ໃນວັນທີ 20 ມິຖຸນາ ຜ່ານມາ, 4 ໜ່ວຍພັກ ທີ່ຂຶ້ນກັບຄະນະພັກຮາກຖານພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງບໍ່ແກ້ວ ໄດ້ຮັບໃບຢັ້ງຢືນເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2021 ລວມມີໜ່ວຍພັກບໍລິຫານ, ໜ່ວຍພັກວັດທະນະທໍາ, ໜ່ວຍພັກຖະແຫຼງຂ່າວ ແລະ ໜ່ວຍພັກທ່ອງທ່ຽວ ຊຶ່ງມີ ສະຫາຍ ຄໍາຜະຫຍາ ພົມປັນຍາ ຄະນະປະຈໍາພັກແຂວງ ຮອງເຈົ້າແຂວງບໍ່ແກ້ວ ຜູ້ຊີ້ນໍາວຽກງານວັດທະນະທໍາ-ສັງຄົມ, ສະຫາຍ ສົມຄິດ ວົງປັນຍາ ກໍາມະການພັກແຂວງ ເລຂາຄະນະພັກຮາກຖານ ຫົວໜ້າພະແນກ ຖວທ ແຂວງບໍ່ແກ້ວ, ມີແຂກຖືກເຊີນ, ສະມາຊິກເຂົ້າຮ່ວມ.

ສະຫາຍ ນາງ ຈັນທີ ວົງປະເສີດ ຄະນະພັກຮາກຖານໄດ້ຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍ ການຮັບຮອງເອົາໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2021. ຈາກນັ້ນ ສະຫາຍ ຄໍາຜະຫຍາ ພົມປັນຍາ ໄດ້ເປັນກຽດມອບໃບຢັ້ງຢືນໃຫ້ແກ່ 4 ໜ່ວຍພັກດັ່ງກ່າວ. ພ້ອມທັງມີຄໍາເຫັນເນັ້ນໃຫ້ຄະນະພັກຮາກຖານຈົ່ງເອົາໃຈໃສ່ຮັກສາມູນເຊື້ອອັນດີງາມນີ້ໄວ້ໃຫ້ໝັ້ນຄົງຕະຫຼອດໄປ. ດ້ວຍການສ້າງພັກໃຫ້ມີຄວາມໂປ່ງໃສ, ເຂັ້ມແຂງ, ໜັກແໜ້ນ, ເຂັ້ມງວດ ແລະ ເປັນທໍາ, ສືບຕໍ່ສຶກສາອົບຮົມການເມືອງແນວຄິດໃຫ້ແກ່ພະນັກງານ, ສະມາຊິກພັກໃຫ້ມີຄວາມເຂົ້າໃຈຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດຕາມ 3 ຫຼັກການ 5 ທິດນໍາ, ຖືເອົາການສຶກສາ, ຄົ້ນຄວ້າ, ຮໍ່າຮຽນບັນດາກົດໝາຍໃຫ້ເລິກເຊິ່ງ ແລະ ຍົກສູງຄວາມສາມັກຄີພາຍໃນໃຫ້ໜັກແໜ້ນຕິດພັນວຽກງານວິຊາສະເພາະ, ວຽກງານສື່ມວນຊົນໃຫ້ວ່ອງໄວທັນເຫດການ, ສ້າງລາຍການວິທະຍຸ-ໂທລະພາບໃຫ້ມີຫຼາຍສີສັນ, ວຽກດີຄົນເດັ່ນທີ່ເປັນຄອບຄົວຕົວແບບ, ວຽກງານການບໍລິຫານ ຕິດພັນກັບການບໍລິການ, ປັບປຸງປະເມີນການສ້າງບ້ານ ແລະ ຄອບຄົວວັດທະນະທໍາ ຮັກສາຮີດຄອງປະເພນີອັນດີງາມຂອງຊາດຂອງເຜົ່າໄວ້ໃຫ້ຍືນຍົງ ເພື່ອດຶງດູດນັກທ່ອງທ່ຽວເຂົ້າມາທ່ຽວແຂວງບໍ່ແກ້ວ ໃຫ້ນັບມື້ຫຼາຍຂຶ້ນ. ເອົາໃຈໃສ່ປັບປຸງແຫຼ່ງທ່ອງທ່ຽວ, ເຮືອນພັກ, ໂຮງແຮມ ແລະ ຮ້ານອາຫານ ໃຫ້ເປັນທີ່ຍອມຮັບຈາກສັງຄົມ ກໍຄືແຂກທີ່ມາພັກເຊົາ.

ຂ່າວ: ຄໍາເພັງ - ພາບ: ເງິນຫຼົງ