ໜັງສືພິມ ປະຊາຊົນ

ພັກປະຊາຊົນປະຕິວັດລາວ ຢຶດໝັ້ນລັດທິມາກ-ເລນິນ ແນວຄິດໄກສອນ ພົມວິຫານ ເປັນພື້ນຖານ ທາງດ້ານແນວຄິດທິດສະດີຂອງພັກ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 09/12/2020 10:08:53 ຈຳນວນຢ້ຽມຊົມ 2737 ຄັ້ງ

ເນື່ອງໃນໂອກາດວັນເກີດປະທານ ໄກສອນ ພົມວິຫານ ຄົບຮອບ 100 ປີ (13/12/1920-13/12/2020)
(ວັນສ້າງຕັ້ງພັກ 65 ປີ - ວັນສ້າງຕັ້ງ ສປປ ລາວ ຄົບຮອບ 45 ປີ)

ໂດຍ: ບົວວັນ ວິລະສັກ ສະຖາບັນຄົ້ນຄວ້າການເມືອງວິທະຍາ

1. ການໝູນໃຊ້ລັດທິມາກ-ເລນິນ ເຂົ້າໃສ່ສະພາບຈຸດພິເສດຂອງປະເທດ.
ຍ້ອນພັກປະຊາຊົນປະ ຕິວັດລາວ ໄດ້ໝູນໃຊ້ ລັດທິມາກ-ເລນິນ ຮັບຮູ້ສັງຄົມນິຍົມ ແລະ ເສັ້ນທາງກ້າວຂຶ້ນສັງຄົມນິຍົມ ສະນັ້ນ, ການສ້າງປະເທດລາວ ກ້າວຂຶ້ນສູ່ຈຸດໝາຍສັງຄົມນິຍົມຕ້ອງໄດ້ເລີ່ມຕົ້ນຈາກສະພາບຄວາມເປັນຈິງຂອງປະເທດເຮົາ ແລະ ສະພາບການປ່ຽນແປງໃໝ່ຂອງບັນດາປະເທດຕ່າງໆໃນໂລກ, ເພື່ອເປັນພື້ນຖານໃຫ້ແກ່ການແກ້ໄຂບັນຫາທີ່ເກີດຂຶ້ນຢູ່ພາຍໃນປະເທດ ບົນພື້ນຖານນັ້ນ ຊອກຫາທິດທາງ, ວິທີການ, ຮູບການ, ຈຸດເລີ່ມໃໝ່ ເພື່ອພາປະເທດພົ້ນຈາກຄວາມຫຍຸ້ງຍາກ ແລະ ສືບຕໍ່ພັດທະນາກ້າວຂຶ້ນຕາມເສັ້ນທາງສັງຄົມນິຍົມໃນເງື່ອນໄຂໃໝ່ ແລະ ສະພາບການໃໝ່, ເລີ່ມຕົ້ນໃໝ່, ຍຸກສະໄໝໃໝ່ໃນປັດຈຸບັນ.
ຜ່ານການສ້າງລະບອບປະຊາທິປະໄຕ ປະຊາຊົນແຕ່ປີ 1975-1985 ຢູ່ປະເທດເຮົາ, ພັກເຮົາໄດ້ສະຫຼຸບທິດສະດີພຶດຕິກຳ ຊຶ່ງຖອດຖອນບົດຮຽນໄດ້ຫຼາຍປະການ ຊຶ່ງເປັນພື້ນຖານໃຫ້ແກ່ການປັບ ປຸງ, ບູລະນະແນວທາງແຜນນະໂຍບາຍໃຫ້ມີຄວາມສອດ ຄ່ອງ ແລະ ສົມບູນຂຶ້ນເທື່ອລະກ້າວ. ພັກເຮົາໄດ້ຕີລາຄາສະພາບການພາຍໃນ ແລະ ກົງໄປກົງມາ, ຈາກນັ້ນ ຈຶ່ງເຫັນວ່າມີຄວາມຈຳເປັນຕ້ອງມີການປ່ຽນແປງໃໝ່ຢ່າງມີຫຼັກການຂອງພັກ ໂດຍຢຶດໝັ້ນລັດທິມາກ-ເລນິນ,ແນວຄິດປະທານ ໄກສອນ ພົມວິຫານ ເປັນພື້ນຖານທາງດ້ານທິດສະດີຂອງພັກເປັນເຂັມຊີ້ທິດເຍືອງທາງຕາມອຸດົມການ ແລະ ຈຸດ ໝາຍກ້າວຂຶ້ນສັງຄົມນິຍົມ. ໃນກອງປະຊຸມໃຫຍ່ຂອງພັກຄັ້ງທີ IV ປີ 1986 ຈຶ່ງໄດ້ຜ່ານມະຕິ ແລະ ຕົກລົງຮັບຮອງເອົາແນວທາງປ່ຽນແປງໃໝ່ໂດຍຖືວ່າການປ່ຽນແປງໃໝ່ທາງດ້ານຈິນຕະນາການແມ່ນຄວາມຈຳເປັນພາວະວິໄສ, ມັນແມ່ນຂະບວນວິວັດທີ່ມີລັກສະນະປະຕິວັດວິທະຍາສາດ ແນໃສ່ສ້າງຄວາມຮັບຮູ້ໃໝ່ທີ່ຖືກຕ້ອງກ່ຽວກັບສັງຄົມນິຍົມ ໂດຍສອດ ຄ່ອງກັບສະພາວະຄວາມເປັນຈິງຂອງປະເທດລາວເຮົາກ້າວຂຶ້ນສູ່ລະດັບທີ່ມີຄຸນນະພາບໃໝ່.
ແນວທາງການປ່ຽນແປງໃໝ່ຂອງພັກເຮົາໄດ້ຜ່ານການຄົ້ນຄວ້າປະກອບສ້າງມາເປັນກ້າວ, ເປັນຂັ້ນ, ເປັນຕອນ, ເປັນລະບົບ, ມີການບູລະນະເພີ່ມເຕີມໃຫ້ສົມບູນຂຶ້ນ ຕາມເງື່ອນໄຂຕົວຈິງ. ມາເຖິງກອງປະຊຸມໃຫຍ່ຄັ້ງທີ V ຂອງພັກຈຶ່ງໄດ້ຢັ້ງຢືນຮັບຮອງເອົາເປັນແນວທາງປ່ຽນແປງໃໝ່ຮອບດ້ານຢ່າງມີຫຼັກການຂອງພັກ.
ໃນນັ້ນ, ເສດຖະກິດຕ້ອງປ່ຽນແປງໃໝ່ກ່ອນໝູ່, ປະທານໄກສອນ ພົມວິຫານ ເວົ້າວ່າ: “ຖ້າບໍ່ມີການປ່ຽນແປງແມ່ນຕາຍ, ແຕ່ຖ້າປ່ຽນແປງບໍ່ມີຫຼັກການກໍຕາຍ”.
ບົນພື້ນຖານ ແນວຄວາມຄິດ ແລະ ທັດສະນະຂອງປະທານໄກສອນ ພົມວິຫານ ມະຕິຄົບຄະນະສູນກາງພັກຄັ້ງທີ 7 ສະໄໝທີ IV ໄດ້ກຳ ນົດລັກສະນະຂອງການປະ ຕິວັດລາວແມ່ນການສ້າງ ແລະ ບູລະນະລະບອບປະຊາທິປະ ໄຕ ປະຊາຊົນ ກ້າວຂຶ້ນສູ່ຈຸດ ໝາຍສັງຄົມນິຍົມ ແລະ ກອງປະຊຸມຄົບຄະນະສູນກາງພັກຄັ້ງທີ 8 ສະໄໝທີ IV ໄດ້ກຳນົດ 6 ຫຼັກການປ່ຽນແປງໃໝ່ຢ່າງທັນການຄື:
ໜຶ່ງ: ຢຶດໝັ້ນຈຸດໝາຍສັງຄົມນິຍົມ, ກຳແໜ້ນລັກ ສະນະຂອງການປະຕິວັດລາວຢູ່ປະເທດເຮົາໃນໄລຍະໃໝ່;
ສອງ: ຢຶດໝັ້ນລັດທິມາກ -ເລນິນ, ແນວຄິດປະທານໄກສອນ ພົມວິຫານ ເປັນພື້ນ ຖານທາງດ້ານແນວຄິດທິດສະດີຂອງພັກເຮົາ, ຊີ້ນຳທຸກ ພາລະກິດປະຕິວັດຂອງປະ ຊາຊົນ;
ສາມ: ການນໍາພາຂອງພັກເປັນເງື່ອນໄຂຕັດສິນຊີ້ຂາດໄຊຊະນະຂອງພາລະກິດປະຕິວັດຂອງປະຊາຊົນເຮົາ;
ສີ່: ເຊີດຊູ ແລະ ເສີມຂະ ຫຍາຍປະຊາທິປະໄຕ ບົນພື້ນ ຖານຫຼັກການລວມສູນປະຊາ ທິປະໄຕ ເອົາປະຊາຊົນເປັນກົກພາຍໃຕ້ການນໍາພາຂອງພັກ;
ຫ້າ: ເພີ່ມທະວີກໍາລັງແຮງ ແລະ ຄວາມສັກສິດຂອງຜະເດັດການປະຊາທິປະໄຕປະຊາຊົນ;
ຫົກ: ສົມທົບລັດທິຮັກຊາດກັບລັດທິສາກົນກໍາມາຊີບ ແລະ ສາກົນສັງຄົມນິຍົມ, ສົມທົບກັບກໍາລັງແຮງຂອງຊາດກັບກໍາລັງແຮງຂອງຍຸກສະໄໝ.