ໜັງສືພິມ ປະຊາຊົນ

ສານປະຊາຊົນແຂວງຄໍາມ່ວນ-ກວາງບິ່ງ ສືບຕໍ່ເພີ່ມທະວີການ ຮ່ວມມື

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 22/08/2022 11:29:47 ຈຳນວນຢ້ຽມຊົມ 1359 ຄັ້ງ

ກອງປະຊຸມແລກປ່ຽນບົດຮຽນ ແລະ ຕີລາຄາໝາກຜົນການຈັດຕັ້ງປະຕິບັດ ຕາມບົດບັນທຶກຊ່ວຍຈຳ ພ້ອມທັງລົງນາມບົດບັນທຶກ ການພົວພັນຮ່ວມມືລະຫວ່າງຄະນະຜູ້ແທນ ສານປະຊາຊົນ ແຂວງຄໍາມ່ວນ ສປປ ລາວ ແລະ ສານປະຊາຊົນ ແຂວງກວາງບິ່ງ ສສ ຫວຽດນາມ ໄດ້ຈັດຂຶ້ນເມື່ອບໍ່ດົນມານີ້ ທີ່ຫ້ອງປະຊຸມສໍານັກງານສານປະຊາຊົນແຂວງກວາງບິ່ງ ສສ ຫວຽດນາມ, ຄະນະຜູ້ແທນສານປະຊາຊົນ ແຂວງຄຳມ່ວນ ນຳໂດຍ ສະຫາຍ ພິມພອນ ສຸລິວົງສາ ປະທານສານປະຊາຊົນ ແຂວງຄຳມ່ວນ ແລະ ຄະນະຜູ້ແທນສານປະຊາຊົນ ແຂວງກວາງບິ່ງ ນຳໂດຍ ສະຫາຍ ຫງວຽນ ຫຶວຕຽນ ປະທານສານປະຊາຊົນ ແຂວງກວາງບິ່ງ, ມີບັນດາສະຫາຍຄະນະຜູ້ແທນສານປະຊາຊົນສອງແຂວງເຂົ້າຮ່ວມ.

ໃນກອງປະຊຸມ, ສະຫາຍຫົວໜ້າຄະນະຜູ້ແທນທັງສອງແຂວງ ຕ່າງກໍໄດ້ລາຍງານສະພາບໂດຍລວມຂອງແຂວງໃຫ້ກັນຊາບ ແລະ ບັນດາຜົນສຳເລັດໃນການຈັດຕັ້ງປະຕິບັດເນື້ອໃນບົດບັນທຶກຊ່ວຍຈໍາໃນຊຸມປີຜ່ານມາບົນຈິດໃຈແຫ່ງການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສານປະຊາຊົນສອງແຂວງ, ເພື່ອສືບຕໍ່ເພີ່ມພູນຄູນສ້າງມິດຕະພາບການພົວພັນຮ່ວມມືໃນຕໍ່ໜ້າໃຫ້ມີຄວາມໜັກແໜ້ນເຂັ້ມແຂງ, ພ້ອມທັງຖືໂອກາດດັ່ງກ່າວແລກປ່ຽນບົດຮຽນຮ່ວມກັນ ໂດຍສະເພາະແມ່ນດ້ານວິຊາການໃນການດໍາເນີນຕັດສິນຄະດີຄວາມໃນຮູບແບບຕ່າງໆ ແລະ ບົດຮຽນກ່ຽວກັບການປະຕິບັດຄໍາຕັດສິນຂອງສານທີ່ໃຊ້ໄດ້ຢ່າງເດັດຂາດ ລວມທັງການປະຕິບັດບັນດາຂໍ້ກໍານົດກ່ຽວກັບການຊ່ວຍເຫຼືອທາງດ້ານຍຸຕິທໍາ, ທີ່ສໍາຄັນຍັງໄດ້ສືບຕໍ່ສ້າງບົດບັນທຶກຮ່ວມກັນ ເພື່ອເປັນບ່ອນອີງໃນການຈັດຕັ້ງປະຕິບັດ ໃນໄລຍະ 2 ປີຕໍ່ໜ້າ ຊຶ່ງທັງສອງຝ່າຍ ເຫັນດີເປັນເອກະພາບ ຈະສືບຕໍ່ປະສານສົມທົບກັນຢ່າງເຂັ້ມງວດ ໃນການເພີ່ມທະວີສາຍພົວພັນມິດຕະພາບ, ປະກອບສ່ວນຮັກສາຄວາມສະຫງົບ ແລະ ຄວາມປອດໄພສັງຄົມ. ສ້າງເງື່ອນໄຂອໍານວຍຄວາມສະດວກໃນການເຄື່ອນໄຫວຮ່ວມມືຂອງສອງຝ່າຍ, ເພີ່ມທະວີສາຍພົວພັນມິດຕະພາບລະຫວ່າງສານປະຊາຊົນ ແຂວງຄໍາມ່ວນ ແລະ ສານປະຊາຊົນ ແຂວງກວາງບິ່ງ ໃຫ້ນັບມືມີຄວາມຂະຫຍາຍຕົວດີຂຶ້ນ.