ເມືອງຫ້ວຍຊາຍ ແຂວງບໍ່ແກ້ວ ໄດ້ຈັດພິທີປາຖະກະຖາຫວນຄືນມູນເຊື້ອວັນກຳມະກອນສາກົນ ຄົບຮອບ 136 ປີຂຶ້ນໃນວັນທີ 4 ພຶດສະພາ ນີ້ ທີ່ສູນຝຶກອົບຮົບຂອງເມືອງ, ໂດຍ​ການ​ເຂົ້າ​ຮ່ວມ​ຂອງ ທ່ານ ທອງພັນ ຈັນທະວົງ ຄະນະປະຈຳພັກເມືອງ ປະທານແນວລາວສ້າງຊາດເມືອງ, ມີບັນດາພະນັກງານຫຼັກແຫຼ່ງທີ່ກ່ຽວຂ້ອງເຂົ້າຮ່ວມ.

      ທ່ານ ທອງພັນ ຈັນທະວົງ ໄດ້ຫວນຄືນການກຳເນີດວັນກຳມະກອນສາກົນ ວັນທີ 1 ພຶດສະພາ 1886 ຊຶ່ງເປັນຂະບວນການຕໍ່ສູ້ເພື່ອທວງສິດ ແລະ ຜົນປະໂຫຍດຂອງຊົນຊັ້ນກຳມະກອນຢູ່ບັນດາປະເທດທຶນນິຍົມໃນທົ່ວໂລກ  ພາຍໃຕ້ການປົກຄອງຂອງພວກນາຍທຶນໃນເວລານັ້ນຊົນຊັ້ນກຳມະກອນໄດ້ຖືກກົດຂີ່ຂູດຮີດນັບມື້ຍິ່ງໜັກໜ່ວງ ພວກເຂົາໃຫ້ກຳມະກອນອອກແຮງງານສຸດທີ່ລຳບາກ, ມີຄວາມສ່ຽງສູງຕໍ່ຊີວິດ, ບໍ່ມີເວລາພັກຜ່ອນ ແລະ ເຮັດວຽກມື້ໜຶ່ງ 14-15 ຊົ່ວໂມງ, ແຕ່ໄດ້ຮັບຄ່າແຮງງານຕ່ຳ, ບໍ່ມີລະບົບປ້ອງກັນສຸຂະພາບ, ໃນສະຖານທີ່ເຮັດວຽກບໍ່ມີຄວາມປອດ       ໄພ, ບໍ່ເອົາໃຈໃສ່ດ້ານສະຫວັດດີການ-ສັງຄົມ ຈຶ່ງພາໃຫ້ເກີດຂໍ້ຂັດແຍ່ງລະຫວ່າງກຳມະກອນ ແລະ ນາຍທຶນນັບມື້ເພີ່ມທະວີຄວາມຮຸນແຮງ ຈົນກ້າວໄປສູ່ຂະບວນການລຸກຮືຂຶ້ນຕໍ່ສູ້ຄັ້ງທຳອິດຂອງຊົນຊັ້ນກຳມະກອນຢູ່ທີ່ປະເທດອັງກິດ ໃນປີ 1.764 ພ້ອມທັງຈັດຕັ້ງອົງການກຳມະບານຂຶ້ນເພື່ອເປັນຕົວແທນນຳພາປົກປ້ອງສິດ, ຜົນປະໂຫຍດຂອງຕົນ. ມາຮອດວັນທີ 1 ພຶດສະພາ 1886 ເປັນເທື່ອທໍາອິດທີ່ຊົນຊັ້ນກໍາມະກອນ-ຊາວຜູ້ອອກແຮງງານ ໄດ້ພ້ອມກັນນັດຢຸດງານເຖິງ 5 ພັນແຫ່ງຢູ່ບັນດາຕົວເມືອງໃຫຍ່ຂອງປະເທດອາເມຣິກາ, ມີຜູ້ເຂົ້າຮ່ວມເຖິງ 3 ແສນ 4 ໝື່ນຄົນ ເພື່ອຮຽກຮ້ອງໃຫ້ພວກນາຍທຶນຕ້ອງປະຕິບັດຕາມການສະເໜີທີ່ວ່າ (ແຕ່ນີ້ຕໍ່ໄປກຳມະກອນຕ້ອງເຮັດວຽກບໍ່ເກີນ 8 ຊົ່ວໂມງຕໍ່ມື້, 8 ຊົ່ວໂມງພັກຜ່ອນ ແລະ 8 ຊົ່ວໂມງຮຽນ). ຈາກເຫດການຂອງວັນທີ 1 ພຶດສະພາ 1886 ມັນໄດ້ສ້າງກະແສອັນແຂງ ແຮງເຖິງຂະບວນການຕໍ່ສູ້ຂອງຊົນຊັ້ນກໍາມະກອນຢູ່ທະວີບເອີຣົບ ແລະ ທະວີບອາເມຣິກາ, ຕໍ່ສະພາບການດັ່ງກ່າວ ໃນວັນທີ 14 ກໍລະກົດ ປີ 1889 ກອງປະຊຸມພັກກອມມູນິດສາກົນຄັ້ງທີ II ໄດ້​ເປີດຂຶ້ນຢູ່ທີ່ນະຄອນຫຼວງປາຣີ ປະເທດຝຣັ່ງ ເພື່ອປະຕິບັດຄໍາຂວັນມື້ໜຶ່ງເຮັດວຽກ 8 ຊົ່ວໂມງ ແລະ ກໍານົດເອົາວັນທີ 1 ພຶດສະພາ 1886 ເປັນວັນກໍາມະກອນສາກົນ ທີ່ຖືເປັນວັນບຸນໃຫຍ່ຂອງຊົນຊັ້ນກຳມະກອນໃນທົ່ວໂລກ, ເວົ້າລວມ, ເວົ້າສະເພາະຢູ່ສາທາລະນະລັດ ປະຊາທິປະໄຕ ປະຊາຊົນລາວ ທຸກໆປີຊົນຊັ້ນກໍາມະກອນ-ຊາວຜູ້ອອກແຮງງານ ໄດ້ຈັດງານໂຮມຊຸມນຸມໃຫຍ່ເພື່ອລະນຶກເຖິງມູນເຊື້ອຄວາມສາມັກຄີຕໍ່ສູ້ປົກປ້ອງສິດ, ຜົນປະໂຫຍດອັນຊອບທໍາ, ເປັນຂີດໝາຍສໍາຄັນແຫ່ງໄຊຊະນະ ຂອງຊົນຊັ້ນກໍາມະກອນ ທີ່ສາມາດທວງເອົາຄວາມຍຸຕິທຳຈາກພວກນາຍທຶນທັງເປັນການປົກປັກຮັກສາສັນຕິພາບຂອງໂລກໄວ້ຈົນເຖິງປັດຈຸບັນ.

      ໃນພິທີໄດ້ມອບໃບຢັ້ງຢືນກຳມະບານ 5 ເປັນເຈົ້າ ຂອງສະຫະພັນກຳມະບານແຂວງບໍ່ແກ້ວ ປະຈຳປີ 2021 ໃຫ້ໜ່ວຍຮາກຖານກຳມະບານບັນດາຫ້ອງການ, ໂຮງຮຽນ, ໂຮງໝໍທົ່ວເມືອງ ຈຳນວນ 45 ຮາກຖານກຳມະບານ ໃຫ້ກຽດມອບໂດຍທ່ານ ທອງພັນ ຈັນທະວົງ.

ຂ່າວ-ພາບ: ທອງເພັດ