ໂດຍ: ວັນໄຊ ຕະວິນຍານ

       ວຽກງານວັດທະນະທໍາ-ສັງຄົມ ເປັນວຽກງານໜຶ່ງທີ່ເປັນສ່ວນປະກອບອັນສໍາຄັນ ຕໍ່ຜົນສໍາເລັດໃນການພັດທະນາເສດຖະກິດ ໄປຄ່ຽງຄູ່ກັບການລົງທຶນພັດທະນາດ້ານອື່ນໆ. ແຂວງວຽງຈັນ ຍັງເພີ່ມຄວາມເອົາໃຈໃສ່ຢ່າງຕັ້ງໜ້າຕໍ່ການປະຕິບັດຄາດໜາຍດ້ານສັງຄົມ.

      ຕະຫຼອດ 5 ປີ ຜ່ານມາ (2016-2020) ແຂວງວຽງຈັນ ສາມາດສ້າງບ້ານ​ພັດທະນາ​​ໄດ້ 16 ບ້ານ, ຈາກ 190 ບ້ານ​ໃນ​ ປີ 2016 ມາ​ເປັນ 206 ​ບ້ານ ໃນ​ປີ 2020 ເທົ່າ​ກັບ 56,43% ຂອງ​ແຜນການ (​​ແຜນ 365 ບ້ານ) ​ແລະ ສ້າງຄອບຄົວ​ພັດທະນາ​ໄດ້ 2.396 ຄອບຄົວ ຈາກ 71.034 ຄອບຄົວ​ ໃນ​ປີ 2016 ມາ​ເປັນ 73.430 ຄອບຄົວໃນ ​ປີ 2020 ​ເທົ່າ​ກັບ 93,5% ຂອງ​ແຜນການ (ແຜນ 78.534 ຄອບ​ຄົວ). ປັບປຸງຄຸນນະພາບການສຶກສາຊັ້ນຕ່າງໆໃຫ້ດີຂຶ້ນເທື່ອລະກ້າວ ໂດຍສະເພາະອັດຕາເຂົ້າຮຽນສຸດທິຊັ້ນປະຖົມສຶກສາປະຕິບັດໄດ້ 100% ລື່ນ​ແຜນ 0,5%, ອັດຕາເຂົ້າຮຽນລວມຊັ້ນມັດທະຍົມຕອນຕົ້ນປະຕິບັດໄດ້ 93,5% ລື່ນ​ແຜນ 1%, ອັດຕາເຂົ້າຮຽນລວມຊັ້ນມັດທະຍົມປາຍປະຕິບັດ​ໄດ້ 61% (​ແຜນ 64,7%) ແລະ ທຸກໆເມືອງທົ່ວແຂວງສາມາດປະກາດຈົບຊັ້ນມັດທະຍົມຕອນຕົ້ນບໍາລຸງ. ອັດຕາເດັກນໍ້າໜັກຫຼຸດມາດຖານປະຕິບັດໄດ້ 6,7% ​(​ແຜນ 12,6%) ​ແລະ ອັດຕາເດັກລວງສູງບໍ່ໄດ້ມາດຖານປະຕິບັດ 11,5% (​ແຜນ 23,1%). ອັດຕາ​ການ​ຕາຍ​ຂອງ​​ເດັກ​ລຸ່ມ 1 ປີປະຕິບັດໄດ້ 8/1.000 ຂອງເດັກເກີດມີຊີວິດ (ແຜນ 22,7/1.000 ຂອງເດັກເກີດມີຊີິວິດ) ​ແລະ ອັດຕາ​ການ​ຕາຍ​ຂອງ​​ເດັກ​ລຸ່ມ 5 ປີ ປະຕິບັດໄດ້ 9/1.000 ຂອງເດັກເກີດມີຊີວິດ (ແຜນ 22,9/1.000 ຂອງເດັກເກີດມີຊີວິດ). ອັດຕາ​ການ​ຕາຍ​ຂອງ​ແມ່ປະຕິບັດໄດ້ 125/100.000 ຂອງ​ເດັກ​ເກີດ​ມີ​ຊີວິດ (ແຜນ 150/100.000 ຂອງເດັກເກີດມີຊີວິດ). ປະ​ຊາ​ຊົນສາ​ມາດ​ເຂົ້າ​​ເຖິງ​ການປິ່ນ​ປົວ​ສຸ​ຂະ​ພາບ, ສາ​ມາດຮັບ​ປະ​ກັນ​ຄຸນ​ນະ​ພາບ​ຂອງ​ອາ​ຫານ ແລະ ຢາໂດຍ​ພື້ນ​ຖານ.

ປັດ​ຈຸ​ບັນ, ປະ​ຊາ​ກອນ​ແຂວງວຽງ​ຈັນ ​ມີ​ອາ​ຍຸ​ຍືນ​ສະ​ເລ່ຍ 71 ປີ, ອັດຕາການ​ຊົມ​ໃຊ້​ນ້ຳສະອາດກວ​ມ​ເອົາ 85% (ແຜນ 88%) ​ແລະ ອັດຕາ​​ໃຊ້​ວິດຖ່າຍກວມເອົາ 93,12% (ແຜນ 80%) ກອງທຶນປະກັນສຸຂະພາບແຫ່ງຊາດກວມເອົາ 100% ຂອງພົນລະເມືອງທົ່ວແຂວງ. ສ້າງ​ບ້ານ​​ແບບ​ຢ່າງດ້ານສາທາລະນະ​ສຸກ​ໄດ້ 90 ບ້ານ,​ ລວມມີບ້ານ​ແບບຢ່າງ​ສາທາລະນະ​ສຸກທັງໝົດ 389 ບ້ານ ກວມ​ເອົາ 92,18% ຂອງ​ຈໍານວນບ້ານ​ທັງ​ໝົດ. ຝຶກອົບຮົມສີມືແຮງງານໃຫ້ມີວິຊາການ​ໃດ​ໜຶ່ງ ແລະ ສາມາດປະກອບອາຊີບໄດ້ 17.201 ຄົນ ເທົ່າກັບ 137,60% ຂອງແຜນການ (​ແຜນ 12.500 ຄົນ), ຂະຫຍາຍຂອບເຂດການປົກຄຸມຂອງລະບົບປະກັນສັງຄົມ ແລະ ປະກັນສຸຂະພາບ​ໄດ້ 100% ຂອງພົນລະເມືອງທົ່ວແຂວງ (​ແຜນ 75%); ປະຕິບັດນະໂຍບາຍຕໍ່ຜູ້ມີຄຸນງາມຄວາມດີຕໍ່ປະເທດຊາດໄດ້ 961 ຄົນ                  (​ແຜນ 500 ຄົນ). ສ້າງຄອບຄົວວັດທະນາທຳໄດ້ 21.135 ຄອບຄົວ (​ແຜນ 25.000 ຄອບຄົວ) ລວມມີ​ຄອບຄົວ​ວັດທະນາ​ທຳ​ທັງ​ໝົດ 66.603 ຄອບຄົວ ​ເທົ່າ​ກັບ 75,25%  ຂອງ​ຄອບຄົວ​ໃນ​ທົ່ວ​ແຂວງ, ສ້າງບ້ານວັດທະນະທໍາ​ໄດ້ 135 ບ້ານ (​ແຜນ 158 ບ້ານ) ລວມມີ​ບ້ານ​ວັດທະນະທຳ​ທັງ​ໝົດ 387 ບ້ານ ເທົ່າກັບ 91,70% ຂອງຈໍານວນບ້ານທັງໝົດ, ສ້າງກຸ່ມບ້ານວັດທະນະໄດ້ 12 ກຸ່ມ ລວມມີກຸ່ມວັດທະນະທໍາທັງໝົດ 20 ກຸ່ມ. ກວດກາ​ປະ​ເມີນ​ຄືນ​ບ້ານ​ວັດທະນະທຳ​ທີ່​ປະກາດ​​ຮັບຮອງແລ້ວໄດ້ 56 ບ້ານ ​ແລະ 20.047 ຄອບຄົວ.

5 ປີຜ່າມາ, ມີນັກທ່ອງທ່ຽວເຂົ້າມາແຂວງມີ​ທັງໝົດ 3,12 ລ້ານເທື່ອຄົນ (​ແຜນ 3,39 ລ້ານ​ເທື່ອ​ຄົນ) ເທົ່າກັບ 92% ຂອງແຜນການ  ​ແລະ ສາມາດສ້າງລາຍຮັບເຂົ້າໃນສັງຄົມໄດ້ 1.014 ຕື້ກີບ ຫຼື ສະເລ່ຍປີລະ  202,80 ຕື້ກີບ (ແຜນ 72 ຕື້ກີບ). ສ້າງ​ ​ແລະ ປະ​ເມີນບ້ານ​​​ແບບຢ່າງປະຕິບັດ​ກົດໝາຍໄດ້ 266 ບ້ານ,​ ລວມ​ມີ​ບ້ານ​ແບບ​ປະຕິບັດ​ກົດໝາຍ​ທັງ​ໝົດ 386 ບ້ານ ​ເທົ່າກັບ 91,46% ຂອງ​ບ້ານ​ທັງ​ໝົດ ​ແລະ ຄອບ​ຄົວ​​ໄດ້ 45.008 ຄອບ​ຄົວ, ​ປັດຈຸ​ບັນ​ມີ​ຄອບຄົວ​ທັງ​ໝົດ 76.809 ຄອບຄົວ, ກວມ​ເອົາ 83,20% ຂອງ​ຄອບຄົວ​ທັງ​ໝົດ.