ຄະນະຮັບຜິດຊອບການຄົ້ນຄວ້າແນວຄິດ ໄກສອນ ພົມວິຫານ ສະຖາບັນການເມືອງ-ການປົກຄອງແຫ່ງຊາດ (ສມປຊ) ຮ່ວມກັບກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ຈັດກອງປະຊຸມປຶກສາຫາລືຄົ້ນຄວ້າກ່ຽວກັບແນວຄິດ ໄກສອນ ພົມວິຫານ ໃນວຽກງານຖະແຫຼງຂ່າວ ຂຶ້ນໃນວັນທີ 10 ມີນາ ນີ້ ທີ່ກະຊວງ ຖວທ ໂດຍພາຍໃຕ້ການເປັນປະທານ ຂອງທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງ ຖວທ; ທ່ານ ດາວສະຫັວນ ເຄືອມີໄຊ ຫົວໜ້າສູນຄົ້ນຄວ້າແນວຄິດໄກສອນ ພົມວິຫານ ມີອະດີດລັດຖະມົນຕີ, ຮອງລັດຖະມົນຕີກະຊວງ ຖວທ ແລະ ບັນຫົວໜ້າກົມ-ຮອງກົມ, ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ກະຊວງ ຖວທ ໄດ້ກ່າວລາຍງານຫຍໍ້ ແລະ ນໍາສະເໜີຮ່າງຫົວຂໍ້ຍ່ອຍຂອງຄະນະຄົ້ນຄວ້າແນວຄິດ ໄກສອນ ພົມວິຫານ ກ່ຽວກັບວຽກງານຖະແຫຼງຂ່າວໃນໄລຍະຜ່ານມາວ່າ: ກອງປະຊຸມຄັ້ງນີ້ ເພື່ອປຶກສາຫາລືໃຫ້ຄະນະສະຫຼຸບຖອດຖອນບົດຮຽນວຽກງານຄົ້ນຄວ້າແນວຄິດ ໄກສອນ ພົມວິຫານ ປີ 2021 ແລະ ວາງທິດທາງແຜນ ປີ 2022 ທີ່ ສມປຊ ພ້ອມທັງໄດ້ສະເໜີ 4 ຫົວຂໍ້ຍ່ອຍ ແລະ ໄດ້ຮັບຄໍາຄິດເຫັນຈາກກອງປະຊຸມໃຫ້ດັດປັບຫົວຂໍ້ຍ່ອຍໃຫ້ເໝາະສົມຂຶ້ນ. ດັ່ງນັ້ນ ຄະນະຮັບຜິດຊອບ ເພື່ອດັດປັບ ແລະ ເລືອກຫົວຂໍ້ຍ່ອຍໃໝ່ຈໍານວນ 3 ຫົວຂໍ້ມີ: ແນວຄິດໄກສອນ ພົມວິຫານ ຕໍ່ວຽກງານໂຄສະນາ ເພື່ອປຸກລະດົມຂົນຂວາຍທົ່ວສັງຄົມປະກອບສ່ວນເຂົ້າໃນການຕໍ່ສູ້ຈັກກະພັດຜູ້ຮຸກຮານເພື່ອປົດປ່ອຍປະເທດຊາດຢູ່ເຂດປົດປ່ອຍ ໄລຍະກ່ອນປີ 1975 ຕາມແນວຄິດໄກສອນ ພົມວິຫານ; ວຽກງານພັກ, ພະນັກງານ ຂະແໜງຖະແຫຼງຂ່າວ ສື່ມວນຊົນ ໃນໄລຍະປົກປັກສ້າງສາ ແລະ ພັດທະນາປະເທດຊາດ ໃນໄລຍະຫຼັງຈາກສໍາເລັດການປົດປ່ອຍປະເທດຊາດ, ໄລຍະຮໍາບາດແຜ່ສົງຄາມ ແລະ ວຽກງານໂຄສະນາ ປຸກລະດົມຂະບວນການໃນໄລຍະປ່ຽນແປງໃໝ່ຮອບດ້ານ ແລະ ມີຫຼັກການຂອງພັກ ຕາມແນວຄິດ ໄກສອນ ພົມວິຫານ.

ໃນກອງປະຊຸມຄັ້ງນີ້ ຜູ້ເຂົ້າຮ່ວມຍັງໄດ້ພ້ອມກັນປຶກສາຫາລືເພື່ອກໍານົດເອົາຫົວຂໍ້ຍ່ອຍ ກໍານົດໂຄງຮ່າງຂອງບົດ ຮັບຟັງຄໍາຄິດຄໍາເຫັນ ຮັບຟັງການນໍາສະເໜີວິທີວິທະຍາໃນການຄົ້ນຄວ້າແນວຄິດ ໄກສອນ ພົມວິຫານ ຕື່ມອີກ.

ຂ່າວ-ພາບ: ຍຸພິນທອງ