……………………..

ຂຽນໂດຍ: ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ

ເນື່ອງໃນໂອກາດວັນສ້າງຕັ້ງຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຄົບຮອບ 5 ປີ

--------------

ຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ໄດ້ຮັບການສ້າງຕັ້ງຂຶ້ນໃນວັນທີ 23 ມີນາ 2016 ຊຶ່ງມາຮອດປັດຈຸບັນ ຄົບຮອບ 5 ປີ ໂດຍປະກອບດ້ວຍ 6 ປະເທດສະມາຊິກຄື: ສປປ ລາວ, ກຳປູເຈຍ, ມຽນມາ, ໄທ, ສສ ຫວຽດນາມ ແລະ ສປ ຈີນ ຊຶ່ງມີເປົ້າໝາຍສົ່ງເສີມ ແລະ ຮັດແໜ້ນການຮ່ວມມື ເພື່ອການພັດທະນາເສດຖະກິດ-ສັງຄົມ ບົນພື້ນຖານການຄວາມສະເໝີພາບ, ມີຜົນປະໂຫຍດຮ່ວມກັນ ແລະ ເປັນຈິດໜຶ່ງໃຈດຽວໃນການສ້າງຂົງເຂດພາກພື້ນແມ່ນໍ້າຂອງ ໃຫ້ມີຄວາມຈະເລີນ ແລະ ສົມບູນພູນສຸກ. ຂອບການຮ່ວມມືດັ່ງກ່າວໄດ້ຂະຫຍາຍຕົວໂດຍປິ່ນອ້ອມ 3 ເສົາຄໍ້າຄື: ການເມືອງ - ຄວາມໝັ້ນຄົງ, ເສດຖະກິດ-ການພັດທະນາແບບຍືນຍົງ, ສັງຄົມ-ວັດທະນະທໍາ ແລະ ການແລກປ່ຽນລະຫວ່າງປະຊາຊົນ, ຊຶ່ງໃນນີ້ ໄດ້ສຸມໃສ່ 5 ຂົງເຂດບຸລິມະສິດເຊັ່ນ: ການເຊື່ອມຈອດ, ສົ່ງເສີມກຳລັງການຜະລິດ, ເສດຖະ ກິດຂ້າມຊາຍແດນ, ການຄຸ້ມຄອງແຫຼ່ງຊັບພະຍາກອນນໍ້າ, ກະສິກໍາ ແລະ ການຫຼຸດຜ່ອນຄວາມທຸກຍາກ.

ຕະຫຼອດໄລຍະ 5 ປີທີ່ຜ່ານມາ, ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງໄດ້ເຕີບໃຫຍ່ ຂະຫຍາຍຕົວ ແລະ ​ສອດ​ຄ່ອງ​ກັບຈຸດ​ພິ​ເສດ ​ແລະ ລັກສະນະສະເພາະ​ຂອງການພັດທະນາຢູ່​ໃນພາກພື້ນແມ່ນໍ້າຂອງ​​ທີ່ມີທັງກາລະໂອກາດ ແລະ ສິ່ງທ້າທາຍ. ບັນດາກົນໄກການຈັດຕັ້ງປະຕິ ບັດຂອງປະເທດສະມາຊິກແມ່ນໍ້າຂອງ-ແມ່ນໍ້າລ້ານຊ້າງ ໄດ້ຖືກສ້າງຕັ້ງຂຶ້ນເປັນຕົ້ນການສ້າງຕັ້ງ 6 ໜ່ວຍງານວິຊາການຮ່ວມຂອງຂະແໜງການບຸລິມະສິດ, ສ້າງຕັ້ງກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ ທີ່ ສປ ຈີນ ປະກອບທຶນ 300 ລ້ານໂດລາ ເພື່ອສະໜັບສະໜູນໂຄງການຕ່າງໆ ແລະ ການສ້າງຕັ້ງກອງເລຂາແຫ່ງຊາດຂອງບັນດາປະເທດສະມາຊິກ ເພື່ອອຳນວຍຄວາມສະດວກ ແລະ ປະສານງານກັບຂະແໜງການກ່ຽວຂ້ອງເພື່ອຈັດຕັ້ງປະຕິບັດບັນດາຖະແຫຼງການ, ແຜນປະຕິບັດງານຕ່າງໆ ທີ່ຜູ້ນຳໄດ້ຮັບຮອງເອົາໃຫ້ເປັນຮູບປະທຳຕົວຈິງ. ນອກນັ້ນ, ຍັງໄດ້ສ້າງຕັ້ງບັນດາສູນຮ່ວມມືຕ່າງໆ ເພື່ອສະໜັບສະໜູນວຽກງານຕົວຈິງໃນ 5 ຂະແໜງການບຸລິມະສິດ ເຊັ່ນ: ສູນຮ່ວມມືການຄຸ້ມຄອງ ຊັບພະຍາກອນນໍ້າ, ສູນຮ່ວມມືການຄຸ້ມຄອງສິ່ງແວດລ້ອມ, ສູນຮ່ວມມື ແລະ ແລກປ່ຽນຊາວໜຸ່ມ, ສູນຝຶກວິຊາຊີບ, ສູນຮ່ວມມືດ້ານກະສິກຳ ແລະ ສູນສາກົນເພື່ອການສຶກສາແມ່ນໍ້າຂອງ.

ສປປ ລາວ ມີ​ຄວາມພາກ​ພູມ​ໃຈເປັນຢ່າງຍິ່ງທີ່ໄດ້ເປັນ​ສະມາຊິກກໍ່ຕັ້ງຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ. ຕະຫຼອດ​​ໄລຍະ 5 ປີ ​ຜ່ານ​ມາ, ສປປ ລາວ ໄດ້ເຄື່ອນໄຫວວຽກງານຂອບ ຮ່ວມມືດັ່ງກ່າວຢ່າງຕັ້ງໜ້າ​ໃນ​ທຸກ​ໆຂົງ​ເຂດ​ການ​ຮ່ວມ​ມື​. ອັນສໍາຄັນ, ສປປ ລາວ ໄດ້ປະຕິບັດພັນທະ ການເປັນປະທານຮ່ວມກັບ ສປ ຈີນ ຕາມວາລະ 2 ປີ (2018-2020) ດ້ວຍຜົນສໍາເລັດອັນຈົບງາມ, ຊຶ່ງໃນວາລະເປັນປະທານຮ່ວມດັ່ງກ່າວ ສປປ ລາວ ໄດ້ເປັນເຈົ້າພາບຈັດກອງປະຊຸມລະດັບລັດ ຖະມົນຕີຕ່າງປະເທດແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 4 ແລະ ຄັ້ງທີ 5 ແລະ ໄດ້ເປັນເຈົ້າພາບຈັດ ກອງປະຊຸມຜູ້ນໍາແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 3 ພາຍໃຕ້ຄຳຂວັນ: “ເພີ່ມທະວີການຮ່ວມມື ເພື່ອຄວາມສົມບູນພູນສຸກຮ່ວມກັນ” ໃນຮູບແບບກອງປະຊຸມທາງໄກ ຊຶ່ງໄດ້ຮັບຮອງເອົາຖະແຫຼງ ການວຽງຈັນ ແລະ ຖະແຫຼງການປະທານຮ່ວມກອງປະຊຸມ ວ່າດ້ວຍການເຊື່ອມສານຂອບການຮ່ວມ ມືແມ່ນໍ້າຂອງ-ແມ່ນໍ້າລ້ານຊ້າງ ແລະ ແລວການຄ້າສາກົນໃໝ່ ທາງບົກ-ທາງທະເລ.

ນອກຈາກຜົນສໍາເລັດທີ່ໄດ້ເປັນປະທານຮ່ວມ ແລະ ເປັນເຈົ້າພາບກອງປະຊຸມດັ່ງກ່າວ ຊຶ່ງໄດ້ຍົກຖານະບົດບາດຂອງ ສປປ ລາວ ໃຫ້ສູງເດັ່ນຂຶ້ນໃນເວທີພາກພື້ນ ແລະ ສາກົນ ແລ້ວ, ສປປ ລາວ ຍັງໄດ້ຮັບຜົນປະໂຫຍດ ທີ່ເປັນຮູບປະທຳຈາກການຈັດຕັ້ງປະຕິບັດບັນດາໂຄງການຮ່ວມມືຕ່າງໆພາຍ ໃຕ້ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ, ເປັນຕົ້ນແມ່ນຈາກການຈັດຕັ້ງປະຕິບັດໂຄງ ການເຫັນຜົນໄວ ເຊັ່ນ: ໂຄງການທົດລອງແກ້ໄຂຄວາມທຸກຍາກລາວ-ຈີນ ທີ່ມີມູນຄ່າ 33 ລ້ານຢວນ ຢູ່ ນະຄອນຫຼວງວຽງຈັນ ແລະ ແຂວງຫຼວງພະບາງ ທີ່ຫາກໍສໍາເລັດໃນປີ 2020 ຜ່ານມາ ຊຶ່ງໄດ້ສ້າງ ພື້ນຖານໂຄງລ່າງຂະໜາດນ້ອຍຄື: ສ້າງສຸກສາລາ, ຫໍພັກຄູ-ອາຈານ, ສູນບຳບັດຂີ້ເຫຍື້ອ ແລະ ຝຶກອົບຮົມການເຮັດກະສິກຳສະອາດໃຫ້ຊາວບ້ານ ເພື່ອເປັນການສ້າງລາຍຮັບໃຫ້ຊາວບ້ານໃນເຂດດັ່ງກ່າວ. ຕັ້ງແຕ່ປີ 2017 ເປັນຕົ້ນມາ, ພາຍໃຕ້ກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ, ສປປ ລາວ ໄດ້ຮັບໂຄງການທັງໝົດຈໍານວນ 46 ໂຄງການ, ຄິດເປັນມູນຄ່າລວມ 12 ລ້ານກວ່າໂດລາ. ມາເຖິງ​ປັດຈຸບັນປະຕິບັດສໍາເລັດແລ້ວ 8 ໂຄງການ, ກໍາລັງຈັດຕັ້ງປະຕິບັດຢູ່ 29 ໂຄງການ ແລະ ກໍາລັງຈະເລີ່ມຈັດຕັ້ງປະຕິບັດອີກ 9 ໂຄງການ. ບັນດາໂຄງການເຫຼົ່ານັ້ນໄດ້ປະກອບສ່ວນສຳຄັນເຂົ້າ ໃນການພັດທະນາເສດຖະກິດ-ສັງຄົມ ຂອງ ສປປ ລາວ ຢ່າງຫຼວງຫຼາຍ.

ສປປ ລາວ ຕີລາຄາສູງຕໍ່ໝາກຜົນການຮ່ວມມືພາຍໃຕ້ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ບົນຈິດໃຈການຮ່ວມມືເພື່ອສັນຕິພາບ, ສະຖຽນລະພາບ, ສາມັກຄີປອງດອງ ແລະ ເປັນຈິດໜຶ່ງໃຈດຽວ ໃນການພັດທະນາຂົງເຂດພາກພື້ນແມ່ນໍ້າຂອງກໍຄືການສົ່ງເສີມການຮ່ວມມື ໃຫ້ນັບມື້ນັບແໜ້ນແຟ້ນ ແລະ ຂະຫຍາຍໄປສູ່ລວງກວ້າງ ແລະ ລວງເລິກ ຢ່າງມີປະສິດທິຜົນ. ສປປ ລາວ ຂໍຖືໂອກາດນີ້ ສະແດງຄວາມ ຂອບໃຈຢ່າງຈິງໃຈ ມາຍັງລັດຖະບານ ແຫ່ງ ສປ ຈີນ ທີ່ໄດ້ໃຫ້ຄວາມສຳຄັນ ແລະ ສະໜັບສະໜູນ ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງຕະຫຼອດມາ ໂດຍສະເພາະການສະໜັບສະໜູນທຶນຊ່ວຍເຫຼືອ ເຂົ້າໃນກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ ຊຶ່ງໄດ້ຊ່ວຍເຮັດໃຫ້ບັນດາໂຄງການຮ່ວມມືຕ່າງໆ ໃນພາກພື້ນແມ່ນໍ້າຂອງໄດ້ຮັບການຈັດຕັ້ງປະຕິບັດຢ່າງມີໝາກຜົນ ແລະ ເປັນຮູບປະທຳ.

ໃນໂອກາດຄົບຮອບ 5 ປີ ຂອງການສ້າງຕັ້ງຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ຂ້າພະເຈົ້າ ເຊື່ອໝັ້ນວ່າຂອບການຮ່ວມມືດັ່ງກ່າວ ຈະສືບຕໍ່ພັດທະນາຢ່າງຕໍ່ເນື່ອງ ແລະ ສົ່ງເສີມການຮ່ວມມື ລະຫວ່າງປະເທດແມ່ນ້ຳຂອງ ແລະ ສປ ຈີນ ໃຫ້ມີການຂະຫຍາຍຕົວຂຶ້ນເລື່ອຍໆ, ປະກອບສ່ວນເຂົ້າ ໃນການພັດທະນາພາກພື້ນແມ່ນໍ້າຂອງໃຫ້ມີຄຸນນະພາບ ແລະ ຍືນຍົງ ເພື່ອຮັບປະກັນໃຫ້ພາກ ພື້ນແມ່ນໍ້າຂອງເປັນພາກພື້ນທີ່ມີສັນຕິພາບ ແລະ ການພັດທະນາ ແລະ ປະກອບສ່ວນສະໜັບສະໜູນ ເຂົ້າໃນການສ້າງປະຊາຄົມອາຊຽນ, ຂໍ້ລິເລີ່ມໜຶ່ງແລວ  ໜຶ່ງເສັ້ນທາງ, ການຮ່ວມມືໃຕ້-ໃຕ້ ແລະ ເປົ້າໝາຍພັດທະນາແບບຍືນຍົງ ຮອດປີ 2030 ຂອງອົງການສະຫະປະຊາຊາດ. ສປປ ລາວ ໃນຖານະປະເທດສະມາຊິກຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຈະສືບຕໍ່ຮ່ວມມືຢ່າງໃກ້ຊິດ ກັບ ສປ ຈີນ ແລະ ປະເທດແມ່ນໍ້າຂອງ ແລະ ປະກອບສ່ວນເຂົ້າຮ່ວມກິດຈະກຳຕ່າງໆ ກໍຄືການຮ່ວມ ຈັດຕັ້ງປະຕິບັດໂຄງການພາຍໃຕ້ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຢ່າງຫ້າວຫັນ ເພື່ອເຮັດ ໃຫ້ຂອບການຮ່ວມມືດັ່ງກ່າວເຕີບໃຫຍ່ຂະຫຍາຍຕົວຕໍ່ໄປ ແລະ ມີໝາກຜົນຕົວຈິງແກ່ປະເທດສະມຊິກ ທັງໝົດ.