ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດຊຸດຝຶກອົບຮົມກ່ຽວກັບຂັ້ນຕອນການສ້າງ ແລະ ປັບປຸງກົດໝາຍ ແລະ ການຂຽນບົດປະເມີນໃນຂົງເຂດ ຖວທ (ຊຸດທີ I) ໃນວັນທີ 18 ພະຈິກນີ້ ທີ່ກະຊວງ ຖວທ ໂດຍການເປັນປະທານຂອງ ທ່ານ ບົວໄລ ພານຸວົງ ຫົວໜ້າຫ້ອງການກະຊວງ ຖວທ, ທ່ານ ພັນໂນລາ ທອງຈັນ ຮອງຫົວໜ້າກົມກົດໝາຍ ກະຊວງຍຸຕິທຳ, ມີບັນດາຫົວໜ້າກົມ-ຮອງກົມ, ຫົວໜ້າພະແນກ ພ້ອມດ້ວຍພະນັກງານວິຊາການເຂົ້າຮ່ວມ.

      ທ່ານ ບົວໄລ ພານຸວົງ ກ່າວວ່າ:  ຊຸດຝຶກອົບຮົມໃນຄັ້ງນີ້ໄດ້ຈັດຂຶ້ນເປັນເວລາ 2 ວັນ ແລະ ໄດ້ແບ່ງອອກເປັນ 2 ຊຸດ ຊຶ່ງເນື້ອໃນ ແລະ ເອກະສານທີ່ນໍາມາບັນຍາຍໃນຄັ້ງນີ້ປະກອບມີຫົວຂໍ້: ຂັ້ນຕອນການສ້າງ ແລະ ປັບປຸງກົດໝາຍ, ການຂຽນບົດປະເມີນຜົນກະທົບຂອງຮ່າງກົດໝາຍ, ນອກຈາກນັ້ນຜູ້ເຂົ້າຮ່ວມຍັງໄດ້ແລກປ່ຽນບົດຮຽນ, ປະສົບການຕື່ມອີກ.

      ຈຸດປະສົງໃນການຝຶກອົບຮົມໃນຄັ້ງນີ້ເພື່ອສ້າງຄວາມຮູ້ ຄວາມເຂົ້າໃຈຢ່າງຖືກຕ້ອງກ່ຽວກັບຂະບວນການ, ຂັ້ນຕອນຂອງການຮ່າງ ແລະ ສ້າງນິຕິກຳ ລວມທັງແນະນຳກ່ຽວກັບການຂຽນບົດປະເມີນຜົນກະທົບຂອງຮ່າງກົດໝາຍໃຫ້ບັນດາພະນັກງານຂັ້ນກົມ ແລະ ວິຊາການເພື່ອໃຫ້ມີຄວາມເປັນເອກະພາບ ສອດຄ່ອງຕາມລະບຽບ ແລະ ຫຼັກການໃນການສ້າງກົດໝາຍຂອງກະຊວງຍຸຕິທຳໄດ້ກຳນົດໄວ້ ແລະ ສາມາດນໍາໄປໝູນໃຊ້ເຂົ້າໃນວຽກງານຕົວຈິງຂະແໜງການຕົນ ໃຫ້ແທດເໝາະ ແລະ ມີປະສິດທິຜົນ.

ຂ່າວ-ພາບ: ພູວັນ