ເມືອງເລົ່າງາມ ແຂວງສາລະວັນ ໄດ້ຈັດພິທີສະເຫຼີມສະຫຼອງວັນສ້າງຕັ້ງການທູດລາວ-ຫວຽດນາມ ຄົບຮອບ 60 ປີ (5/9/1962-5/9/2022) ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ - ຫວຽດນາມ ຄົບຮອບ 45 ປີ (18/7/1977-18/7/2022) ຂຶ້ນເມື່ອບໍ່ດົນມານີ້ ໂດຍການເຂົ້າຮ່ວມເປັນປະທານ ຂອງ ທ່ານ ຂັນໄຊ ຮັດຖະເຮົ້າ ຄະນະປະຈໍາພັກແຂວງ ຮອງປະທານສະພາປະຊາຊົນ ແຂວງສາລະວັນ, ມີ ທ່ານ ຈັນສະໝອນ ພົມມະແສງ ຄະນະປະຈໍາພັກແຂວງ ຫົວໜ້າຄະນະໂຄສະນາອົບຮົມແຂວງ, ທ່ານ ສົມສັກ ທົງຄໍາຫານ ກໍາມະພັກແຂວງ ເລຂາພັກເມືອງ ເຈົ້າເມືອງເລົ່າງາມ, ມີບັນດາທ່ານໃນຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ-ຮອງຫົວຫ້ອງການອ້ອມຂ້າງ, ມີບັນດາບໍລິສັດ, ນັກທຸລະກິດ ຊາວຫວຽດນາມ ທີ່ເຄື່ອນໄຫວດໍາເນີນທຸລະກິດ ຢູ່ໃນເມືອງເລົ່າງາມເຂົ້າຮ່ວມ.

ຈາກນັ້ນຜູ້ເຂົ້າຮ່ວມໄດ້ຮັບຟັງການບັນລະຍາຍ 4 ເອກະສານທີ່ສໍາຄັນຂອງພັກ ຂອງຊາດຄື: ການແກ້ໄຂ 2 ວາລະແຫ່ງຊາດ, ເປັນຕົ້ນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ການແກ້ໄຂບັນຫາຢາເສບຕິດ, ວັນສ້າງຕັ້ງການທູດ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ ໂດຍໃຫ້ກຽດຜ່ານເອກະສານ ຂອງ ທ່ານ ຈັນສະໝອນ ພົມມະແສງ ແລະ ທ່ານ ຂັນໄຊ ຮັດຖະເຮົ້າ, ຈຸດປະສົງເພື່ອເຊື່ອມຊຶມໃຫ້ພະນັກງານການນໍາພາຫຼັກແຫຼ່ງຂອງເມືອງເລົ່າງາມ, ພະນັກງານ-ລັດຖະກອນ, ທະຫານ-ຕໍາຫຼວດ ໄດ້ຮັບຮູ້ ແລະ ເຂົ້າໃຈຕໍ່່ແນວທາງນະໂຍບາຍການນໍາພາຂອງພັກຢ່າງເລິກເຊິ່ງ ໃນການແກ້ໄຂ 2 ວາລະແຫ່ງຊາດ ໃຫ້ໜັກແໜ້ນເຂັ້ມແຂງ ແລະ ສືບຕໍ່ເອົາໃຈໃສ່ຮັດແໜ້ນ ສ້າງສາຍພົວພັນມິດຕະພາບອັນດີງາມ ຂອງສອງຊາດ ລາວ-ຫວຽດນາມ ໃນການປົກປັກຮັກສາເສີມຂະຫຍາຍມູນເຊື້ອສາມັກຄີແບບພິເສດໃຫ້ຍືນຍົງຕະຫຼອດໄປ.

ໃນພິທີສະເຫຼີມສະຫຼອງ 2 ວັນດັ່ງກ່າວ ໄດ້ມີການແຂ່ງຂັນກິລາບານເຕະມິດຕະພາບ ລະຫວ່າງ ທີມ ຄະນະນໍາຂັ້ນແຂວງ, ທີມຄະນະນໍາຂັ້ນເມືອງເລົ່າງາມ ແລະ ທີມນັກກິລາ ອ້າຍນ້ອງຊາວຫວຽດນາມ ເຂົ້າຮ່ວມແຂ່ງຂັນກິລາບານເຕະ ຢ່າງເປັນຂະບວນການຟົດພື້ນ ແລະ ເບີກບານມ່ວນຊື່ນ.

(ຂ່າວ-ພາບ: ເມືອງເລົ່ງາມ)