະ​ປະຊາຊາດ ໄດ້​ກຳນົດ​ເອົາ ວັນ​ທີ 16 ຕຸລາ ຂອງ​ທຸກ​ປີ ເປັນ​ວັນ​ອາຫານ​ໂລກ ຊຶ່ງ​ເລີ່ມ​ແຕ່ ປີ 1980, ຕໍ່​ມາສະຫະ​ປະຊາຊາດ ໄດ້​ກຳນົດ​ເອົາ​ວັນ​ທີ 17 ຕຸລາ ເປັນ​ວັນ​ສາກົນ​ເພື່ອ​ລຶບລ້າງ​ຄວາມທຸກ​ຍາກ ໂດຍ​ເລີ່ມ​ແຕ່ ປີ 1992 ເປັນຕົ້ນ​ມາ, ມາ​ຮອດ ປີ 2003 ລັດຖະບານ ແຫ່ງ ສປປ ລາວ ກໍໄດ້​ກຳນົດ​ເອົາ ວັນ​ທີ 17-24 ຕຸລາ ເປັນ​ສັບປະດາ​ແຫ່ງ​ຊາດ ເພື່ອ​ລຶບລ້າງ​ຄວາມທຸກ​ຍາກ.  
ດັ່ງນັ້ນ, ການ​ສະເຫຼີມສະຫຼອງ 2 ວັນ​ດັ່ງກ່າວ ບໍ່​ສະເພາະ​ແຕ່​ຈະ​ມີ​ຄວາມ​ໝາຍ​ຄວາມ​ສຳຄັນ​ທີ່​ສຸດ ແນໃສ່​ປູກ​ຈິດ​ສຳນຶກ ແລະ ສ້າງ​ຄວາມ​ຮັບ​ຮູ້ ໃຫ້​ປະຊາຊາດ​ໃນ​ທົ່ວ​ໂລກ ໄດ້​ເຂົ້າໃຈ​ເຖິງ​ບັນຫາ​ສິ່ງ​ທ້າ​ທາຍ​ຕ່າງໆ ຈາກ​ການ​ປ່ຽນແປງ​ດິນ​ຟ້າ​ອາກາດ​ເທົ່າ​ນັ້ນ ຫາກ​ຍັງ​ເປັນ​ການ​ແຈ້ງ​ເຕືອນ ແລະ ປຸກລະດົມ​ກຳລັງ​ແຮງ​ທົ່ວ​ສັງຄົມ​ລາວ ແລະ ປະຊາຊົນ​ໂລກ ເພື່ອ​ເຝົ້າ​ລະວັງ, ປ້ອງ​ກັນ​ຜົນ​ເສຍ​ຫາຍທີ່​ອາດ​ເກີດ​ຂຶ້ນ ແລະ ຮ່ວມ​ກັນແກ້​ໄຂ​ຜົນ​ຮ້າຍ ຂອງ ໄພພິບັດ​ໃຫ້​ກັບ​ສູ່​ສະພາບ​ປົກກະຕິ​ໂດຍ​ໄວ​ຢູ່ ສປປ ລາວ.
ການ​ສະເຫຼີມສະຫຼອງ 2 ວັນ​ດັ່ງກ່າວ​ໃນ​ປີ 2020  ຍິ່ງ​ເປັນ​ປີ​ທີ່​ມີ​ຄວາມ​ໝາຍ​ສໍາ​ຄັນ ເປັນ​ໄລຍະ​ທີ່​ກະຊວງ​ກະ​ສິ​ກໍາ ແລະ ປ່າໄມ້ ກໍາ​ລັງ​ສ້າງ​ຂະບວນ​ການ​ຂໍ່າ​ນັບ​ຮັບ​ຕ້ອນ​ກອງ​ປະຊຸມ​ໃຫຍ່​ຄັ້ງ​ທີ VIຂອງ​ຕົນ ຊຶ່ງ​ຈະ​ເປີດຂຶ້ນ​ໃນ​ມໍ່ໆ​ນີ້ ແລະ ອົງການ​ອາຫານ ແລະ ການ​ກະເສດ​ຂອງ​ອົງ​​ການສະຫະ​ປະຊາຊາດ ກໍາ​ລັງສະເຫຼີມສະຫຼອງ​ວັນ​ສ້າງຕັ້ງ​ອົງການ​ດັ່ງກ່າວ ຄົບຮອບ 75 ປີ ຊຶ່ງ​ອົງການ​ດັ່ງກ່າວ​ໄດ້​ມີ​ຜົນງານ​ໃນ​ການ​ປະກອບສ່ວນ​ຊ່ວຍເຫຼືອ​ໂລກ​ນີ້​ເພື່ອ​ຜ່ານ​ພົ້ນ​ສິ່ງ​ທ້າ​ທາຍ​ອັນ​ໃຫຍ່​ຫຼວງ ໂດຍ​ສະເພາະ​ການ​ປ່ຽນແປງ​ດິນ​ຟ້າ​ອາກາດ ການ​ເຊື່ອມ​ໂຊມ​ຂອງ​ສິ່ງແວດລ້ອມ ແລະ ໄພ​ຂົ່ມຂູ່​ດ້ານ​ຄວາມ​ສະຫງົບ ແລະ ຄວາມ​ໝັ້ນຄົງ.  
ດັ່ງນັ້ນ, ໃນ​ໂອກາດ​ທີ່​ມີ​ຄວາມ​ໝາຍ​ສໍາ​ຄັນ​ນີ້, ກະຊວງ​ກະ​ສິ​ກໍາ ແລະ ປ່າໄມ້ ຮ່ວມ​ກັບ​ອົງການ​ອາຫານ ແລະ ການ​ກະເສດ ຈະ​ໄດ້​ຈັດ​ງານ​ສະເຫຼີມສະຫຼອງ​ວັນ​ອາຫານ​ໂລກ ຄົບຮອບ 40 ປີ ພາຍ​ໃຕ້​ຄໍາ​ຂວັນ: “ອະນາ​ຄົດ​ຂອງ​ພວກ​ເຮົາ ຂຶ້ນ​ກັບ​ການ​ກະທຳ​ຂອງ​ພວກ​ເຮົາ: ຈົ່ງ​ພ້ອມ​ກັນ​ເພີ່ມ​ພູນ​ຜະລິດຜົນ, ຮັບປະກັນ​ໂພຊະ​ນາ​ການ, ໃຫ້​ມີ​ຄວາມ​ຍືນ​ຍົງ ແລະ ທົ່ວ​ເຖິງ”; ສະເຫຼີມສະຫຼອງ​ວັນ​ສາກົນ ແລະ ສັບປະດາ​ແຫ່ງ​ຊາດ​ເພື່ອ​ລຶບລ້າງ​ຄວາມທຸກ​ຍາກ ຄົບຮອບ 28 ປີ ພາຍ​ໃຕ້​ຄໍາ​ຂວັນ “ຮ່ວມ​ໃຈ​ກັນ​ເພື່ອ​ບັນລຸ​ຄວາມ​ຍຸຕິ​ທຳ ທາງ​ສັງຄົມ ແລະ ສິ່ງແວດລ້ອມ ໃຫ້​ແກ່​ທຸກ​ຄົນ”  ຊຶ່ງ​ພິທີ​ໂຮມ​ຊຸມນຸມ​ໃຫຍ່ ເພື່ອ​ສະເຫຼີມສະຫຼອງ​ວັນ​ດັ່ງກ່າວ ຈະ​ໄດ້​ຈັດ​ຂຶ້ນ​ໃນ​ຕອນ​ເຊົ້າ​ຂອງ​ວັນ​ທີ 30 ຕຸລາ 2020, ຈັດ​ສໍາ​ມະ​ນາ​-​ປາຖະກະຖາ ຫົວຂໍ້ ກ່ຽວ​ກັບ ກະສິກຳ​ສະອາດ, ໂພຊະ​ນາ​ການ ແລະ ການ​ຫຼຸດຜ່ອນ​ຄວາມທຸກ​ຍາກ, ໃນ​ຕອນ​ບ່າຍ  ຈັດ​ງານ​ວາງສະແດງ​ສິນຄ້າ ແລະ ຈຳໜ່າຍ​ສິນຄ້າ​ກະສິກຳ ເລີ່ມ​ແຕ່​ວັນ​ທີ 28 ຫາ 31 ຕຸລາ 2020 ທີ່​ສະ​ຖາ​ບັນ​ຄົ້ນຄວ້າ​ກະສິກຳ, ປ່າໄມ້ ແລະ ພັດທະນາ​ຊົນນະບົດ (ເຂດ​ດົງ​ໂດກ). 
ບັນດາ​ທ່ານ​ທີ່​ນັບຖື ແລະ ຮັກແພງ, ຂ້າພະເຈົ້າ​ໃນ​ນາມ​ລັດຖະມົນຕີ​ກະຊວງ​ກະ​ສິ​ກໍາ ແລະ ປ່າໄມ້, ປະທານ​ຈັດ​ພິທີ​ສະເຫຼີມສະຫຼອງ 2 ວັນ​ດັ່ງກ່າວ ຈຶ່ງ​ຂໍ​ຮຽກຮ້ອງ​ມາ​ຍັງ​ທົ່ວ​ພັກ​ທົ່ວ​ລັດ ທົ່ວ​ປວງ​ຊົນ​ລາວ​ທັງ​ຊາດ ຕະຫຼອດ​ຮອດ​ອົງການ​ຈັດ​ຕັ້ງ​ສາກົນ​ຕ່າງໆ​ຢູ່ ສປປ ລາວ ຈົ່ງ​ຮ່ວມ​ກັນ ສະເຫຼີມສະຫຼອງ ວັນ​ອາຫານ​ໂລກ, ວັນ​ສາກົນ ແລະ ສັບປະດາ​ແຫ່ງ​ຊາດ​ເພື່ອ​ລຶບລ້າງ​ຄວາມທຸກ​ຍາກ​ປີ​ນີ້ ໃຫ້​ເປັນ​ຂະບວນ​ຟົດຟື້ນ, ຮັບປະກັນ​ເນື້ອ​ໃນ​ເປັນຕົ້ນ​ຕໍ ຮູບ​ການ​ເປັນ​ສຳຄັນ ບົນ​ພື້ນຖານ​ຈິດໃຈ ປະຢັດ​ມັດທະຍັດ ມີ​ຄວາມ​ເປັນ​ລະບຽບ​ຮຽບຮ້ອຍ ແລະ ຈົບງາມ, ປອດ​ໄພ​ຈາກ​ພະຍາດ ໂຄ​ວິດ-19.
 ຂໍ​ຂອບໃຈ !