ຫວ່າງບໍ່ດົນມານີ້ ທີ່ຫ້ອງວ່າການເມືອງຫົງສາ ແຂວງໄຊຍະບູລີ ໄດ້ຈັດກອງປະຊຸມພົບປະແລກປ່ຽນບົດຮຽນລະຫວ່າງອົງການກາແດງເມືອງຫົງສາ ແລະ ອົງການກາແດງເມືອງຊຽງຮ່ອນ ໂດຍການເປັນປະທານຮ່ວມຂອງ ທ່ານ ຈັນເພັງ ອູ່ທອງຄຳ ຮອງເຈົ້າເມືອງຫົງສາ ແລະ ທ່ານ ບຸນຈັນ ແກ້ວວິຊາ ຮອງເຈົ້າເມືອງຊຽງຮ່ອນ, ມີຫົວໜ້າອົງການກາແດງສອງເມືອງດັ່ງກ່າວ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້, ທັງສອງອົງການໄດ້ລາຍງານສະພາບລວມຂອງການຈັດຕັ້ງປະຕິບັດໜ້າວຽກທີ່ຮັບຜິດ ຊອບ ພ້ອມທັງແລກປ່ຽນຄຳຄິດຄຳເຫັນຕໍ່ບັນຫາຕ່າງໆໃນການເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຂອງອົງການກາແດງທັງສອງເມືອງເຊັ່ນ: ການໂຄສະນາຮັບບໍລິຈາກເລືອດ, ການນຳໃຊ້ທຶນເຂົ້າໃນການປະຕິບັດໜ້າທີ່ວຽກງານ, ການອອກບັດໃຫ້ຜູ້ມາບໍລິຈາກເລືອດ, ການລະດົມບໍລິຈາກເລືອດ ແລະ ການນຳໃຊ້ເລືອດ-ການສົ່ງຕໍ່ໃຫ້ແຂວງ.

      ຂ່າວໃຫ້ຮູ້ອີກວ່າ: ໃນວັນດຽວກັນ, ທີ່ສະໂມສອນເມືອງຫົງ​ສາ ໄດ້ຈັດພິທີເຜີຍແຜ່ຜົນສຳເລັດກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ VIII ໂດຍການເຜີຍແຜ່ຂອງທ່ານນາງ ຄຳຜິວ ພັນທະວົງ ປະທານສະຫະ ພັນແມ່ຍິງແຂວງໄຊຍະບູລີ, ມີທ່ານນາງ ດາວວິນ ລາດຊະກິດ ຮອງເລຂາພັກເມືອງຫົງສາ ຜູ້ຊີ້ນຳວຽກງານພັກ-ພະນັກງານ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ໃນພິທີຜູ້ເຂົ້າຮ່ວມໄດ້ພ້ອມກັນຮັບຟັງມະຕິກອງປະຊຸມໃຫຍ່ຜູ້ແທນແມ່ຍິງທົ່ວປະເທດ ຄັ້ງທີ VIII, ມະຕິຕົກລົງສະບັບເລກທີ 242/ຄລສພ ວ່າດ້ວຍການຮັບຮອງເອົາຄະນະບໍລິຫານງານສະຫະພັນແມ່ຍິງລາວ ສະໄໝທີ VIII, ບົດໂອ້ລົມຂອງ ທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ ຕໍ່ກອງປະຊຸມໃຫຍ່ຜູ້ແທນແມ່ຍິງທົ່ວປະເທດ, ມະຕິ 108/ກມສພ ວ່າດ້ວຍວຽກງານມະຫາຊົນຂອງພັກໃນໄລຍະໃໝ່, ກົດລະບຽບຂອງສະຫະພັນແມ່ຍິງລາວ ສະໄໝທີ VIII ແລະ ແຜນພັດທະນາແມ່ຍິງແຂວງໄຊຍະບູລີ 5 ປີ 2021-2025.

ກອງປະຊຸມຄັ້ງນີ້, ຈັດຂຶ້ນເພື່ອເປັນການເຜີຍແຜ່ໃຫ້ອຳນາດປົກຄອງເມືອງ, ຄະນະບໍລິຫານງານສະຫະ ພັນແມ່ຍິງເມືອງ ແລະ ສະມາຊິກແມ່ຍິງໄດ້ຮັບຮູ້ ແລະ ເຂົ້າໃຈ ເພື່ອພ້ອມກັນນຳເອົາເນື້ອໃນດັ່ງກ່າວໄປຈັດຕັ້ງປະຕິບັດໃຫ້ໄດ້ຮັບຜົນສຳເລັດຕາມລະດັບຄາດໝາຍທີ່ວາງອອກ.

ຂ່າວ-ພາບ: ກິດຕິສັກ ບົວໄລ