ນະຄອນປາກເຊ ແຂວງ​ຈຳ​ປາ​ສັກ ໄດ້ເປີດຊຸດຝຶກອົບຮົມກົດໝາຍລະບົບ 45 ວັນ ຮຸ່ນທີ III ປະຈຳປີ 2022 ຂຶ້ນ ໃນວັນທີ 3 ພຶດສະພາ ຜ່ານມານີ້ ​ໂດຍ​ການໃຫ້ກຽດເຂົ້າຮ່ວມຂອງ ທ່ານນາງ ພົງພັນ ວິລະພັນ ຮອງເລຂາພັກນະຄອນ ປະທານກວດການະຄອນ, ມີຄະນະປະຈຳພັກ, ກຳມະການພັກ, ຫົວໜ້າຫ້ອງການ, ນັກສຳມະນາກອນເຂົ້າຮ່ວມ.

     ທ່ານນາງ ບຸນເທດ ສີຫາວົງ ກຳມະການພັກນະຄອນ ຫົວໜ້າຫ້ອງການຍຸຕິທຳນະຄອນ ໄດ້ຂຶ້ນຜ່ານບົດລາຍງານກະກຽມຄວາມພ້ອມ ແລະ ຂໍ້ຕົກລົງຂອງເຈົ້ານະຄອນ ວ່າດ້ວຍ ການອະນຸນັດເປີດຊຸດຝຶກອົບຮົມກົດ               ໝາຍ 45 ວັນ ຮຸ່ນທີ III ໃຫ້ແກ່ເປົ້າໝາຍທີ່ຖືກຄັດເລືອກເຂົ້າຝຶກອົບຮົມຕາມມາດຖານເງື່ອນໄຂ ຈຳນວນ 51 ຄົນ ຍິງ 14 ຄົນ ຊຶ່ງມາຈາກບ້ານ 23 ຄົນ ຍິງ 6 ຄົນ, ຈາກຫ້ອງການອ້ອມຂ້າງນະຄອນ 9 ຄົນ ຍິງ 6 ຄົນ, ນັກທຸລະກິດໜຸ່ມ 14 ຄົນ ຍິງ 2 ຄົນ, ພະສົງ 5 ອົງ, ການຝຶກອົບຮົມກົດໝາຍຄັ້ງນີ້, ເພື່ອພັດທະນາຊັບພະ ຍາກອນມະນຸດໃຫ້ມີຄວາມຮູ້ດ້ານວິຊາສະເພາະກົດໝາຍ, ກໍ່ສ້າງພະນັກງານນຳພາ-ຄຸ້ມຄອງ, ພະນັກງານສືບທອດໃຫ້ກຳແໜ້ນທັງຫຼັກການ, ທິດສະດີ, ພຶດຕິກຳ ແລະ ວິທີແກ້ໄຂບັນຫາຕ່າງໆບົນພື້ນຖານລະບຽບກົດໝາຍ ເພື່ອເຮັດໃຫ້ການຊີ້ນຳ-ນຳພາຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ມີຄວາມສອດຄ່ອງ, ກົມກຽວໃຫ້ເປັນໄປຕາມລັດຖະທຳມະນູນ ແລະ ກົດໝາຍ ຊຶ່ງເປັນພື້ນຖານສຳຄັນໃຫ້ແກ່ການສ້າງລັດ ປະຊາທິປະໄຕ ປະຊາຊົນໃຫ້ເປັນລັດແຫ່ງກົດໝາຍຂອງປະຊາຊົນ ໂດຍປະຊາຊົນ ເພື່ອຜົນປະໂຫຍດຂອງປະຊາຊົນໄປເທື່ອລະກ້າວ, ຮັບປະກັນໃຫ້ແກ່ການບໍລິຫານມີປະສິດທິຜົນເສີມຂະຫຍາຍສິດເປັນເຈົ້າຂອງປະເທດຊາດຂອງປະຊາຊົນບັນດາເຜົ່ານັບມື້ກວ້າງຂວາງເລິກເຊິ່ງ.

ຂ່າວ-ພາບ: ຈັນທອນ ກົມໄຊຊະນະ