ກະແຕໄຕ່ໄມ້ ຫຼື ກຸດຫອກ, ກໍຕ້າງຕໍ່, ສາງວ້ຽງ(ຢ້າວ), ກັບແກ້ຫີນ ຊື່ວິທະຍາສາດແມ່ນ Drynaria bonii Christ. ຕະກຸນ POLYDIACEAE ເປັນພືດປະເພດຕົ້ນຫຍ້າ, ມີອາຍຸຍືນຫຼາຍປີ, ລໍາຮາກໜາ, ອົມນ້ຳ, ລໍາຮາກຖືກຫຸ້ມດ້ວຍຂົນແຂງ, ສີກະເບົາ. ມີ 2 ຊະນິດ, ໃບບໍ່ສາມາດປະສົມພັນ, ປະເພດນີ້ໃບບໍ່ມີຂວັ້ນ, ສີເຫຼືອງຫຼ່າ, ມັກໂທມເອົາລໍາຮາກກັບແກ້ຫີນ, ໃບປະເພດສອງແມ່ນໃບທີ່ສາມາດປະສົມພັນໄດ້, ໃບປະເພດນີ້ມີຂວັ້ນ, ເປັນສີຂຽວ, ສ້ອຍເລິກເປັນປ່ຽງ, ມີຕ່ອມ ຫຼື ຖົງທີ່ບັນຈຸສະປໍທີ່ສັບຊ້ອນບໍ່ສະເໝີກັນ. ເປັນພືດທີ່ເກີດເອງຕາມທໍາມະຊາດ, ເຂດພູດອຍ, ຕາມພະລານຫີນ ບ່ອນຊຸ່ມເຢັນ. ລະດູຂະຫຍາຍພັນແມ່ນຍາມເດືອນ ພຶດສະພາ-ສິງຫາ. ລໍາຮາກໃຊ້ເປັນຢາ, ເກັບກູ້ໄດ້ທຸກໆລະດູການ, ຂູດເອົາຂົນອອກຈົນກ້ຽງ, ຕາກແດດໃຫ້ແຫ້ງ, ກ່ອນຈະໃຊ້ຕ້ອງບົ່ມໃຫ້ອ່ອນ, ພົມນ້ຳເຫຼົ້າ ຫຼື ນ້ຳເຜິ້ງ ແລ້ວຂົ້ວໃຫ້ເຫຼືອງຫອມດີ.
#ວິທີໃຊ້: ເປັນຢາປົວເຈັບກະດູກ, ເຈັບຕົນຕົວ, ພິກໂບກ, ພິກເອັນ, ເລືອດກ້າມ, ໄຂ່ຫຼັງພິການ, ຫູອື້. ມື້ໜຶ່ງກິນ 6-12 ກຣາມ ຕົ້ມ ຫຼື ດອງເຫຼົ້າດື່ມ. ກໍລະນີໃຊ້ພາຍນອກໃຫ້ຕຳມຸ່ນໆແລ້ວໂຜະໃສ່ບ່ອນເຈັບ. ກໍລະນີປົວຫູອື້, ໃຫ້ນຳມາບົດເປັນຝຸ່ນລະອຽດ 4-6 ກຣາມ ໂຮຍໃສ່ໝາກໄຂ່ຫຼັງໝູປີ້ງໃຫ້ສຸກແລ້ວກິນ.

ແຫຼ່ງ: ສະຖາບັນການແພດ ແລະ ຢາພື້ນເມືອງ, ກະຊວງສາທາລະນະສຸກ