ໜັງສືພິມ ປະຊາຊົນ

ເລຂາ ຄຊປປລ ສູນກາງຢ້ຽມຢາມ ແລະ ເຮັດວຽກຢູ່ແຂວງໄຊຍະບູລີ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 04/05/2022 11:37:40 ຈຳນວນຢ້ຽມຊົມ 22986 ຄັ້ງ

ໃນລະຫວ່າງວັນທີ 2-4 ພຶດສະພານີ້ ທີ່ຫ້ອງການຊາວໜຸ່ມແຂວງໄຊຍະບູລີ, ສະຫາຍ ມອນໄຊ ລາວມົວຊົ່ງ ກຳມະການສຳຮອງສູນກາງພັກ ເລຂາ ຄະນະບໍລິຫານງານສູນກາງຊາວໜຸ່ມ ປປລ (ຄຊປປລ) ພ້ອມດ້ວຍທີມງານໄດ້ເດີນທາງຢ້ຽມຢາມ ແລະ ເຮັດວຽກຢູ່ແຂວງໄຊຍະບູລີ ໃຫ້ກຽດຕ້ອນຮັບຂອງ ສະຫາຍ ໜູໄຊ ນໍກີຢາ ກຳມະການສູນກາງຊາວໜຸ່ມ ປປລ ເລຂາຄະນະບໍລິຫານງານຊາວໜຸ່ມແຂວງໄຊຍະບູລີ ພ້ອມຄະນະ.

ການເຄື່ອນໄຫວເຮັດວຽກໃນຄັ້ງນີ້, ສະຫາຍ ໜູໄຊ ນໍກີຢາ ໄດ້ລາຍງານໂດຍຫຍໍ້ກ່ຽວກັບການເຄື່ອນໄຫວວຽກງານຊາວໜຸ່ມໃນທົ່ວແຂວງ ໂດຍສະເພາະວຽກງານຂະບວນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກ, ວຽກງານສຶກສາອົບຮົມຊາວໜຸ່ມ-ໄວໜຸ່ມ ແລະ ເຍົາວະຊົນ; ໃນໂອກາດດັ່ງກ່າວ, ສະຫາຍ ມອນໄຊ ລາວມົວຊົ່ງ ໄດ້ໃຫ້ກຽດໂອ້ລົມຕໍ່ພະນັກງານການນຳຊາວໜຸ່ມແຂວງ ແລະ ໃຫ້ທິດຊີ້ນໍາບາງບັນຫາຕໍ່ກັບວຽກງານຊາວໜຸ່ມ. ຈາກນັ້ນກໍໄດ້ເຂົ້າພົບ ສະຫາຍ ດວງຕາ ໄຊວຸດ ຮອງເລຂາຄະນະບໍລິຫານງານພັກແຂວງ ຜູ້ຊີ້ນຳວຽກງານພັກ-ພະນັກງານເພື່ອຂໍທິດຊີ້ນຳໃນການເຄື່ອນໄຫວວຽກງານຊາວໜຸ່ມ ແລະ ວຽກງານປັບປຸງກົງຈັກການຈັດຕັ້ງຄະນະບໍລິຫານງານຊາວໜຸ່ມແຂວງ ພ້ອມດຽວກັນນັ້ນຍັງໄດ້ລົງໄປຢ້ຽມຢາມຄອບຄົວຕົວແບບ ແລະ ເຄື່ອນໄຫວຊຸກຍູ້ວຽກງານຊາວໜຸ່ມຢູ່ເມືອງຫົງສາ ແລະ ເມືອງເງິນຕື່ມອີກ.

ຂ່າວ-ພາບ: ໄຊຍະບູລີ

ຂ່າວທີ່ໄດ້ຮັບຄວາມນິຍົມ