ທ່ານ ສອນໄຊ ສີພັນດອນ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ແລະ ທ່ານ ຫວໍ ວັນ ເຖື້ອງ ກໍາມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ ຫົວໜ້າຄະນະຊີ້ນໍາລະດັບຊາດ ຮ່ວມສະເຫຼີມສະຫຼອງປີສາມັກຄີມິດຕະພາບຫວຽດນາມ-ລາວ ປີ 2022 ພ້ອມດ້ວຍການນໍາພັກ-ລັດ, ອະດີດການນໍາພັກ-ລັດຂັ້ນສູງ ແລະ ຄະນະຜູ້ແທນຂັ້ນສູງຫວຽດນາມ ພະນັກງານ, ທະຫານ, ຕໍາຫຼວດ, ຊາວໜຸ່ມ, ເຍົາວະຊົນ, ຊາວນະຄອນຫຼວງວຽງຈັນ ແລະ ຊາວຫວຽດນາມ ທີ່ດໍາລົງຊີວິດຢູ່ ສປປ ລາວ ໄດ້ພ້ອມກັນເຂົ້າຊົມການສະແດງສິລະປະ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 60 ປີ (5/9/1962-5/9/2022) ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມ ຄົບຮອບ 45 ປີ (18/7/1977-18/7/2022) ໃນວັນທີ 18 ກໍລະກົດ ນີ້ ທີ່ຫໍວັດທະນະທໍາແຫ່ງຊາດ.

ສໍາລັບລາຍການສະແດງສະເຫຼີມສະຫຼອງສອງວັນປະຫວັດສາດດັ່ງກ່າວປະກອບມີ: ບົດເພງ ແລະ ບົດຟ້ອນ ຫວຽດນາມບ້ານເກີດເມືອງນອນຂອງຂ້ອຍ-ເຜົ່າລາວເອີຍ; ພາກທີ 1 ປະເພດແຫ່ງຄວາມຮັກ ບົດເພງສັນລະເສີນຜູ້ນໍາຂອງປະເທດ ທ່ານຄືຜູ້ທີ່ພວກເຮົາເຊື່ອໝັ້ນແຫ່ງການນໍາພາໄປສູ່ໄຊຊະນະ; ບົດເພງ ລຸງໄກສອນ ວິລະບູລຸດໃນດວງໃຈ; ບົດຟ້ອນ ຈິດວິນຍານດອກບົວ, ດອກໄມ້ປະຈໍາຊາດຂອງຫວຽດນາມ; ບົດເພງ 12 ລະດູດອກໄມ້ຂອງຮ່າໂນ້ຍ; ບົດເພງ ວຽງຈັນເມືອງງາມ; ບົດຟ້ອນ ລໍາເຕີ້ຍກ້ຽວສາວ; ຮ້ອງຄູ່ຍິງ-ຊາຍ: ສົ່ງເພງຮັກແພງຊຶ່ງກັນ ແລະ ກັນ; ພາກທີ 2 ດອກໄມ້ທີ່ສວຍສົດງົດງາມ ບົດຟ້ອນ ລະຄັງປ່ຽນລະດູການ; ສີຊໍດ່ຽວ ສຽງບາດຕີນມ້າກ້ອງໄປທົ່ວເວຫາ; ຮ້ອງເພງ ແລະ ຟ້ອນ ເສີມຮ່າໂນ້ຍ; ເພງ ແສງອາລຸນພົ້ນຂຶ້ນມະຫາສະໜຸດ; ຮ້ອງເພງ ແລະ ຟ້ອນ ຈໍາປາເມືອງລາວ-ຮ່າໂນ້ຍ-ວຽງຈັນ ຊຶ່ງເນື້ອໃນຂອງບົດເພງ ແລະ ບົດຟ້ອນ ທີ່ນໍາມາສະແດງໄດ້ສ່ອງແສງໃຫ້ເຫັນເຖິງສາຍພົວພັນຄວາມສາມັກຄີຮັກແພງ, ໃຫ້ການຮ່ວມມືຊ່ວຍເຫຼືອກັນຮອບດ້ານລະຫວ່າງສອງພັກ-ສອງລັດ ກໍຄືປະຊາຊົນສອງຊາດລາວ-ຫວຽດນາມ ທີ່ມີສາຍພົວພັນຄວາມສາມັກຄີແບບພິເສດຕະຫຼອດໄລຍະຜ່ານມາ ກໍຄືປັດຈຸບັນທີ່ໄດ້ມີການເສີມຂະຫຍາຍແຕກດອກອອກຜົນຢ່າງບໍ່ຢຸດຢັ້ງ.

ຂ່າວ-ພາບ: ຍຸພິນທອງ