ເມືອງຄຳເກີດ ແຂວງບໍລິຄຳໄຊ ໄດ້ຈັດພິທີສະເຫຼີມສະຫຼອງປີສາມັກຄີລາວ-ຫວຽດນາມ ກໍຄືວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ (18/7/1997 - 18/7/2022) ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ (5/9/1962 - 5/9/2022) ຂຶ້ນ ຫວ່າງບໍ່ດົນມານີ້ ທີ່ອາຄານແກ້ວມີໄຊ ໂດຍເປັນກຽດຂຶ້ນຫວນຄືນ 2 ວັນສຳຄັນດັ່ງກ່າວຂອງ ທ່ານ ເພັດສະໄໝ ໄຊຍະທິຈັກ ກຳມະການພັກແຂວງ ເລຂາພັກເມືອງ ເຈົ້າເມືອງຄຳເກີດ ມີຄະນະບໍລິຫານງານພັກເມືອງ ມີພາກສ່ວນກ່ຽວຂ້ອງ, ອຳນາດການປົກຄອງຂັ້ນບ້ານ 62 ບ້ານເຂົ້າຮ່ວມ.

ທ່ານ ເພັດສະໄໝ ໄຊຍະທິຈັກ ໄດ້ຍົກໃຫ້ເຫັນເນື້ອໃນ ຄວາມໝາຍສໍາຄັນຂອງສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ປະຫວັດສາດແຫ່ງການຕໍ່ສູ້ຂອງປະຊາຊົນສອງປະເທດ, ໄລຍະປົກປັກຮັກສາ ແລະ ສ້າງສາພັດທະນາປະເທດຊາດ (1975 ເຖິງປັດຈຸບັນ) 45 ປີ ແຫ່ງການປະຕິບັດສົນທິສັນຍາມິດຕະພາບ ແລະ ການຮ່ວມມືຮອບດ້ານ ລາວ-ຫວຽດນາມ, ສືບຕໍ່ເສີມຂະຫຍາຍມູນເຊື້ອສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ຊຶ່ງເນື້ອໃນບາງຕອນທ່ານໄດ້ຍົກໃຫ້ເຫັນແຈ້ງ ສາຍພົວພັນ, ຄວາມສາມັກຄີພິເສດ, ການຮ່ວມມືຮອບດ້ານລະຫວ່າງ ລາວ-ຫວຽດນາມ ບໍ່ແມ່ນເກີດຂຶ້ນເອງ, ແຕ່ຫາກເກີດຂຶ້ນໃນຂະບວນວິວັດອັນຍາວນານບົນເສັ້ນທາງແຫ່ງການຕໍ່ສູ້ຕ້ານພວກລ່າເມືອງຂຶ້ນແບບເກົ່າ ແລະ ແບບໃໝ່ທີ່ເຕັມໄປດ້ວຍການເສຍສະຫຼະທັງຊີວິດ ແລະ ເລືອດເນື້ອ ຂອງກອງທັບ ແລະ ປະຊາຊົນສອງຊາດ. ສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານທີ່ມີຄວາມດູດດື່ມເລິກເຊິ່ງແໜ້ນແຟ້ນ, ໝັ້ນຄົງ ແລະ ມີຊີວິດຊີວາທີ່ເຕັມໄປດ້ວຍຄວາມເຫຼື້ອມໃສ, ຕະຫຼອດໄລຍະ 60 ປີ ແຫ່ງການສ້າງຕັ້ງສາຍພົວພັນການທູດລະຫວ່າງ ລາວ-ຫວຽດນາມ ແລະ 45 ປີ ແຫ່ງການປະຕິບັດສົນທິສັນຍາມິດຕະພາບ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ; ສອງຊາດລາວ-ຫວຽດນາມ ໄດ້ພ້ອມກັນເພີ່ມພູນຄູນສ້າງມິດຕະພາບແບບພິເສດ, ການພົວພັນຮ່ວມມືຮອບດ້ານນັບມື້ຍິ່ງຂະຫຍາຍຕົວກ້າວເຂົ້າສູ່ລວງເລິກ, ແທດເໝາະກັບສະພາບຕົວຈິງ ແລະ ມີປະສິດທິຜົນ, ສາມາດຕອບສະໜອງຄວາມມຸ່ງມາດປາຖະໜາຂອງປະຊາຊົນສອງຊາດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນ ແລະ ໃນໂລກ. ສໍາລັບເມືອງຄໍາເກີດ ໄດ້ມີສາຍພົວພັນຮ່ວມມືແຮກສ່ຽວກັບ ເມືອງເຮືອງເຊີນ, ເມືອງຫວູກວາງ ແລະ ຍັງໄດ້ມີການພົວພັນຮ່ວມມືມິດຕະພາບກັບບາງທ້ອງຖິ່ນ ຢູ່ແຂວງ ຮ່າຕິ່ງ (ເປັນຕົ້ນແມ່ນການພົວພັນກັບ ຄະນະປະຊາຊົນຕາແສງເຊີນກີມ 1 ແລະ ຕາແສງເຊີນກີມ 2 ທີ່ເປັນບ້ານແຮກສ່ຽວກັບບ້ານທົ່ງແປ ແລະ ບ້ານນາແປ) ໄດ້ມີການຜັດປ່ຽນຈັດກອງປະຊຸມລະຫວ່າງເມືອງຮ່ວມກັນໃນທຸກປີ. ນອກນັ້ນ ບັນດາກົມກອງ, ຫ້ອງການອ້ອມຂ້າງເມືອງ ແລະ ບັນດາບ້ານລຽບຊາຍແດນ ໄດ້ໄປມາຢ້ຽມຢາມ, ຮ່ວມເຮັດວຽກ, ອວຍພອນ ແລະ ຊ່ວຍເຫຼືອຊຶ່ງກັນ ແລະ ກັນເປັນປົກກະຕິ. ພົ້ນເດັ່ນແມ່ນການລົງນາມບົດບັນທຶກການຮ່ວມມືລະຫວ່າງບ້ານທົ່ງແປ ກັບ ຕາແສງເຊີນກີມ 1 ແລະ ຕາແສງເຊີນກີມ 2 ສາມາດຮັກສາ ແລະ ເສີມຂະຫຍາຍມູນເຊື້ອຄວາມສາມັກຄີພິເສດລາວ-ຫວຽດນາມ ໄດ້ເປັນຢ່າງດີ. ກະຊວງປ້ອງກັນຄວາມສະຫງົບ ສສ ຫວຽດນາມ ໄດ້ຊ່ວຍເຫຼືອງົບປະມານປຸກສ້າງຫ້ອງການ ປກສ ບ້ານ ຕິດຊາຍແດນໄດ້ ຈຳນວນ 5 ຫຼັງ ມູນຄ່າທັງໝົດ 900 ລ້ານກີບ, ເມືອງຄໍາເກີດໄດ້ປະກອບສ່ວນ ແລະ ອຳນວຍຄວາມສະດວກໃຫ້ແກ່ຄະນະປະຕິບັດງານພິເສດຂຸດຄົ້ນອັດຖິທະຫານອາສາສະໝັກ ສສ ຫວຽດນາມ ທີ່ໄດ້ເສຍສະຫຼະຊີວິດໃນປາງສົງຄາມຢູ່ລາວ. ໃນທ້າຍເດືອນກໍລະກົດ 2022 ຄະນະຜູ້ແທນເມືອງຄໍາເກີດ ໄດ້ເດີນທາງໄປຮ່ວມກອງປະຊຸມພົບປະແລກປ່ຽນກັບຄະນະຜູ້ແທນເມືອງວູ່ກວາງ ແຂວງຮ່າຕິ່ງ ສສ ຫວຽດນາມ ຊຶ່ງໄດ້ລົງນາມບົດບັນທຶກຊ່ວຍຈໍາຫຼາຍດ້ານ.

ເນື່ອງໃນໂອກາດທີ່ເມືອງຄຳເກີດ ສະເຫຼີມສະຫຼອງປີສາມັກຄີ 2022 ລາວ-ຫວຽດນາມ ໃນຄັ້ງນີ້ ທ່ານ ເພັດສະໄໝ ໄຊຍະທິຈັກ ຕາງໜ້າໃຫ້ຄະນະບໍລິຫານງານພັກເມືອງ ຍັງໄດ້ເປັນກຽດມອບໃບຍ້ອງຍໍ,ໃບຊົມເຊີຍ ແລະ ໃບຂອບໃຈ ຈຳນວນ 59 ໃບ, ໃບຊົມເຊີຍ 3 ໃບ ແລະ ໃບຂອບໃຈ 6 ໃບ ໃຫ້ກົມກອງ, ບຸກຄົນ, ນິຕິບຸກຄົນ, ວິສາຫະກິດ, ຜູ້ປະກອບການທຸລະກິດ ທີ່ມີຜົນງານດີເດັ່ນປະກອບສ່ວນການສ້າງສາພັດທະນາເມືອງຄຳເກີດ ຕະຫຼອດໄລຍະຜ່ານມາຕື່ມອີກ.

(ຂ່າວ-ພາບ: ສາຍະໝອນ)