ໃນຕອນເຊົ້າຂອງວັນທີ 17 ສິງຫາ 2021, ຄະນະພົວພັນຕ່າງປະເທດສູນກາງພັກ ໄດ້ຈັດຕັ້ງເຜີຍແຜ່ເຊື່ອມຊຶມວັນຢຶດອໍານາດທົ່ວປະເທດ 23 ສິງຫາ (23/8/1945 ແລະ 23/8/1975 – 23/8/2021)  ແລະ ວັນລັດຖະທໍາມະນູນແຫ່ງຊາດ ຄົບຮອບ 30 ປີ. ໃຫ້ກຽດປາຖະກະຖາໂດຍ ສະຫາຍ ທອງສະຫວັນ ພົມວິຫານ ກໍາມະການສູນກາງພັກ ເລຂາຄະນະພັກ  ຫົວໜ້າຄະນະພົວພັນຕ່າງປະເທດສູນກາງພັກ ໂດຍມີບັນດາສະຫາຍໃນຄະນະບໍລິຫານງານພັກ, ພະນັກງານ​ຫຼັກ​ແຫຼ່ງທົ່ວຄະນະພົວພັນຕ່າງປະເທດສູນກາງພັກ ເຂົ້າຮ່ວມຢ່າງພ້ອມພຽງ.

ການປາຖະກະຖາໃນຄັ້ງນີ້ ສະຫາຍຫົວໜ້າ ຄະນະພົວພັນຕ່າງປະເທດສູນກາງພັກໄດ້ຫວນຄືນມູນເຊື້ອການຕໍ່ສູ້ກູ້ຊາດອັນພິລະອາດຫານຂອງບັນພະບູລຸດດ້ວຍນໍ້າໃຈຮັກຊາດ, ຄຽດແຄ້ນຕໍ່ການກົດຂີ່ຂູດຮີດຂອງພວກລ່າເມືອງຂຶ້ນທັງເກົ່າ ແລະ ໃໝ່; ພາຍໃຕ້ການນໍາພາອັນຖືກຕ້ອງສະຫຼາດສ່ອງໃສຂອງພັກປະຕິວັດ ນັ້ນຄືພັກກອມມູນິດອິນດູຈີນໃນເມື່ອກ່ອນ, ພັກປະຊາຊົນ ປະຕິວັດລາວ ໃນປັດຈຸບັນສາມາດຍາດໄດ້ໄຊຊະນະ,  ສໍາເລັດການປະຕິວັດຊາດປະຊາທິປະໄຕໃນປີ 1975 ສະຖາປະນາເປັນ ສປປ ລາວ ຊຶ່ງເປັນການເປີດສັງກາດໃໝ່ໃຫ້ແກ່ການເປັນເຈົ້າຊາຕາກຳປະເທດຊາດ ຂອງປະຊາຊົນລາວ. ພາຍຫຼັງປະເທດຊາດໄດ້ຮັບການປົດປ່ອຍ ສປປ ລາວ ໄດ້ຫັນໄປສູ່ການຄຸ້ມຄອງເສດຖະກິດ - ສັງຄົມ ດ້ວຍກົດໝາຍ ຍ້ອນແນວນັ້ນ ລັດຖະທໍາມະນູນສະບັບທໍາອິດຂອງ ສປປ ລາວ ຈຶ່ງໄດ້ຖືກສ້າງຂຶ້ນ ແລະ ປະກາດໃຊ້ໃນວັນທີ 15 ສິງຫາ 1991 ເພື່ອຕອບສະໜອງຄວາມຮຽກຮ້ອງຕ້ອງການໃນການຈັດຕັ້ງປະຕິບັດນະໂຍບາຍປ່ຽນແປງໃໝ່ໃຫ້ເຂົ້າສູ່ລວງເລິກລັດຖະທໍາມະນູນສະບັບທໍາອິດ ຈຶ່ງໄດ້ຮັບການປັບປຸງ ໃນປີ 2003 ແລະ ປີ 2015 ຊຶ່ງແມ່ນສະບັບທີ່ນໍາໃຊ້ມາເຖິງປັດຈຸບັນ, ລັດຖະທໍາມະນູນແຫ່ງ ສປປ ລາວ ແມ່ນໝາກຜົນລວມຍອດຂອງການປະຕິວັດຊາດ-ປະຊາທິປະໄຕປະຊາຊົນ ພາຍໃຕ້ການນໍາພາຂອງພັກປະຊາຊົນ ປະຕິວັດລາວ ແລະ ແມ່ນຜົນງານອັນໃຫຍ່ຫຼວງ ຂອງປະຊາຊົນລາວບັນດາເຜົ່າ ໃນພາລະກິດປົກປັກຮັກສາ ແລະ ສ້າງສາປະເທດຊາດ ກໍຄືພາລະກິດປ່ຽນແປງໃໝ່ຮອບດ້ານ ມີຫຼັກການຂອງພັກ, ເປັນການຢືນຢັນເຖິງຄວາມເປັນເອກະລາດ, ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນ ຂອງປະເທດຊາດຕໍ່ສາກົນ; ທັງສ່ອງແສງຢ່າງຈະແຈ້ງ ແລະ ຄົບຖ້ວນເຖິງຄວາມມຸ້ງມາດປາຖະໜາອັນສູງສົ່ງ ແລະ ຄວາມເດັດດ່ຽວຕັດສິນໃຈຢ່າງແຮງກ້າ ຂອງວົງຄະນາຍາດແຫ່ງຊາດລາວ ເພື່ອພ້ອມກັນສູ້ຊົນບຸກບືນສ້າງລັດເຮົາໃຫ້ເປັນລັດທີ່ປົກຄອງດ້ວຍ ກົດໝາຍຈາກປະຊາຊົນ ໂດຍປະຊາຊົນ ແລະ ເພື່ອປະຊາຊົນຢ່າງແທ້ຈິງ ແນໃສ່ບັນລຸຈຸດໝາຍ: ປະຊາຊົນຮັ່ງມີຜາສຸກ, ປະເທດຊາດມັ່ງມີເຂັ້ມແຂງ, ສັງຄົມມີຄວາມສາມັກຄີເປັນປຶກແຜ່ນ, ມີປະຊາທິປະໄຕ, ຍຸຕິທໍາ ແລະ ສີວິໄລ.

ການປາຖະກະຖາໃນຄັ້ງນີ້ໄດ້ເປັນໂອກາດທີ່ດີ ເພື່ອໃຫ້ພະນັກງານຄະນະພົວພັນຕ່າງປະເທດສູນກາງພັກເຂົ້າໃຈໄດ້ຕື່ມກ່ຽວກັບມູນເຊື້ອປະຕິວັດ, ການຕໍ່ສູ້ອັນລະອິດລະອ້ຽວຂອງປະຊາຊົນລາວເພື່ອຍາດເອົາເອກະລາດແຫ່ງຊາດ; ເຂົ້າໃຈແຈ້ງເຖິງຄວາມສຳຄັນຂອງລັດຖະທຳມະນູນ, ພ້ອມກັນຈັດຕັ້ງປະຕິບັດລັດຖະທຳມະນູນ ແລະ ລະບຽບກົດໝາຍຕ່າງໆເພື່ອແນໃສ່ສ້າງລັດເຮົາເປັນລັດທີ່ຄຸ້ມຄອງດ້ວຍກົດໝາຍ, ນຳມາຜົນປະໂຫຍດຕົວຈິງມາສູ່ປະຊາຊົນລາວບັນດາເຜົ່າ.