ພະນັກງານ-ລັດຖະກອນ ຂອງຂະແໜງສ່ວຍສາອາກອນຈາກ 8 ແຂວງພາກເໜືອ ແລະ ສະຖາບັນການສຶກສາ ໄດ້ຮັບການຍົກລະດັບວຽກງານກວດກາຂອງສ່ວຍສາອາກອນ ປະຈຳປີ 2022. ຊຸດຝຶກອົບຮົມວຽກງານດັ່ງກ່າວໄດ້ຂຶ້ນໃນວັນທີ 27 ມິຖຸນາ ຜ່ານມານີ້ ທີ່ວິທະຍາໄລການເງິນພາກເໜືອ ແຂວງຫຼວງພະບາງ ໂດຍການເປັນປະທານຂອງ ທ່ານ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ, ມີທ່ານ ບຸນປະເສີດ ສີກຸນລະບຸດ ຫົວໜ້າກົມສ່ວຍສາອາກອນ ກະຊວງການເງິນ, ຫົວໜ້າພະແນກການເງິນແຂວງ, ສ່ວຍສາອາກອນປະຈໍາແຂວງ, ຄະນະອຳນວຍການວິທະຍາໄລການເງິນພາກເໜືອ, ຕະຫຼອດຮອດນັກສຳມະນາກອນເຂົ້າຮ່ວມ.

ຊຸດຝຶກອົບຮົມຄັ້ງນີ້, ຈັດຂຶ້ນເພື່ອແນໃສ່ການພັດທະນາຊັບພະຍາກອນມະນຸດຂອງຂະແໜງການເງິນ ໂດຍສະເພາະຂະແໜງສ່ວຍສາອາກອນ ເພື່ອຍົກສູງທັກສະ, ຄວາມຮູ້, ຄວາມສາມາດຮອບດ້ານຂອງພະນັກງານສ່ວຍສາອາກອນ. ໃນນີ້, ວຽກງານກວດກາຫຼັງການແຈ້ງ, ກວດກາໄລ່ລຽງອາກອນປະຈຳປີ ເພື່ອກວດກາ ແລະ ຕີລາຄາຄືນຕໍ່ກັບການປະຕິບັດລະບຽບ, ກົດໝາຍ ຂອງບຸກຄົນ, ນິຕິບຸກຄົນ ແລະ ການຈັດຕັ້ງຕ່າງໆ ທີ່ເຄື່ອນໄຫວມີລາຍໄດ້, ມີລາຍຮັບ ແລະ ໄດ້ມີການແຈ້ງ-ມອບກໍຄືການປະຕິບັດສິດ ແລະ ພັນທະຂອງຕົນໄດ້ຢ່າງຖືກຕ້ອງ, ຄົບຖ້ວນ ແລະ ທັນເວລາ.

ທັງນີ້, ກໍເພື່ອສ້າງຄວາມເປັນເອກະພາບໃຫ້ແກ່ພະນັກງານສ່ວຍສາອາກອນທີ່ຮັບຜິດຊອບ ແລະ ປະຕິບັດວຽກງານດັ່ງກ່າວນີ້ໄດ້ມີຄວາມເປັນເອກະພາບກັນບົນພື້ນຖານການປະຕິບັດໄດ້ຢ່າງຖືກຕ້ອງ ແລະ ສອດຄ່ອງກັບລະບຽບ, ກົດໝາຍທີ່ກ່ຽວຂ້ອງ, ທັງຮັບປະກັນໄດ້ທາງດ້ານປະລິມານຄຸນນະພາບຂອງວຽກງານການກວດກາສ່ວຍສາອາກອນ, ເພື່ອບັນລຸໄດ້ຕາມແຜນການພັດທະນາຊັບພະຍາກອນມະນຸດຂອງກະຊວງການເງິນ ກໍຄືຂອງກົມສ່ວຍສາອາກອນນັບແຕ່ນີ້ ຮອດປີ 2025 ແລະ ສ້າງຄວາມເຂັ້ມແຂງໃນວຽກງານການກວດກາສ່ວຍສາອາກອນໃຫ້ນັບມື້ນັບຂະຫຍາຍຕົວທາງດ້ານປະລິມານ ແລະ ຄຸນນະພາບ.

ສໍາລັບນັກສຳມະນາກອນເຂົ້າຮ່ວມຝຶກອົບຮົມຄັ້ງນີ້, ມີທັງໝົດ 37 ທ່ານ. ໃນນີ້ມີພະນັກງານຈາກສ່ວຍສາອາກອນປະຈໍາແຂວງຫຼວງພະບາງ 11 ທ່ານ, ໄຊຍະບູລີ 5 ທ່ານ, ຫົວພັນ 3 ທ່ານ, ອຸດົມໄຊ 5 ທ່ານ, ຫຼວງນໍ້າທາ 5 ທ່ານ, ບໍ່ແກ້ວ 3 ທ່ານ, ຜົ້ງສາລີ 3 ທ່ານ ແລະ ພະນັກງານຄູ-ອາຈານຈາກວິທະຍາໄລການເງິນພາກເໜືອ 2 ທ່ານ.

(ຂ່າວ: ກະຊວງການເງິນ)