ທ່ານ ຄຳເຜີຍ ບຸດດາວຽງ ກຳມະການສູນກາງພັກ, ຮອງເລຂາຄະນະພັກ, ຮອງປະທານສູນກາງແນວລາວສ້າງຊາດ ພ້ອມດ້ວຍຄະນະ ໄດ້ລົງເຄື່ອນໄຫວ ຢ້ຽມຢາມການພັດທະນາພື້ນຖານໂຄ່ງລ່າງ ຂອງເມືອງລ້ອງແຈ້ງ,​ ເມືອງຮົ່ມ ແລະ ເມືອງລ້ອງຊານ ແຂວງໄຊສົມບູນ ໃນວັນທີ 4-6 ພຶດສະພາ 2022 ມານີ້, ໂດຍໄດ້ຮັບການຕ້ອນຮັບຢ່າງອົບອຸ່ນຈາກຄະນະພັກ ແລະ ຄະນະປະທານແນວລາວສ້າງຊາດ 3 ເມືອງດັ່ງກ່າວ.

 ການເຄື່ອນໄຫວເຮັດວຽກຄັ້ງນີ້,​ຮອງປະທານ ແລະ  ຄະນະໄດ້ຮັບຟັງການລາຍງານໂດຍຫຍໍ້ ກ່ຽວກັບການຈັດຕັ້ງປະຕິບັດວຽກງານແນວລາວສ້າງຊາດ ຂອງບາງເມືອງ ຊຶ່ງໄດ້ຍົກໃຫ້ເຫັນບາງຜົນງານທີ່ພົ້ນເດັ່ນ, ຂໍ້ສະດວກ, ຂໍ້ຫຍຸ້ງຍາກ ແລະ ບົດຮຽນທີ່ຖອດຖອນໄດ້ໃນໄລຍະຜ່ານມາ.

ໂອກາດນີ້ ທ່ານ ຮອງປະທານ  ໄດ້ສະແດງຄວາມຊົມເຊີຍຕໍ່ຜົນງານທີ່ແນວລາວສ້າງຊາດ ເມືອງຍາດມາໄດ້ໃນໄລຍະຜ່ານມາ ແລະ ໄດ້ເນັ້ນຕື່ມວ່າ:  ໃຫ້ສືບຕໍ່ຊີ້ນຳ-ນຳພາໃນການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງຕິດພັນກັບການແກ້ໄຂຄວາມທຸກຍາກຂອງປະຊາຊົນບັນດາເຜົ່າໂດຍສະເພາະແມ່ນສືບຕໍ່ຊຸກຍູ້ບັນດາຄອບຄົວທີ່ຍັງບໍ່ທັນໄດ້ຕາມາດຖານເງື່ອນໄຂ ແລະ ໃຫ້ລົງປະເມີນຄືນບັນດາຄອບຄົວ ແລະ ບ້ານທີ່ໄດ້ຮັບການຮັບຮອງ ແລ້ວວ່າຍັງສາມາດຮັກສາໄດ້ຕາມມາດຖານເງື່ອນໄຂຄອບຄົວແລະບ້ານສາມັກຄີຫຼືບໍ; ສືບຕໍ່ເຜີຍແຜ່ຄຳແນະນຳ 047 ໃຫ້ປະຊາຊົນຮັບຮູ້ ແລະ ຈັດຕັ້ງປະຕິບັດ, ສຶກສາອົບຮົມ, ປຸກລະດົມປະຊາຊົນໃຫ້ມີສະຕິລະວັງຕົວ, ເປັນເຈົ້າການໃນການຕ້ານ, ສະກັດກັ້ນ ປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ ເປັນຕົ້ນແມ່ນການຕ້ານບັນຫາຢາເສບຕິດ ທຸກຊະນິດ ຕາມ 3 ບ ຄື: ບໍ່ຜະລິດ, ບໍ່ຂາຍ ແລະ ບໍ່ເສບ; ໃຫ້ສຶກສາບັນດາທ່າແຮງໃນການຜະລິດກະສິກຳ, ການທ່ອງທ່ຽວ ຢູ່ພາຍໃນເມືອງຂອງຕົນ ແລະ ຊຸກຍູ້ໃຫ້ສາມາດສ້າງລາຍຮັບແກ່ຄອບຄົວ ເພື່ອແກ້ໄຂເສດຖະກິດຄອບຄົວຂອງປະຊາຊົນ ໃຫ້ດີຂຶ້ນເທື່ອລະກ້າວ.

ພ້ອມກັນນີ້ ທ່ານ ຮອງປະທານ ສນຊ ໄດ້ມອບເຄື່ອງຊ່ວຍເຫຼືອປະເພດ ເຈ໋ວລ້າງມື, ຜ້າອັດປາກ-ດັງ ຈໍານວນໜຶ່ງ ແລະ ໂທລະໂຄ່ງ ໃຫ້ 3 ເມືອງ ເມືອງລະ 1 ຊຸດ ແລະ ໄດ້ໄປຢ້ຽມຢາມໂຄງການສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກ ຂອງປະຊາຊົນບັນດາເຜົ່າ ຢູ່ເຂດຈຸດສຸມໂພນສະຫວາດ(516) ເມືອງລ້ອງຊານ ແຂວງໄຊສົມບູນ.(ຂ່າວ:ສນຊ)