ໜັງສືພິມ ປະຊາຊົນ

ພັກປະຊາຊົນ ປະຕິວັດລາວ ຢຶດໝັ້ນລັດທິ ມາກ - ເລນິນ ແນວຄິດ ໄກສອນ ພົມວິຫານ ເປັນພື້ນຖານ ທາງດ້ານແນວຄິດທິດສະດີຂອງພັກ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 17/12/2020 12:38:55 ຈຳນວນຢ້ຽມຊົມ 3335 ຄັ້ງ

ເນື່ອງໃນໂອກາດວັນເກີດປະທານ ໄກສອນ ພົມວິຫານ ຄົບຮອບ 100 ປີ (13/12/1920-13/12/2020)

(ວັນສ້າງຕັ້ງພັກ 65 ປີ - ວັນສ້າງຕັ້ງ ສປປ ລາວ ຄົບຮອບ 45 ປີ)

ໂດຍ: ບົວວັນ ວິລະສັກ ສະຖາບັນຄົ້ນຄວ້າການເມືອງວິທະຍາ

ຍ້ອນຄວາມຮຽກຮ້ອງ ຕ້ອງການຂອງວຽກງານກໍ່ສ້າງພັກ, ປະທານ ໄກສອນ ພົມວິ ຫານ ຕັກເຕືອນເລື້ອຍໆວ່າ: ຫຼັງຈາກຢຶດອໍານາດການປົກ ຄອງປົດປ່ອຍປະເທດຊາດໄດ້ແລ້ວ ບັນຫາກ່ອນອື່ນໝົດທີ່ຕ້ອງເຮັດກ່ອນໝູ່ ແມ່ນການປັບປຸງປົວແປງພັກ. ພັກຕ້ອງຕີລາຄາໃຫ້ຖືກຕ້ອງທັງ 3 ດ້ານຄື: ການເມືອງ, ແນວຄິດ, ການຈັດຕັ້ງ, ກໍານົດຈະແຈ້ງບັນດາໜ້າທີ່ ແລະ ຄວາມຮຽກຮ້ອງຕ້ອງການຂອງການປະຕິວັດໄລຍະໃໝ່. ຄວາມສະດວກ, ຄວາມຫຍຸ້ງຍາກ, ຈັດວາງສະມາຊິກພັກຮັບຜິດຊອບການເມືອງໃຫ້ເໝາະສົມ, ວາງແນວທາງ, ແຜນນະໂຍບາຍພັດທະນາປະເທດຊາດໃຫ້ຖືກຕ້ອງ ດັ່ງທ່ານປະທານ ໄກສອນ ພົມວິຫານ ໄດ້ແນະນໍາວ່າ: ຕ້ອງກຽມຄວາມພ້ອມ, ຈະແຈ້ງ, ຮອບດ້ານຫຼີກເວັ້ນການຖືກທ່າຮັບ, ຂາດຕົກບົກຜ່ອງ ແລະ ຜິດພາດ ເຮັດໃຫ້ມີຄວາມຊັກຊ້າ ແລະ ມີຄວາມເສຍຫາຍໃຫ້ແກ່ພາລະກິດປະຕິວັດຂອງພັກເຮົາ.
ກອງປະຊຸມໃຫຍ່ ຄັ້ງທີ X ຂອງພັກໄດ້ຈໍາແນກວ່າ: ໃນຫຼາຍປີຜ່ານມາ ພວກເຮົາໄດ້ຖືເບົາ ແລະ ມີຄວາມບົກຜ່ອງໃນວຽກງານກໍ່ສ້າງພັກ. ຍ້ອນແນວນັ້ນ ກອງປະຊຸມໃຫຍ່ ຄັ້ງທີ X ຂອງພັກ ຈຶ່ງກໍານົດເອົາແນວຄິດປະທານ ໄກສອນ ພົມວິຫານ ເປັນພື້ນຖານທາງດ້ານແນວຄິດທິດສະດີຂອງພັກ ເປັນເຂັມທິດເຍືອງທາງຂອງການປະຕິວັດໃນໄລຍະໃໝ່, ຍ້ອນແນວນັ້ນແນວຄິດປະທານ ໄກສອນ ພົມວິຫານ ກ່ຽວກັບການກໍ່ສ້າງພັກ ບໍ່ໄດ້ຮັບການເອົາໃຈໃສ່ປະຕິບັດການປັບປຸງປົວແປງພັກ ໃນຊຸມປີມໍ່ໆມານີ້ ບໍ່ທັນໄດ້ຮັບການເອົາໃຈໃສ່ເທົ່າທີ່ຄວນ, ເຮັດໄດ້ແຕ່ຮູບການ, ບໍ່ເລິກເຊິ່ງ ເຮັດບໍ່ທັນໄດ້ດີຕາມການຕັກເຕືອນ ຂອງປະທານ ໄກສອນ ພົມວິຫານ ທີ່ວ່າ: ວຽກທີ່ຈະເຮັດກ່ອນໝູ່ໝົດແມ່ນການປັບປຸງປົວແປງພັກ.
ກ້າວເຂົ້າສູ່ໄລຍະໃໝ່ ຂອງການປະຕິວັດ, ແນວຄິດປະທານ ໄກສອນ ພົມວິຫານ ກ່ຽວກັບວຽກງານກໍ່ສ້າງພັກ ໄດ້ຮັບການຄົ້ນຄວ້າ ແລະ ນັບມື້ໄດ້ຮັບການເຊື່ອມຊືມ ພັກປະຊາຊົນປະຕິວັດລາວໄດ້ກໍານົດແຈ້ງ ການຂະຫຍາຍເສດຖະກິດເປັນໃຈກາງ, ການກໍ່ສ້າງພັກເປັນໜ້າທີ່ກຸນແຈ, ພັກຕ້ອງປ່ຽນແປງໃໝ່ ແລະ ປັບປຸງປົວແປງຕົນເອງຢູ່ເລື້ອຍໆ ເພື່ອປະຕິບັດໜ້າທີ່ຂໍກຸນແຈດັ່ງກ່າວນັ້ນ, ໄດ້ກໍານົດທິດທາງ ໃຫ້ແກ່ການນໍາໃນສະພາວະຢຸດສະງັກ, ຈຸດອ່ອນໃນວຽກງານກໍ່ສ້າງພັກ, ພວກເຮົາຄວນກໍາແໜ້ນ ແລະ ມີສະຕິສໍານຶກສະເໝີວ່າ: ສະມາຊິກພັກສະຫາຍໃດບໍ່ຮູ້ຈຸດອ່ອນ ແລະ ຂໍ້ຂາດຕົກບົກຜ່ອງຂອງຕົນເອງ ບໍ່ຮູ້ປັບປຸງກໍ່ສ້າງດ້ວຍຕົນເອງ ແມ່ນສະມາຊິກພັກຜູ້ນັ້ນຈະໄດ້ຊຸດໂຊມ ແລະ ປະລາໄຊໃນທີ່ສຸດ.
4. ລັດທິມາກ-ເລນິນ ແມ່ນທິດສະດີການປະຕິວັດ ແລະ ວິທະຍາສາດ.
ລັດທິມາກ-ເລນິນ ແມ່ນທິດສະດີ ທີ່ຄົ້ນຄວ້າກ່ຽວກັບກົດເກນລວມແຫ່ງການກໍາເນີດ, ຄົງຕົວ ແລະ ຂະຫຍາຍຕົວຂອງທໍາມະຊາດ-ສັງຄົມ ແລະ ຈິນຕະນາການ. ທັງແມ່ນທິດສະດີປະຕິວັດຂອງຊົນຊັ້ນກໍາມະກອນ ແລະ ຊາວຜູ້ອອກແຮງງານທີ່ກ້າວໜ້າໃນໂລກ, ເປັນວິທະຍາສາດກ່ຽວກັບການສ້າງສັງຄົມນິຍົມ ແລະ ກອມມູນິດ ນິຍົມ. ແມ່ນກົດເກນ ແລະ ໝາກຜົນລວມຍອດທາງດ້ານສະຕິປັນຍາຂອງມວນມະນຸດ. ເລນິນໄດ້ສອນໄວ້ວ່າ: (ລັດທິມາກ-ເລນິນບໍ່ແມ່ນຄໍາພີ) ແມ່ນທິດນໍາໃນການເຄື່ອນໄຫວຕົວຈິງຂອງມະນຸດ.
ລັດທິມາກ-ເລນິນ ແມ່ນທິດສະດີປະຕິວັດ ແລະ ວິ ທະຍາສາດຂອງຊົນຊັ້ນກໍາມະກອນ ແລະ ຊາວກໍາມາຊີບ ທີ່ກ້າວໜ້າໃນໂລກ ລັກສະນະປະຕິວັດຂອງທິດສະດີມາກ-ເລນິນສະແດງອອກ ດັ່ງນີ້:
ກ). ທິດສະດີມາກ-ເລນິນ ບໍ່ພຽງແຕ່ການຮັບຮູ້ໂລກ ທໍາມະຊາດ-ສັງຄົມ ແລະ ຈິນຕະນາການເທົ່ານັ້ນ, ແຕ່ສໍາຄັນຍັງແມ່ນການດັດສ້າງໂລກ ເພື່ອຮັບໃຊ້ຜົນປະໂຫຍດຂອງມວນມະນຸດ ເປັນຕົ້ນແມ່ນເພື່ອຜົນປະໂຫຍດຂອງຊົນຊັ້ນກໍາມະກອນ ແລະ ຊາວຜູ້ອອກແຮງງານໃນທົ່ວໂລກ.
ຂ). ທິດສະດີມາກ-ເລນິນ ບໍ່ແມ່ນທິດສະດີສົມບູນ, ຕໍາລາ, ຄໍາພີຕາຍຕົວ ແລະ ແຂງກະດ້າງ, ແຕ່ແມ່ນລະບົບ ທິດສະດີທີ່ກໍາເນີດ ແລະ ຂະຫຍາຍຕົວຢ່າງບໍ່ຢຸດຢັ້ງ ໂດຍຜ່ານພຶດຕິກໍາຜະລິດວັດຖຸ ສິ່ງຂອງ, ພຶດຕິກໍາແຫ່ງການປ່ຽນແປງດ້ານການເມືອງ-ສັງຄົມ ແລະ ພຶດຕິກໍາແຫ່ງການຂະຫຍາຍຕົວ ດ້ານວິທະຍາສາດ ແລະ ເຕັກໂນໂລຊີ.
ຄ). ທິດສະດີມາກ-ເລນິນ ເປັນລັກສະນະວິທະຍາສາດຊຶ່ງສະແດງອອກດັ່ງນີ້:
+ ທິດສະດີມາກ-ເລນິນ ໄດ້ສ່ອງແສງເຖິງບັນດາກົດເກນ ພາວະວິໄສ ຂອງທໍາມະຊາດ-ສັງຄົມ ແລະ ຈິນຕະນາການຢ່າງຖືກຕ້ອງ ໂດຍອີງໃສ່ຜົນສໍາເລັດ ຂອງບັນດາຂະແໜງການວິທະຍາສາດ.
+ ທິດສະດີມາກ-ເລນິນ ໄດ້ສັງເກດຕີລາຄາ ສິ່ງວັດຖຸ ແລະ ປະກົດການຕ່າງໆ ຫຼື ເບິ່ງໂລກຢູ່ໃນສາຍກ່ຽວພັນແບບກາຍອິນຊີ; ພິຈາລະນາແກ້ໄຂສິ່ງວັດຖຸຢູ່ໃນທ່າເຄື່ອນເໜັງ ແລະ ຂະຫຍາຍຕົວ; ຊອກຮູ້ຂໍ້ຂັດແຍ່ງຢູ່ໃນສິ່ງວັດຖຸ ແລະ ວິທີການແກ້ໄຂຂໍ້ຂັດແຍງນັ້ນຢ່າງຖືກຕ້ອງ.