ເມື່ອບໍ່ດົນມານີ້, ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ, ທ່ານ  ສະໜອງ ທອງຊະນະ ຮອງລັດຖະມົນຕີກະຊວງສາທາລະນະສຸກ ພ້ອມດ້ວຍຄະນະນຳ ອ້ອມຂ້າງກະຊວງສາທາລະນະສຸກ ໄດ້ເຂົ້າອວຍພອນ ທ່ານ ຫງວຽນ ບ່າ ຮຸ່ງ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສສ ຫວຽດນາມ ປະຈຳ ສປປ ລາວ

ເນື່ອງໃນໂອກາດສະເຫຼີມສະຫຼອງສອງວັນປະຫວັດສາດລະຫວ່າງສອງຊາດລາວ-ຫວຽດນາມຄື: ວັນເຊັນສົນທິສັນຍາ ມິດຕະພາບ ແລະ ການຮ່ວມມື ຄົບຮອບ 45 ປີ (18/7/1977 – 18/7/2022) ແລະ ວັນສ້າງຕັ້ງສາຍພົວພັນທາງການທູດ ຄົບຮອບ 60 ປີ (5/9/1962 – 5/9/2022). ທ່ານ ບຸນແຝງ ພູມມະໄລສິດ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຄວາມພະຍາຍາມຂອງສະມາຄົມມິດຕະພາບ ລາວ-ຫວຽດນາມ, ຫວຽດນາມ-ລາວ ທັງສູນກາງ ແລະ ທ້ອງຖິ່ນ ໃນການເຮັດໜ້າທີ່ອັນສຳຄັນປະກອບສ່ວນເສີມສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ໂດຍສະເພາະແມ່ນການຈັດບຸນມະໂຫລານມິດຕະພາບ ລະຫວ່າງປະຊາຊົນສອງຊາດ ລາວ-ຫວຽດນາມ ຄັ້ງທີ IV ແລະ  ການຈັດກິດຈະກຳສຶກສາອົບຮົມໃຫ້ຄົນຮຸ່ນໜຸ່ມ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງຕໍ່ສາຍພົວພັນ ລາວ-ຫວຽດນາມ ເຮັດໃຫ້ເຂົາເຈົ້າມີຄວາມເອກອ້າງທະນົງໃຈທີ່ໄດ້ເປັນຜູ້ສືບທອດສານຕໍ່ມູນເຊື້ອ ແລະ  ວິລະກຳທີ່ຄົນຮຸ່ນກ່ອນໄດ້ສ້າງ ແລະ ຖະນຸຖະໜອມໄວ້.

(ຂໍ້ມູນ: ສູນຂ່າວສານການແພດສຸຂະສຶກສາ)