ໂດຍ: ພູວັນ

ລັດຖະທຳມະນູນແຫ່ງ ສປປ ລາວ ແມ່ນກົດໝາຍແມ່ຂອງລະບອບປະຊາທິປະໄຕ ປະຊາຊົນ ຊຶ່ງໄດ້ກຳນົດກ່ຽວກັບລະບອບການເມືອງ, ລະບອບເສດຖະກິດ-ສັງຄົມ, ການປ້ອງກັນຊາດ - ປ້ອງກັນຄວາມສະຫງົບ, ສິດ ແລະ ພັນທະພື້ນຖານຂອງພົນລະເມືອງລາວ ແລະ ກໍານົດລະບົບການຈັດຕັ້ງຂອງ ສປປ ລາວ.

ເນື່ອງໃນໂອກາດວັນສ້າງຕັ້ງວັນລັດຖະທຳມະນູນແຫ່ງ ສປປ ລາວ ຄົບຮອບ 30 ປີ (15/8/1991 – 15/8/2021) ທີ່ຈະມາເຖິງນີ້, ທ່ານນາງ ພອນເພັດ ອຸ່ນແກ້ວ ເລຂາໜ່ວຍພັກ ຫົວໜ້າສະຖາບັນຄົ້ນຄວ້າ ແລະ ຝຶກອົບຮົມໄອຍະການ ອົງການໄອຍະການປະຊາຊົນສູງສຸດ ທັງ​ເປັນ​ສະ​ມາ​ຊິກ​ສະ​ພາ​ແຫ່ງ​ຊາດ ໄດ້ສະແດງທັດສະນະຄວາມຮູ້ສຶກຕໍ່ວັນສຳຄັນດັ່ງກ່າວຜ່ານສື່ມວນຊົນວ່າ: ວັນສ້າງຕັ້ງວັນລັດຖະທຳມະນູນແຫ່ງ ສປປ ລາວ  ເປັນວັນທີ່ມີຄວາມໝາຍ-ສຳຄັນທີ່ສຸດ ຂອງປວງຊົນລາວທັງຊາດ ພາຍໃຕ້ການນໍາພາຂອງພັກປະຊາຊົນ ປະຕິວັດລາວ ທັງເປັນຜົນງານອັນຍິ່ງໃຫຍ່ຂອງປະຊາຊົນລາວບັນດາເຜົ່າ ໃນພາລະກິດປ່ຽນແປງໃໝ່ຮອບດ້ານທີ່ມີຫຼັກການຂອງພັກ ທັງເປັນການຢັ້ງຢືນເຖິງຄວາມເປັນເອກະລາດ ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດ ພ້ອມທັງຢັ້ງຢືນໃຫ້ເຫັນເຖິງທາດແທ້ຂອງລະບອບປະຊາທິປະໄຕ ປະຊາຊົນ ພາຍໃຕ້ການນຳພາຂອງພັກປະຊາຊົນປະຕິວັດລາວ ແລະ ໃນໂອກາດທີ່ມີຄວາມໝາຍສໍາຄັນ ຂໍຮຽກຮ້ອງມາຍັງບັນດາອົງການຈັດຕັ້ງຕ່າງໆ ພ້ອມດ້ວຍປະຊາຊົນລາວບັນດາເຜົ່າທີ່ຢູ່ພາຍໃນ ແລະ ຕ່າງປະເທດ ຈົ່ງພ້ອມກັນເຊີດຊູສະຕິເຄົາລົບລັດຖະທຳມະນູນ, ກົດໝາຍ ແລະ ສ້າງການຫັນປ່ຽນຢ່າງແຂງແຮງ ເລິກເຊິ່ງ, ຮອບດ້ານ ແລະ ພ້ອມກັນຈັດຕັ້ງປະຕິບັດໃຫ້ສຳເລັດຕາມລະດັບຄາດໝາຍໃໝ່ທີ່ກອງປະຊຸມໃຫຍ່ ຄັ້ງທີ XI ຂອງພັກວາງອອກ. 

ທ່ານນາງ ພອນເພັດ ອຸ່ນແກ້ວ ຍັງກ່າວໃຫ້ຮູ້ອີກວ່າ: ພາຍໃຕ້ການນໍາພາທີ່ສະຫຼາດສ່ອງໃສຂອງພັກປະຊາຊົນ ປະຕິວັດລາວ ເວົ້າລວມ, ເວົ້າສະເພາະກໍຄືການຊີ້ນໍາ-ນໍາພາຂອງຄະນະພັກ-ຄະນະນໍາ ອົງການໄອຍະການປະຊາຊົນສູງສຸດ ໃນການຍົກສູງຄຸນນະພາບການພັດທະນາບຸກຄະລາກອນ ທາງດ້ານທິດສະດີການເມືອງ-ການປົກຄອງ ແລະ ວຽກງານວິຊາສະເພາະໄປພ້ອມໆກັນ ນັບແຕ່ປີ 2015-2020 ສະຖາບັນຄົ້ນຄວ້າ ແລະ ຝຶກອົບຮົມໄອຍະການ ໄດ້ເປີດຝຶກອົບຮົມ 12 ຊຸດ, ມີພະນັກງານເຂົ້າຮ່ວມ 835 ຄົນ, ຍິງ 254 ຄົນ, ໃນນັ້ນ, ຝຶກອົບຮົມດ້ານທິດສະດີການເມືອງ-ການປົກຄອງໄລຍະສັ້ນ 45 ວັນ 5 ຊຸດ, ມີພະນັກງານເຂົ້າຮ່ວມ 392 ຄົນ ຍິງ 127 ຄົນ, ຄຽງຄູ່ກັນນັ້ນໄດ້ຝຶກອົບຮົມວຽກງານໄອຍະການໃຫ້ແກ່ພະນັກງານວິຊາການທີ່ຈະກ້າວຂຶ້ນເປັນຜູ້ຊ່ວຍພະນັກງານໄອຍະການ 5 ຊຸດ, ມີຜູ້ເຂົ້າຮ່ວມ 395 ຄົນ ຍິງ 118 ຄົນ, ນອກຈາກນັ້ນ ຍັງໄດ້ຝຶກອົບຮົມວຽກງານໄອຍະການໃຫ້ແກ່ຜູ້ຊ່ວຍພະນັກງານໄອຍະການປະຊາຊົນ 1 ຊຸດ, ມີພະນັກງານເຂົ້າຮ່ວມ 48 ຄົນ ຍິງ 9 ຄົນ  ທັງໝົດນີ້ກໍແມ່ນເພື່ອສ້າງໃຫ້ພະນັກງານໄອຍະການມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຈັນຍາບັນ, ຈັນຍາທໍາ ແລະ ມີຄວາມເຂັ້ມແຂງທາງດ້ານວິຊາການ ເພື່ອປະຕິບັດໜ້າທີ່ຮັບໃຊ້ຊາດ, ຮັບໃຊ້ປະຊາຊົນດ້ວຍຄວາມບໍລິສຸດ ປະກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຕາມແນວທາງຂອງພັກຢ່າງແທ້ຈິງ.