ເມື່ອບໍ່​ດົນ​ມານີ້ ທີ່ກອງບັນຊາການທະຫານແຂວງບໍ່ແກ້ວ ໄດ້ຈັດຕັ້ງເຜີຍແຜ່ເຊື່ອມຊຶມມະຕິກອງປະຊຸມວຽກງານ ປກຊ-ປກສ 4 ແຂວງ 1 ກອງພົນ ປະຈຳປີ 2021 ແລະ ກອງປະຊຸມວຽກງານທະຫານທ້ອງຖິ່ນ ທົ່ວປະເທດ ຄັ້ງທີ V ຂຶ້ນ, ໂດຍການເປັນປະທານຂອງ ສະຫາຍ ພັນເອກ ບຸນມີ ພາມີໄຊ ຄະນະປະຈຳພັກແຂວງ ເລຂາຄະນະພັກ ຫົວໜ້າການເມືອງກອງບັນຊາການທະຫານແຂວງ, ມີຄະນະປະຈຳພັກ, ຄະນະບໍລິຫານງານພັກ, ຄະນະພັກ-ຄະນະບັນຊາ 6 ຫ້ອງ, ໂຮງຮຽນ, ໂຮງໝໍ ກົມກອງອ້ອມຂ້າງເຂົ້າຮ່ວມ.

ເອກະສານທີ່ນຳມາເຜີຍແຜ່ການເຊື່ອມຊຶມໃນຄັ້ງນີ້, ປະກອບມີ ຂໍ້ກຳນົດ, ມະຕິຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະປ້ອງກັນຊາດ-ຄະນະປ້ອງກັນຄວາມສະຫງົບແຂວງ ແລະ ຜົນສຳເລັດຂອງກອງປະຊຸມວຽກງານທະຫານທ້ອງຖິ່ນທົ່ວປະເທດ ໃຫ້ແກ່ພະນັກງານຫຼັກແຫຼ່ງທົ່ວກອງບັນຊາການທະຫານແຂວງບໍ່ແກ້ວ ແນໃສ່ເຮັດໃຫ້ຄະນະພັກ-ຄະນະບັນຊາແຕ່ລະຂັ້ນຮັບຮູ້ເຂົ້າໃຈຢ່າງເລິກເຊິ່ງ ໂດຍສະເພາະແມ່ນເນື້ອໃນທີ່ສຳຄັນຕົ້ນຕໍ ແລະ ວຽກງານຈຸດສຸມທີ່ຕ້ອງເອົາໃຈໃສ່ຊີ້ນຳ-ນໍາພາ ແຕ່ລະຂົງເຂດວຽກງານ ໃນການຈັດຕັ້ງປະຕິບັດວຽກງານ ປກຊ - ປກສ ທົ່ວປວງຊົນຮອບດ້ານ.

ໃນໂອກາດດຽວກັນນີ້, ສະຫາຍ ພັນເອກ ບຸນມີ ພາມີໄຊ ໄດ້ເນັ້ນໜັກໃຫ້ກໍາລັງ ປກຊ-ປກສ ຢູ່ບັນດາກົມກອງ ຈົ່ງເອົາໃຈໃສ່ໃນການສຶກສາອົບຮົມການເມືອງ-ແນວຄິດ ເປັນກົກຕິດພັນກັບການຫັນເອົາກໍາລັງລົງກໍ່ສ້າງຮາກຖານແບບມູນເຊື້ອເປັນສໍາຄັນ ເພື່ອພ້ອມກັນສະກັດກັ້ນບັນດາປະກົດການຫຍໍ້ທໍ້ຕ່າງໆທີ່ຈະເກີດຂຶ້ນໃນທ້ອງຖິ່ນ, ເອົາໃຈໃສ່ເຄື່ອນໄຫວແກ້ໄຂບັນດາໜໍ່ແໜງທີ່ສ້າງຄວາມບໍ່ສະຫງົບໃນຂອບເຂດຄວາມຮັບຜິດຊອບໃຫ້ໝົດໄປເທື່ອລະກ້າວ ແລະ ຕ້ອງຍົກສູງຄວາມຮັບຜິດຊອບ ຕໍ່ໜ້າທີ່ການເມືອງອັນມີກຽດສະຫງ່າທີ່ ພັກ-ລັດ ແລະ ປະຊາຊົນ ມອບໝາຍໃຫ້, ພ້ອມກັນຕັ້ງໜ້າຈັດຕັ້ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຂອງພັກໃຫ້ມີຜົນສໍາເລັດ ເພື່ອຮັບປະກັນໃຫ້ປະເທດຊາດ ກໍຄືແຂວງບໍ່ແກ້ວ ມີສະຖຽນລະພາບທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍ, ປະຊາຊົນມີຄວາມຜາສຸກ, ສ້າງບາດກ້າວການພັດທະນາໃຫ້ບັນລຸຕາມເປົ້າໝາຍທີ່ພັກ-ລັດ ແລະ ປະຊາຊົນມອບໝາຍໃຫ້.

(ຂ່າວ-ພາບ: ສົມໄຊ ສີລາຈັນ)