ໜັງສືພິມ ປະຊາຊົນ

ຜັນຂະຫຍາຍມະຕິກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ ຊຸດທີ VIII ໃຫ້ປະກົດຜົນເປັນຈິງ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 25/11/2020 09:48:40 ຈຳນວນຢ້ຽມຊົມ 1997 ຄັ້ງ

ກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ ຊຸດທີ VIII ໄດ້ປິດລົງຢ່າງຈົບງາມ, ພາຍຫຼັງດຳເນີນມາເປັນເວລາ 16 ວັນ, (ວັນທີ 27 ຕຸລາ ຫາ 17 ພະຈິກ 2020) ທີ່ໄດ້ເປີດກອງປະຊຸມຂຶ້ນຢ່າງເປັນທາງການ ແລະ ດຳເນີນພາຍໃຕ້ພື້ນຖານການເສີມຂະຫຍາຍສິດປະຊາທິປະໄຕ, ຄວາມຮັບຜິດຊອບການເມືອງຂອງສະມາຊິກສະພາແຫ່ງຊາດ. ກອງປະຊຸມສາມາດບັນລຸຜົນສໍາເລັດຕາມຄາດໝາຍທີ່ວາງໄວ້ ໂດຍໄດ້ພິຈາລະນາຮັບຮອງເອົາບັນຫາສໍາຄັນພື້ນຖານຂອງຊາດ ອອກເປັນມະຕິກອງປະຊຸມ 9 ສະບັບ, ພິຈາລະນາຮັບຮອງເອົາກົດໝາຍ 5 ສະບັບ. ຄຽງຄູ່ກັນນັ້ນ, ຍັງໄດ້ຮັບຟັງການຊີ້ແຈງອະທິບາຍ ຈາກ 5 ກະຊວງ/ອົງການ ໃນບັນຫາທີ່ພົ້ນເດັ່ນ ທີ່ສົ່ງຜົນກະທົບຕໍ່ການຈັດຕັ້ງປະຕິບັດ ແຜນພັດທະນາເສດຖະກິດ - ສັງຄົມ, ພ້ອມທັງໄດ້ສະເໜີບັນດາທິດທາງແກ້ໄຂເພື່ອໃຫ້ມີຜົນສຳເລັດຍິ່ງໆຂຶ້ນ.

ກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດຊຸດທີ VIII ໄດ້ພິຈາລະນາຮັບຮອງເອົາບັນຫາສຳຄັນພື້ນຖານຂອງປະເທດຊາດ ໂດຍໄດ້ອອກເປັນມະຕິກອງປະຊຸມ ຈຳນວນ 9 ສະບັບຄື:

ມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາການແຕ່ງຕັ້ງທ່ານ ຄໍາເຈນ ວົງໂພສີ ເປັນລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີ; ມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາການແຕ່ງຕັ້ງ ທ່ານ ທອງຈັນ ມະນີໄຊ ເປັນລັດຖະມົນຕີກະຊວງພາຍໃນ; ມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາແຜນຜັງລວມຕົວເມືອງ ນະຄອນຫຼວງວຽງຈັນ ສະບັບທີ 3; ມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2020, ທິດທາງແຜນການ ປະຈໍາປີ 2021; ມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດ 9 ເດືອນ, ຄາດຄະເນປະຕິບັດໝົດປີ 2020 ແລະ ແຜນການປະຈໍາ ປີ 2021; ມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຜົນການກວດສອບ, ບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2019 ແລະ ບົດລາຍງານ ຜົນການກວດກາ ຕາມຜົນການກວດສອບ ປີ 2018, ສົກປີ 2013-2014 ແລະ 2015-2016; ມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2020 ແລະ ທິດທາງແຜນການ ປະຈໍາປີ 2021; ມະຕິກອງປະຊຸມສະພາແຫ່ງຊາດ ວ່າດ້ວຍຮັບຮອງເອົາບົດສະຫຼຸບການເຄື່ອນໄຫວວຽກງານ ຂອງອົງການກວດສອບແຫ່ງລັດ ປະຈໍາປີ 2020 ແລະ ທິດທາງແຜນການເຄື່ອນໄຫວ ປະຈໍາປີ 2021; ມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ 5 ປີ (2016-2020) ແລະ ປີ 2020 ຂອງສະພາແຫ່ງຊາດ ຊຸດທີ VIII, ຄາດຄະເນແຜນການ ປະຈໍາປີ 2021.

ນອກນີ້, ກອງປະຊຸມ ຍັງໄດ້ຮັບຮອງເອົາກົດໝາຍຈໍານວນ 5 ສະບັບ ເພື່ອເພີ່ມເຄື່ອງມືຄຸ້ມຄອງລັດໃຫ້ແກ່ຂະແໜງການທີ່ກ່ຽວຂ້ອງ. ໃນນີ້ມີກົດໝາຍສ້າງໃໝ່ 4 ສະບັບຄື: ກົດໝາຍວ່າດ້ວຍຊັ້ນນັກການທູດ, ກົດໝາຍວ່າດ້ວຍຊາວໜຸ່ມລາວ, ກົດໝາຍວ່າດ້ວຍການຮ່ວມມືລະຫວ່າງປະເທດທາງອາຍາ, ກົດໝາຍວ່າດ້ວຍການສຶກສາຊັ້ນສູງ. ສະບັບປັບປຸງ 1 ສະບັບຄື: ກົດໝາຍວ່າດ້ວຍການກວດສອບແຫ່ງລັດ ທັງນີ້ກໍເພື່ອຮັບປະກັນເຮັດໃຫ້ການເຄື່ອນໄຫວວຽກຂອງຂະແໜງການດັ່ງກ່າວ ນັບມື້ຫັນເຂົ້າສູ່ລະບຽບກົດໝາຍ ແລະ ມີຄຸນນະພາບດີຂຶ້ນ.

ໃນກອງປະຊຸມຄັ້ງນີ້, ຍັງໄດ້ຮັບຟັງ ແລະ ປະກອບຄໍາເຫັນ ໃສ່ຮ່າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ແລະ ຮ່າງແຜນການເຄື່ອນໄຫວວຽກງານຂອງສະພາແຫ່ງຊາດ 5 ປີ (2021-2025). ກອງປະຊຸມ ສະເໜີມາຍັງລັດຖະບານ ແລະ ຄະນະປະຈໍາສະພາແຫ່ງຊາດ ຊີ້ນໍາກະຊວງ ແລະ ກໍາມາທິການກ່ຽວຂ້ອງ ນໍາເອົາຄວາມຄິດເຫັນຂອງສະມາຊິກສະພາແຫ່ງຊາດ ໄປປັບປຸງເຂົ້າໃສ່ແຜນດັ່ງກ່າວ ແລະ ສືບຕໍ່ຄົ້ນຄວ້າໃຫ້ເລິກເຊິ່ງຕໍ່ແຕ່ລະບັນຫາ ເພື່ອກໍານົດບັນດາຄາດໝາຍ, ທິດທາງ, ວຽກງານຈຸດສຸມໃນແຕ່ລະດ້ານໃຫ້ມີຄວາມຊັດເຈນ ແລະ ສອດຄ່ອງກັບຄວາມຮຽກຮ້ອງຕ້ອງການ ໃນການພັດທະນາເສດຖະກິດ-ສັງຄົມ, ຄວາມອາດສາມາດຕົວຈິງທາງດ້ານທຶນຮອນ ໃນໄລຍະ 5 ປີຕໍ່ໜ້າ ເພື່ອສາມາດນໍາໄປພິຈາລະນາ ແລະ ຮັບຮອງເອົາຢູ່ໃນກອງຊຸມຄັ້ງປະຖົມມະລືກ ຂອງສະພາແຫ່ງຊາດ ຊຸດທີ IX ທີ່ຈະມາເຖິງ.

ກອງປະຊຸມ ຍັງໄດ້ຮັບຟັງການລາຍງານ ກ່ຽວກັບການກະ ກຽມວຽກງານເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II, ພ້ອມທັງໄດ້ຮຽກຮ້ອງມາຍັງບັນດາກະຊວງ, ອົງການທຽບເທົ່າ, ອົງການປົກຄອງທ້ອງຖິ່ນທຸກຂັ້ນ ຈົ່ງໄດ້ເອົາໃຈໃສ່ຊີ້ນໍາ-ນໍາພາ ແລະ ກະກຽມເງື່ອນໄຂຮອບດ້ານ ເພື່ອຮັບປະກັນໃຫ້ແກ່ການເລືອກຕັ້ງ ບັນລຸຜົນສໍາເລັດຕາມຄາດໝາຍທີ່ວາງໄວ້.

ກອງປະຊຸມຄັ້ງນີ້, ສຸດທີ່ມີຄວາມໝາຍຄວາມສໍາຄັນ ເພາະໄດ້ດໍາເນີນໃນທ່າມກາງບັນຍາກາດ ທີ່ທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດ ພວມສຸມໃສ່ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ, ແຜນພັດທະນາເສດຖະກິດ - ສັງຄົມ 5 ປີ ຄັ້ງທີ VIII ໃນໄລຍະມ້ວນທ້າຍໃຫ້ມີຜົນສໍາເລັດ; ການກະກຽມສະເຫຼີມສະຫຼອງວັນຊາດ ທີ 2 ທັນວາ ຄົບຮອບ 45 ປີ, ວັນເກີດຂອງປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປະຊາຊົນລາວ ຄົບຮອບ 100 ປີ; ການສະເຫຼີມສະຫຼອງວັນສ້າງຕັ້ງສະພາແຫ່ງຊາດ ຄົບຮອບ 45 ປີ (2 ທັນວາ 1975- 2 ທັນວາ 2020) ແລະ ທັງເປັນວາລະທີ່ສະພາແຫ່ງຊາດຊຸດທີ VIII ໃກ້ຈະໝົດວາລະໄປອີກບໍ່ເທົ່າໃດເດືອນຂ້າງໜ້ານີ້.

ຕະຫຼອດໄລຍະ 5 ປີທີ່ຜ່ານມາ, ໃນຖານະເປັນອົງການຕົວແທນສິດ ແລະ ຜົນປະໂຫຍດຂອງປະຊາຊົນ, ສະມາຊິກສະພາແຫ່ງຊາດ ໄດ້ເພີ່ມທະວີເອົາໃຈໃສ່ຍົກສູງຄວາມຮັບຜິດຊອບການເມືອງ, ຈັດຕັ້ງປະຕິບັດສິດ ແລະ ໜ້າທີ່ຂອງຕົນຕາມກົດໝາຍໄດ້ຢ່າງຄົບຖ້ວນ, ເສີມຂະຫຍາຍສິດປະຊາທິປະໄຕເຂົ້າໃນການຄົ້ນຄວ້າ, ພິຈາລະນາ ແລະ ຕົກລົງບັນຫາສໍາຄັນຂອງຊາດ, ລົງເລິກໃກ້ຊິດຕິດແທດ ແລະ ຮັບຟັງຄວາມຄິດເຫັນຂອງປະຊາຊົນ ເພື່ອສະເໜີໃຫ້ພາກສ່ວນກ່ຽວຂ້ອງ ພິຈາລະນາແກ້ໄຂ, ເຮັດສໍາເລັດໜ້າທີ່ຕາມທີ່ພັກ-ລັດ ແລະ ປະຊາຊົນມອບໝາຍໃຫ້, ປະກອບສ່ວນຄວາມຮູ້ຄວາມສາມາດຂອງຕົນ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອຄວາມສົມບູນພູນສຸກຂອງປະຊາຊົນລາວບັນດາເຜົ່າ ແລະ ຄວາມຈະເລີນຮຸ່ງເຮືອງວັດທະນາຂອງຊາດລາວເຮົາ.

ໂດຍລວມແລ້ວ, ທຸກວຽກງານທີ່ສະພາແຫ່ງຊາດໄດ້ພິ ຈາລະນາ ແລະ ຮັບຮອງເອົາ ລ້ວນແຕ່ເປັນບັນຫາສຳຄັນຂອງຊາດ ໃນສອງໜ້າທີ່ຍຸດທະສາດຄື: ການປົກປັກຮັກສາ ແລະ ສ້າງສາພັດທະນາປະເທດຊາດ ຕາມແນວທາງປ່ຽນແປງໃໝ່ຂອງພັກເຮົາ. ຮຽກຮ້ອງມາຍັງພະນັກງານ-ລັດຖະກອນ, ສະມາຊິກພັກ, ທະຫານ, ຕຳຫຼວດ ແລະ ປະຊາຊົນລາວບັນດາເຜົ່າ ແລະ ທຸກພາກສ່ວນເສດຖະກິດ ທັງພາຍໃນ ແລະ ຕ່າງປະເທດ ຈົ່ງໄດ້ເຊື່ອມຊຶມ ແລະ ຈັດຕັ້ງຜັນຂະຫຍາຍ ບັນດາມະຕິ ແລະ ກົດໝາຍ ທີ່ໄດ້ຮັບຮອງໃນກອງປະຊຸມຄັ້ງນີ້ ໃຫ້ເປັນແຜນວຽກອັນລະອຽດຂອງຕົນ, ພ້ອມທັງ ອອກແຮງແຂ່ງຂັນສ້າງຜົນງານ ເພື່ອຂໍ່ານັບຮັບຕ້ອນວັນບຸນສໍາຄັນຂອງຊາດ ກໍຄືສ້າງຂະບວນການຕ້ອນຮັບກອງປະຊຸມໃຫຍ່ຜູ້ແທນທົ່ວປະເທດຂອງພັກ ຄັ້ງທີ XI ທີ່ຈະເປີດຂຶ້ນໃນມໍ່ໆນີ້ ແລະ ການເລືອກຕັ້ງສະມາຊິກສະພາແຫ່ງຊາດຊຸດທີ IX, ສະມາຊິກປະຊາຊົນຂັ້ນແຂວງ ຊຸດທີ II ໃຫ້ມີຜົນສຳເລັດໃໝ່ ເພື່ອສືບຕໍ່ສ້າງສາ ແລະ ບູລະນະລະບອບປະຊາທິປະໄຕປະຊາຊົນ, ສ້າງບັນດາປັດໄຈ ເພື່ອກ້າວຂຶ້ນສູ່ສັງຄົມນິຍົມ, ກ້າວສູ່ອະນາຄົດທີ່ສົດໄສຂອງຊາດຢ່າງມີໄຊ, ພ້ອມກັນປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດລາວເຮົາ ໃຫ້ມີຄວາມຈະເລີນຮຸ່ງເຮືອງ, ເພື່ອຄວາມຮັ່ງມີຜາສຸກຂອງປະຊາຊົນລາວບັນດາເຜົ່າ, ເພື່ອສັງຄົມທີ່ມີຄວາມສາມັກຄີປອງດອງ, ປະຊາທິປະໄຕ, ຍຸຕິທຳ ແລະ ສີວິໄລ.

(ໂດຍ: ສ.ບຸດປະຊາ)

ຂ່າວທີ່ໄດ້ຮັບຄວາມນິຍົມ