ຂປລ. ໃນວັນທີ 7 ມິຖຸນານີ້, ກົມໂຄສະນາການທ່ອງທ່ຽວ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຮ່ວມກັບຫ້ອງການກອງທຶນປົກປັກຮັກສາສິ່ງແວດລ້ອມ ກະຊວງຊັບພະຍາກອນທຳມະຊາດ ແລະ ສິ່ງ ແວດລ້ອມ ແລະ ໂຮງຮຽນມັດທະຍົມປາຍມິດຕະພາບວຽງຈັນ-ໂຮ່ຈິມິນ ຈັດກິດຈະກຳເຜີຍແຜ່ການປົກປັກຮັກສາສິ່ງແວດລ້ອມ ເພື່ອການທ່ອງທ່ຽວທີ່ຍືນຍົງ ເນື່ອງໃນໂອກາດວັນສິ່ງແວດລ້ອມໂລກ 5 ມິຖຸນາ ຢູ່ສວນເຈົ້າອານຸວົງ ນະຄອນຫຼວງວຽງຈັນ ພາຍໃຕ້ຫົວຂໍ້ “ການສົ່ງເສີມ, ປູກຈິດສຳນຶກ ແລະ ໂຄສະນາເຜີຍແຜ່ກ່ຽວກັບການປົກປັກຮັກສາສິ່ງແວດລ້ອມ ເພື່ອການທ່ອງທ່ຽວທີ່ຍືນຍົງ” ໂດຍມີທ່ານນາງ ແສງໂສດາ ວັນທານຸວົງ ຮອງຫົວໜ້າກົມໂຄສະນາການທ່ອງທ່ຽວ, ທ່ານນາງ ບຸນພາມາ ໂພທິສານ ຮອງຫົວໜ້າຫ້ອງການກອງທຶນປົກປັກຮັກສາສິ່ງແວດ ລ້ອມ, ພ້ອມດ້ວຍຄູ-ອາຈານ, ນັກຮຽນເຂົ້າຮ່ວມ.

ທ່ານນາງ ແສງໂສດາ ວັນທານຸວົງ ກ່າວວ່າ: ການຈັດກິດຈະກຳຄັ້ງນີ້ແນໃສ່ຊຸກຍູ້, ສົ່ງເສີມໃຫ້ນັກຮຽນ ແລະ ຄູ-ອາຈານ ຮັບຮູ້ເຂົ້າໃຈຄວາມໝາຍ, ຄວາມສຳຄັນຂອງການປົກປັກຮັກສາສິ່ງແວດລ້ອມ, ທັງເປັນການໂຄສະນາເຜີຍແຜ່ກ່ຽວກັບການປົກປັກຮັກສາສິ່ງແວດລ້ອມ ເພື່ອການທ່ອງທ່ຽວທີ່ຍືນຍົງ, ໃນນັ້ນ, ໄດ້ຈັດກິດຈະກຳ ຖາມ-ຕອບຄວາມຮູ້ກ່ຽວກັບສິ່ງແວດລ້ອມ ແລະ ກິດຈະກໍາອະນາໄມລວມ ຢູ່ບໍລິເວນສວນເຈົ້າອານຸວົງ ແນໃສ່ຊຸກຍູ້ສົ່ງເສີມໃຫ້ຄູ-ອາຈານ, ນັກຮຽນປະກອບສ່ວນເຂົ້າໃນການປົກປັກຮັກສາສິ່ງແວດລ້ອມທາງທຳມະຊາດໃຫ້ຄົງຢູ່ເພື່ອການທ່ອງທ່ຽວທີ່ຍືນຍົງ, ທັງເປັນການເພີ່ມຄວາມຮູ້ທີ່ເປັນປະໂຫຍດໃຫ້ແກ່ນັກຮຽນ ເພື່ອນໍາໄປປະຕິບັດໃນໂຮງຮຽນຄອບຄົວ ແລະ ຊຸມຊົນທ້ອງຖິ່ນທີ່ຕົນເອງອາໄສຢູ່ໃຫ້ສອດຄ່ອງກັບສະພາບຕົວຈິງ.

ພ້ອມນີ້, ທ່ານນາງ ບຸນພາມາ ໂພທິສານ ໄດ້ຍົກໃຫ້ເຫັນປະຫວັດຄວາມເປັນມາຂອງວັນສິ່ງແວດລ້ອມໂລກ ຊຶ່ງກອງປະຊຸມສຸດຍອດໂລກ ກ່ຽວກັບສິ່ງແວດລ້ອມຂອງມະນຸດ ທີ່ອົງການສະຫະປະຊາຊາດໄດ້ຈັດຂຶ້ນໃນວັນທີ 5 ມິຖຸນາ 1972 ທີ່ເມືອງສະຕັອກໂຮມ ປະເທດຊູແອັດ ຊຶ່ງເປັນວັນທີ່ຜູ້ນໍາຮ້ອຍກວ່າປະເທດຈາກທົ່ວໂລກ ໄດ້ປຶກສາຫາລືກ່ຽວກັບພຶດຕິກໍາຂອງມະນຸດ ທີ່ສ້າງບັນຫາດ້ານສິ່ງແວດລ້ອມ ແລະ ໄດ້ຮັບຮອງເອົາວັນດັ່ງກ່າວເປັນວັນສິ່ງແວດລ້ອມໂລກ. ສຳລັບ ສປປ ລາວ ກໍໄດ້ເລັງເຫັນຄວາມສໍາຄັນຂອງການປົກປັກຮັກສາສິ່ງແວດລ້ອມ ຈຶ່ງໄດ້ສ້າງກົດໝາຍວ່າດ້ວຍການປົກປັກຮັກສາສິ່ງແວດລ້ອມເປັນສະບັບທໍາອິດຂຶ້ນໃນປີ 1999 ແລະ ໄດ້ກໍານົດເອົາວັນທີ 5 ມິຖຸນາ ເປັນວັນສິ່ງແວດລ້ອມແຫ່ງຊາດ, ຫຼັງຈາກນັ້ນ, ກອງທຶນປົກປັກຮັກສາສິ່ງແວດລ້ອມ ກໍໄດ້ສ້າງຂຶ້ນໃນປີ 2005 ເພື່ອເຮັດໜ້າທີ່ລະດົມ, ສະສົມ ແລະ ສະໜອງທຶນ ເພື່ອສ້າງຄວາມເຂັ້ມແຂງໃຫ້ແກ່ວຽກງານຄຸ້ມຄອງຊັບ ພະຍາກອນທຳມະຊາດ ແລະ ປົກປັກຮັກສາສິ່ງແວດລ້ອມ ຕາມທິດສີຂຽວ ແລະ ຍືນຍົງ.

ທ່ານນາງ ບຸນພາມາ ໂພທິສານ ໃຫ້ຮູ້ອີກວ່າ: ອີງຕາມຂໍ້ມູນຂອງອົງການອະນາໄມໂລກໄດ້ສະແດງໃຫ້ຮູ້ວ່າ ມີຄົນເສຍຊີວິດຫຼາຍກວ່າ 10 ລ້ານຄົນໃນທົ່ວໂລກໃນແຕ່ລະປີ ຍ້ອນບັນຫາທາງດ້ານສິ່ງແວດລ້ອມ, ໃນນັ້ນປະ ມານ 7 ລ້ານຄົນໄດ້ເສຍຊີວິດ ຈາກບັນຫາມົນລະພິດທາງອາກາດ. ສະນັ້ນ, ພວກເຮົາຈົ່ງຮ່ວມແຮງຮ່ວມໃຈກັນຢ່າງຈິງຈັງ ເພື່ອຖະໜຸຖະໜອມໂລກດ້ວຍການປົກປັກຮັກສາ ແລະ ແກ້ໄຂບັນຫາສິ່ງແວດລ້ອມ ພາຍໃຕ້ຄຳຂວັນ “ໂລກມີພຽງໜຶ່ງດຽວ” (Only One Earth), ພວກເຮົາຕ້ອງສາມາດຢູ່ຮ່ວມກັບທຳມະຊາດຢ່າງກົມກຽວຍືນຍົງ.

ຂ່າວ-ພາບ: ທະນູທອງ