ລັດຖະທຳມະນູນແມ່ນກົດໝາຍພື້ນຖານຂອງລັດ ຫຼື ກົດໝາຍແມ່ ໂດຍທຸກເນື້ອໃນຂອງກົດໝາຍຕ່າງໆທີ່ສ້າງຂຶ້ນ ແລະ ປະກາດໃຊ້ຕ້ອງໃຫ້ສອດຄ່ອງກັບລັດຖະມະນູນ ຊຶ່ງ​ມາ​ຮອດ​ປັດ​ຈຸ​ບັນ ສ​ປ​ປ ລາວ ໄດ້​ປະ​ກາດ​ໃຊ້​ກົດ​ໝາຍຫຼາຍກວ່າ 150 ສະ​ບັບແລ້ວ.

       ທ່ານ ສົມບູນ ສົນທິກຸມມານ ພະນັກງານບຳນານ ​ອະດີດຮອງປະທານສານປະຊາຊົນສູງສຸດ ໄດ້ໃຫ້ສຳພາດຕໍ່ສື່ມວນຊົນເນື່ອງໃນໂອກາດສະເຫຼີມສະຫຼອງວັນລັດຖະທຳມະນູນແຫ່ງຊາດ ຄົບຮອບ 30 ປີ ໃນວັນທີ 2 ສິງຫາຜ່ານມາທີ່ສະພາແຫ່ງຊາດວ່າ: ລັດຖະທຳມະນູນສະບັບດັ່ງກ່າວແມ່ນໝາກຜົນລວມຍອດແຫ່ງສະຕິປັນຍາ ແລະ ການປະກອບຄວາມເຫັນຢ່າງກວ້າງຂວາງຂອງປະຊາຊົນໃນທົ່ວປະເທດທີ່ສ່ອງແສງຢ່າງຈະແຈ້ງເຖິງເຈດຈຳນົງອັນສູງສຸດ, ຍາວນານ ແລະ ຄວາມຕັດສິນໃຈອັນແຮງກ້າຂອງອົງຄະນາຍາດແຫ່ງຊາດທີ່ຈະພ້ອມກັນສູ້ຊົນສ້​າງປະເທດລາວໃຫ້ເປັນປະເທດສັນຕິພາບ, ເອກກະລາດ, ປະຊາທິປະໄຕ, ເອກກະພາບ ແລະ ວັດທະນາຖາວອນ, ເປັນການຮັບຮູ້ຜົນງານອັນຍິ່ງໃຫຍ່ຂອງປະຊາຊົນທີ່ຍາດມາໄດ້ໃນພາລະກິດຕໍ່ສູ້ປົດປ່ອຍຊາດຕະຫຼອດເຖິງການປົກປັກຮັກສາ ແລະ ສ້າງສາປະເທດຊາດ ກໍຄືພາລະກິດປ່ຽນແປງໃໝ່, ເປັນລັດຖະທຳມະນູນສະບັບທຳອິດຂອງປະເທດເຮົາທີ່ໄດ້ກຳນົດລະບອບການເມືອງ, ເສດຖະກິດ-ສັງຄົມ, ການປ້ອງກັນຊາດ, ປ້ອງກັນຄວາມສະຫງົບ, ການຕ່າງປະເທດ, ສິດ ແລະ ພັນທະພື້ນຖານຂອງພົນລະເມືອງລາວ, ຕະຫຼອດຮອດລະບົບການຈັດຕັ້ງກົງຈັກລັດໃນໄລຍະໃໝ່, ຜ່ານມາ 30 ປີ ສະພາແຫ່ງຊາດແຕ່ລະຊຸດໄດ້ຖືສຳຄັນການຄົ້ນຄວ້າສ້າງ ແລະ ຮັບຮອງເອົາກົດໝາຍເພື່ອປະກາດໃຊ້ໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ມາຮອດປັດຈຸບັນພວກເຮົາມີກົດໝາຍທີ່ປະກາດໃຊ້ແລ້ວຫຼາຍກວ່າ 150 ສະບັບ ຊຶ່ງກວມເອົາທຸກຂົງເຂດວຽກງານ ເປັນບ່ອນອີງໃຫ້ແກ່ການເຄື່ອນໄຫວປະຕິບັດໜ້າທີ່ຂອງອົງການຈັດຕັ້ງລັດ, ອົງການຈັດຕັ້ງມະຫາຊົນ, ອົງການຈັດຕັ້ງສັງຄົມຕະຫຼອດເຖິງການດຳລົງຊີວິດຂອງ ປະຊາຊົນບັນດາເຜົ່າໃນທົ່ວປະເທດ.

      ທ່ານ ກ່າວຕື່ມວ່າ: ກົດໝາຍແມ່ນຫັນມາຈາກແນວທາງນະໂຍບາຍຂອງພັກ ມາເປັນລະບຽບການຄຸ້ມຄອງລັດ, ຄຸ້ມຄອງເສດຖະກິດ ແລະ ສັງຄົມ, ການຄຸ້ມຄອງລັດດ້ວຍກົດໝາຍຕາມແນວທາງຂອງພັກກໍເພື່ອຕອບສະໜອງຄວາມຮຽກຮ້ອງຕ້ອງການໃນການຈັດຕັ້ງປະຕິບັດແນວທາງປ່ຽນແປງໃໝ່ເຂົ້າສູ່ລວງເລິກ, ການດຳເນີນພາລະກິດປ່ຽນແປງໃໝ່ຮອບດ້ານ ແລະ ມີຫຼັກການກໍແມ່ນເພື່ອຂຸດຄົ້ນ ແລະ ເສີມຂະຫຍາຍກຳລັງແຮງຂອງຊາດ ແລະ ຂອງຍຸກສະໄໝເຂົ້າໃນການສືບຕໍ່ສ້າງ ແລະ ບູລະນະລະບອບປະຊາທິປະໄຕປະຊາຊົນ, ທຸກການເຄື່ອນໄຫວໃນສັງຄົມແມ່ນປະຕິບັດຕາມລະບຽບກົດໝາຍຢ່າງເຄັ່ງຄັດສັງຄົມຈຶ່ງຈະເປັນລະບຽບຮຽບຮ້ອຍ, ມີຄວາມສະຫງົບ, ສ້າງເງື່ອນໄຂອຳນວຍແກ່ການປົກປັກຮັກສາ ແລະ ສ້າງສາພັດທະນາປະເທດຊາດ ໃນທຸກດ້ານເພື່ອເຮັດໃຫ້ຊີວິດການເປັນຢູ່ຂອງປະຊາຊົນນັບມື້ດີຂຶ້ນ, ເຮັດໃຫ້ປະຊາຊົນຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ, ສັງຄົມມີຄວາມສາມັກຄີປອງດອງ, ມີປະຊາທິປະໄຕ, ຍຸຕິທຳ ແລະ ສີວິໄລ ສ້າງປະຖົມປັດ​ໄຈກ້າວຂຶ້ນຕາມອຸດົມການທີ່ພັກວາງໄວ້.

(ຂ່າວ+ພາບ: ສຳນານ)