ໜັງສືພິມ ປະຊາຊົນ

ສວສສຊ ປາຖະກະຖາວັນລັດຖະທໍາມະນູນ ຄົບຮອບ 30 ປີ

ເຜີຍແຜ່ໂດຍ: ທ່ານ ທອງດຳ ມິໂຍລາ ເວລາ: 23/08/2021 13:27:57 ຈຳນວນຢ້ຽມຊົມ 1722 ຄັ້ງ

ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ) ໄດ້ຈັດພິທີປາຖະກະຖາວັນລັດຖະທໍາມະນູນແຫ່ງຊາດ ຄົບຮອບ 30 ປີ (15/8/1991-15/8/2021), ໃນວັນທີ 23 ສິງຫານີ້ ທີ່ສວສສຊ ໃຫ້ກຽດປາຖະກະຖາ ໂດຍທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດ ປະທານກໍາມາທິການກົດໝາຍ ຮອງຫົວໜ້າຄະນະຮັບຜິດຊອບສະເຫຼີມສະຫຼອງວັນລັດຖະທໍາມະນູນແຫ່ງຊາດ ຄົບຮອບ 30 ປີ, ເຂົ້າຮ່ວມຮັບຟັງມີ ທ່ານ ສອນທະນູ ທໍາມະວົງ ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ມີພາກສ່ວນກ່ຽວຂ້ອງເຂົ້າຮ່ວມ.

ຈຸດປະສົງໃນການປາຖະກະຖາ ເພື່ອເຮັດໃຫ້ພະນັກງານ-ລັດຖະກອນ ພາຍໃນ ສວສສຊ ຮັບຮູ້,ເຂົ້າໃຈ ຄວາມໝາຍ, ຄວາມສໍາຄັນ ຂອງລັດຖະທໍາມະນູນ ກໍຄື ວັນລັດຖະທໍາມະນູນແຫ່ງຊາດ.

ໃນພິທີ, ທ່ານຈະເລີນ ເຢຍປາວເຮີ ໄດ້ຍົກໃຫ້ເຫັນ ປະຫວັດຄວາມເປັນມາຂອງ ວັນລັດຖະທໍາມະນູນແຫ່ງຊາດ ຊຶ່ງແມ່ນລັດຖະທຳມະນູນ ສະບັບທຳອິດ ຂອງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ຖືກພິຈາລະນາຮັບຮອງ ແລະ ປະກາດໃຊ້ໃນວັນທີ 15 ສິງຫາ 1991 ແລະ ໄດ້ຮັບການປັບປຸງ 2 ຄັ້ງຄື: ປີ 2003 ແລະ 2015 ທັງນີ້ ກໍເພື່ອແນໃສ່ຍົກສູງອໍານາດແຫ່ງລັດ ໃຫ້ມີປະສິດທິຜົນສູງ, ສ້າງບາດລ້ຽວໃໝ່ໃຫ້ແກ່ການປົກປັກຮັກສາ ແລະ ສ້າງສາປະເທດຊາດ, ການເຊື່ອມໂຍງເສດຖະກິດກັບພາກພື້ນ ແລະ ສາກົນໃນໄລຍະໃໝ່.

ທ່ານ ຈະເລີຍ ເຢຍປາວເຮີ ຍັງໄດ້ກ່າວຕື່ມວ່າ: ການປະກາດໃຊ້ລັດຖະທຳມະນູນ ມັນແມ່ນການສະຫຼຸບບັນດາໝາກຜົນ ແຫ່ງການຕໍ່ສູ້ ເພື່ອປົກປັກຮັກສາ ແລະ ພັດທະນາປະເທດຊາດຂອງປະຊາຊົນບັນດາເຜົ່າ; ການປະກາດໃຊ້ ແລະ ການປັບປຸງລັດຖະທຳມະນູນ ມັນມີຄວາມໝາຍຄວາມສຳຄັນຫຼາຍຕໍ່ ປະເທດຊາດ ກໍຄືປະຊາຊົນລາວທັງຊາດ ເພາະວ່າລັດຖະທຳມະນູນເປັນກົດໝາຍພື້ນຖານຂອງຊາດ, ທັງເປັນການຫັນເອົາແນວທາງປ່ຽນແປງໃໝ່ຢ່າງຮອບດ້ານທີ່ມີຫຼັກການຂອງພັກປະຊາຊົນ ປະຕິວັດລາວ ມາເປັນກົດໝາຍພື້ນຖານຂອງລະບອບ ປະຊາທິປະໄຕ ປະຊາຊົນລາວ ແນໃສ່ສຶກສາອົບຮົມ ປະຊາຊົນລາວບັນດາເຜົ່າ ໃຫ້ຍົກສູງນ້ຳໃຈຮັກຊາດ, ຮັກລະບອບໃໝ່, ເພີ່ມທະວີຄວາມສາມັກຄີປວງຊົນລາວທັງຊາດ, ເຊີດຊູບົດບາດເປັນເຈົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ຕາມຈຸດໝາຍທີ່ພັກໄດ້ກຳນົດໄວ້; ມັນເປັນເຫດການການເມືອງທີ່ສຳຄັນຂອງຊາດ, ທັງເປັນຂີດໝາຍໃໝ່ແຫ່ງການຫັນໄປສູ່ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍ ແລະ ການສ້າງລັດແຫ່ງກົດໝາຍເທື່ອລະກ້າວ ທີ່ສ່ອງແສງໃຫ້ເຫັນລັກສະນະທາດແທ້ ແລະ ການເຕີບໃຫຍ່ຂະຫຍາຍຕົວຂອງລະບອບ ປະຊາທິປະໄຕ ປະຊາຊົນລາວ ພາຍໃຕ້ການນຳພາອັນຖືກຕ້ອງຂອງພັກປະຊາຊົນ ປະຕິວັດລາວ, ທັງເປັນການຢັ້ງຢືນຕໍ່ໂລກກ່ຽວກັບ ຄວາມເປັນເອກະລາດ ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງ ສປປ ລາວ.