ກົມງົບປະມານແຫ່ງລັດ ກະຊວງການເງິນ, ໄດ້ຈັດກອງປະຊຸມເຜີຍແຜ່ເອກະສານ 2 ວັນປະຫວັດສາດລາວ-ຫວຽດນາມ ແລະ ສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດປີ 2021 ແລະ ລາຍງານສະພາບການຈັດຕັັ້ງປະຕິບັດແຜນງົບປະມານແຫ່ງລັດງວດ I ປີ 2022, ລວມທັງການສະເໜີແຜນງົບປະມານແຫ່ງລັດ 5 ປີ (2021-2025) ແລະ ທິດທາງແຜນການງົບປະມານປີ 2023 ຂຶ້ນ​ເມື່ອບໍ່​ດົນ​ມານີ້ ທີ່​ກົມ​ດັ່ງ​      ກ່າວ ໂດຍການເຂົ້າຮ່ວມຂອງ ທ່ານ ພູວົງ ກິດຕະວົງ ຫົວໜ້າກົມງົບປະມານແຫ່ງລັດ, ມີພາກ​ສ່ວນ​ກ່ຽວ​ຂ້ອງ​ພາຍ​ໃນ​ກົມເຂົ້າຮ່ວມ.

ໃນກອງປະຊຸມ, ໄດ້ຮັບຟັງການນໍາສະເໜີສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປີ 2021 ຍົກໃຫ້ເຫັນສຳລັບແຜນງົບປະມານແຫ່ງລັດປະຈໍາປີ 2021 ເປັນບາດກ້າວເລີ່ມຕົ້ນຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ແລະ ແຜນງົບປະມານແຫ່ງລັດ 5 ປີ (2021-2025) ຊຶ່ງຍັງເປັນແຜນທີ່ສະ​ພາບ​ເສດ​ຖະ​ກິດ-ການ​ເງິນ ຍັງສືບຕໍ່ມີຄວາມຫຍຸ້ງຍາກເນື່ອງຈາກສະພາບການຂອງພາກພື້ນ ແລະ ສາກົນມີການຜັນແປຢ່າງສັບສົນເຮັດໃຫ້ລາຄາແຮ່ທາດ ແລະ ນ້ຳ​ມັນ​ດິບ ໃນຕະຫຼາດໂລກມີການຜັນຜວນ. ສຳລັບພາຍໃນປະເທດຍັງໄດ້ຮັບຜົນກະທົບຈາກໄພທໍາມະຊາດ, ການແຜ່ລະບາດພະຍາດໂຄວິດ-19 ແລະ ບັນດາຫົວໜ່ວຍທຸລະກິດຈໍານວນຫຼາຍສືບຕໍ່ປິດ ຫຼື ໂຈະກິດຈະການຊົ່ວຄາວສົ່ງຜົນຕໍ່ກັບການຈັດຕັ້ງປະຕິບັດແຜນງົບປະມານແຫ່ງລັດປີ 2021. ແຕ່ເຖິງຢ່າງໃດກໍຕາມ ລັດຖະບານກໍໄດ້ຄົ້ນຄວ້າອອກຫຼາຍມາດຕະການໄດ້ຈັດຕັ້ງຜັນຂະຫຍາຍວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ກໍຄືການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ ແລະ ຄຸ້ມຄອງລາຍຈ່າຍຕາມນະໂຍບາຍປະຢັດ ແລະ ຕ້ານການຟຸ່ມເຟືອຍ, ແນໃສ່ເພື່ອສູ້ຊົນຈັດຕັ້ງປະຕິບັດແຜນງົບປະມານແຫ່ງລັດໃຫ້ໄດ້ຕາມແຜນທີ່ສະພາແຫ່ງຊາດຮັບຮອງ.

ສຳລັບແຜນງົບປະມານແຫ່ງລັດປະຈໍາປີ 2022 ເປັນແຜນງົບປະມານທີ່ສືບຕໍ່ແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ເປັນປີທໍາອິດຂອງການຈັດຕັ້ງປະຕິບັດວາລະແຫ່ງຊາດໂດຍສະເພາະການສ້າງທ່າຫັນປ່ຽນບຸກທະລຸດ້ານລາຍຮັບງົບປະມານຢ່າງແຂງແຮງ, ຜ່ານການຈັດຕັ້ງປະຕິບັດຕົວຈິງໃນງວດ I ປີ 2022 ລາຍຮັບສາມາດປະຕິບັດໄດ້ 5.494 ຕື້ກີບ ເທົ່າກັບ 17,39% ຂອງແຜນການປີ, ທຽບໃສ່ແຜນງວດ 1 ເທົ່າກັບ 71,75% ຂອງແຜນການງວດ. ໃນນັ້ນ, ລາຍຮັບພາຍໃນ 5.395 ຕື້ກີບ ເທົ່າກັບ 18,52% ຂອງແຜນການປີ (ລາຍຮັບສູນກາງປະຕິບັດໄດ້ 4.269 ຕື້ກີບ ເທົ່າກັບ 18,40% ຂອງແຜນການປີ ແລະ ລາຍຮັບທ້ອງຖິ່ນປະຕິບັດໄດ້ 1.126 ຕື້ກີບ ເທົ່າກັບ 18,96% ຂອງແຜນການປີ) ແລະ ​ລາຍ​ຮັບ​ຈາກ​ການ​ຊ່ວຍ­ເຫຼືອ​ປະ­ຕິ­ບັດ​ໄດ້ 99 ຕື້ກີບ ເທົ່າ​ກັບ 4,01% ຂອງ​ແຜນ​ການປີ. ພ້ອມນັ້ນ, ຍັງໄດ້ມີການນໍາສະເໜີສະພາບການຈັດຕັ້ງປະຕິບັດແຜນງົບປະມານແຫ່ງລັດ 5 ປີ (2021-2025) ແລະ ທິດທາງການຄົ້ນຄວ້າສ້າງແຜນງົບປະມານແຫ່ງລັດ ປະຈໍາປີ 2023 ອີກດ້ວຍ.

ໂອກາດດຽວກັນ, ທ່ານ ພູວົງ ກິດຕະວົງ ໄດ້ເຜີຍແຜ່ເອກະສານ 2 ວັນປະຫວັດສາດລາວ-ຫວຽດນາມ ເນັ້ນໃຫ້ຮູ້ຄວາມໝາຍສໍາຄັນຂອງສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານລາວ-ຫວຽດນາມ, ປະຫວັດສາດແຫ່ງການຕໍ່ສູ້ຂອງປະຊາຊົນສອງປະເທດ, ໄລຍະປົກປັກຮັກສາ ແລະ ສ້າງສາພັດທະນາປະເທດຊາດ, ຕະຫຼອດໄລຍະເວລາ 45 ປີແຫ່ງການປະຕິບັດສົນທິສັນຍາມິດຕະພາບ ແລະ ການຮ່ວມມືຮອບດ້ານລາວ-ຫວຽດນາມ, ສືບຕໍ່ເສີມຂະຫຍາຍມູນເຊື້ອສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລາວ-ຫວຽດນາມ. ທັງນີ້, ກໍເພື່ອໃຫ້ພະນັກງານຫຼັກແຫຼ່ງຂອງກົມ ສາມາດຮູ້ໄດ້ ແລະ ມີຄວາມເຂົ້າໃຈຢ່າງເລິກເຊິ່ງໃນການປະຕິບັດວຽກງານວິຊາສະເພາະ, ຮູ້ໄດ້ທິດທາງ, ຄາດໝາຍສູ້ຊົນ ແລະ ມາດຕະການຈັດຕັ້ງປະຕິບັດວຽກງານເພື່ອໃຫ້ໄດ້ຮັບຜົນສໍາເລັດຕາມລະດັບຄາດໝາຍ.

(ຂ່າວ-ພາບ: ກະ​ຊວງ​ການ​ເງິນ)