ໜັງສືພິມ ປະຊາຊົນ

ສະຫວັນນະເຂດ ເນັ້ນການກໍ່ສ້າງພັກດ້ານການເມືອງ ແນວຄິດເປັນສຳຄັນ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 01/07/2021 08:54:44 ຈຳນວນຢ້ຽມຊົມ 4500 ຄັ້ງ

ໂດຍ: ວັນໄຊ ຕະວິນຍານ

ຕະຫຼອດໄລຍະທີ່ຜ່ານມາ, ແຂວງສະຫວັນນະເຂດໄດ້ຊີ້ນໍາຄະນະພັກແຕ່ລະຂັ້ນເອົາໃຈໃສ່ວຽກງານການເມືອງ-ແນວຄິດເປັນສໍາຄັນ ໂດຍສອດຫ້ອຍເຂົ້າໃນທຸກຂົງເຂດວຽກງານຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ ດ້ວຍການຈັດຕັ້ງການເຊື່ອມຊຶມບັນດາມະຕິ, ຄຳສັ່ງຂອງພັກ, ລະບຽບກົດໝາຍຂອງລັດ ແລະ ບັນດານິຕິກຳຕ່າງໆເຮັດໃຫ້ສະມາຊິກພັກ-ພະນັກງານ ແລະ ປະຊາຊົນບັນດາເຜົ່າໃນທົ່ວແຂວງ ເຊື່ອໝັ້ນຕໍ່ແນວທາງນະໂຍບາຍຂອງພັກ, ມີຄວາມອຸ່ນອ່ຽນທຸ່ນທ່ຽງໃນການປະຕິບັດໜ້າທີ່ວຽກງານຂອງຕົນ, ມີນ້ຳໃຈຮັກຊາດ, ຮັກບ້ານເກີດເມືອງນອນຢ່າງດູດດື່ມ, ມີຄວາມສາມັກຄີເປັນປຶກແຜ່ນ; ຄະນະພັກແຕ່ລະຂັ້ນ ແລະ ສະມາຊິກພັກ ໂດຍລວມແມ່ນຍັງຮັກສາໄດ້ຄຸນທາດການເມືອງຄຸນສົມບັດສິນທຳປະຕິວັດ, ມີຄວາມຊື່ສັດບໍລິສຸດຕໍ່ອຸດົມການຂອງພັກ, ຢຶດໝັ້ນລັດທິມາກ-ເລນິນ, ແນວຄິດໄກສອນ ພົມວິຫານ ແລະ ມູນເຊື້ອຂອງພັກຢ່າງສະເໝີຕົ້ນສະເໝີປາຍ, ປະຊາຊົນບັນດາເຜົ່າກໍໄດ້ເປັນເຈົ້າການ ເຂົ້າຮ່ວມຂະບວນການພັດທະນາເສດຖະກິດ-ສັງຄົມ, ແກ້ໄຂຊີວິດການເປັນຢູ່ໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ.
ຄະນະພັກແຕ່ລະຂັ້ນໄດ້ເອົາໃຈໃສ່ນຳພາຄົ້ນຄວ້າເຊື່ອມຊຶມບັນດາມະຕິ, ຄໍາສັ່ງ, ຂໍ້ກຳນົດ, ບົດແນະນໍາ, ກົດລະບຽບຂອງພັກ, ກົດໝາຍຂອງລັດ ຊຶ່ງໄດ້ເຮັດໃຫ້ສະມາຊິກພັກ, ພະນັກງານ ມີການຫັນປ່ຽນຢ່າງຕັ້ງໜ້າ, ເຊື່ອໝັ້ນຕໍ່ອຸດົມການຂອງພັກ ແລະ ການຊີ້ນຳ-ນຳພາຂອງອົງຄະນະພັກແຂວງ, ມີທັດສະນະຫຼັກໝັ້ນການເມືອງໜັກແໜ້ນ, ມີຄວາມຮັບຮູ້ເຂົ້າໃຈ ແລະ ເປັນເຈົ້າການປະກອບສ່ວນໃນການຈັດຕັ້ງປະຕິບັດແນວທາງແຜນນະໂຍບາຍຂອງພັກ-ລັດ ແລະ ມີຜົນສໍາເລັດຫຼາຍດ້ານ. ແຂວງໄດ້ເອົາໃຈໃສ່ນໍາພາກໍ່ສ້າງ ແລະ ປັບປຸງການຈັດຕັ້ງຮາກຖານພັກໃຫ້ມີຄວາມໜັກແໜ້ນ, ເຂັ້ມແຂງເຮັດໃຫ້ການຈັດຕັ້ງພັກເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບ, ສາມາດເປັນແກນນຳໃນລະບົບການເມືອງຢູ່ແຕ່ລະຂັ້ນ; ປັດຈຸບັນ, ທົ່ວແຂວງມີ 227 ຄະນະພັກຮາກຖານ, ເພີ່ມຂຶ້ນ 26 ຄະນະພັກຮາກຖານ ແລະ ມີ 1.939 ໜ່ວຍພັກ, ເພີ່ມຂຶ້ນ 280 ໜ່ວຍພັກ; ໃນນີ້ ໄດ້ຮັບຮອງເປັນໜ່ວຍພັກປອດໃສ ເຂັ້ມແຂງ ໜັກແໜ້ນ ລວມທັງໝົດ 1.654 ໜ່ວຍເທົ່າກັບ85% ທຽບ ໃສ່ສະໄໝຜ່ານມາ ເພີ່ມຂຶ້ນ 637 ໜ່ວຍ, ຂະຫຍາຍສະມາຊິກພັກໃໝ່ 6.773 ສະຫາຍ; ມີສະມາຊິກພັກທັງໝົດ 29.075 ສະຫາຍ, ຍິງ 6.810 ສະຫາຍ; ໃນນັ້ນສະມາຊິກພັກສົມບູນໄດ້ຮັບບັດສະມາຊິກພັກ 79% ໄດ້ນຳພາດຳເນີນປັບປຸງປົວແປງພັກ ສາມາດເສີມຂະຫຍາຍໄດ້ລັກສະນະນຳໜ້າ ແລະ ຄວາມສາມັກຄີເປັນເອກະພາບຂອງອົງຄະນະພັກ.
ສັງລວມແລ້ວການເຄື່ອນ ໄຫວຂອງສະມາຊິກພັກ, ພະ ນັກງານແຕ່ລະຂັ້ນ ຕິດພັນກັບວຽກງານສຶກສາອົບຮົມ ເຮັດໃຫ້ແຕ່ລະສະຫາຍມີຄວາມເປັນແບບຢ່າງນຳໜ້າ ແລະ ຈໍາກັດໄດ້ປະກົດການຫຍໍ້ທໍ້ທີ່ຈະເກີດຂຶ້ນພາຍໃນພັກ; ແບບແຜນວິທີນໍາພາໄດ້ຮັບການປັບປຸງດີຂຶ້ນ, ປະຕິບັດຕາມຫຼັກການລວມສູນປະຊາທິປະໄຕ, ນຳພາເປັນໝູ່ຄະນະ, ແບ່ງງານໃຫ້ບຸກຄົນຮັບຜິດຊອບຢ່າງຂາດຕົວ; ເສີມຂະຫຍາຍປະຊາທິປະໄຕພາຍໃນພັກຕາມລະບຽບຂອງພັກໄດ້ເຂັ້ມງວດພໍສົມຄວນ.

ຂ່າວທີ່ໄດ້ຮັບຄວາມນິຍົມ