ໂດນ: ສ. ພະຈັນ

ເພື່ອສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ, ຫວຽດນາມ-ລາວ ປີ 2022 ກໍຄື: ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 60 ປີ (5 ກັນຍາ 1962 - 5 ກັນຍາ 2022) ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມ ຄົບຮອບ 45 ປີ (18 ກໍລະກົດ 1977-18 ກໍລະກົດ 2022); ເມື່ອທົບທວນຄືນປະຫວັດສາດແຫ່ງການພົວພັນອັນຍາວນານລະຫວ່າງສອງພັກ-ລັດ ແລະ ປະຊາຊົນ 2 ຊາດ ຍິ່ງຈົດຈໍາລໍາລຶກ ແລະ ຮູ້ບຸນຄຸນຢ່າງສຸດຊຶ້ງຕໍ່ປະທານໂຮ່ຈິມິນ ຜູ້ຍິ່ງໃຫ່ຍ, ປະທານ ໄກສອນ ພົມວິຫານ ແລະ ປະທານ ສຸພານຸວົງ ທີ່ແສນເຄົາລົບຮັກ ຊຶ່ງເປັນຜູ້ໃຫ້ກໍາເນີດ ແລະ ໄດ້ເປັນແບບຢ່າງອັນຈະແຈ້ງໃຫ້ແກ່ການຖະນຸຖະໜອມ, ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່ ແລະ ຄວາມສາມັກຄີພິເສດລະຫວ່າງສອງຊາດ, ເປັນສາຍພົວພັນໜຶ່ງດຽວທີ່ບໍ່ມີປະເທດໃດໃນໂລກມີໄດ້ຄືດັ່ງສອງຊາດລາວ-ຫວຽດນາມ, ຫວຽດນາມ-ລາວ ເວົ້າລວມ ເວົ້າສະເພາະກໍຄືແຂວງສາລະວັນກັບບັນດາແຂວງຂອງ ສສ ຫວຽດນາມ ທີ່ຍັງສືບຕໍ່ເອົາໃຈໃສ່ເພີ່ມພູນຄູນສ້າງສາຍພົວພັນໃຫ້ອຸດົມສົມບູນ ແລະ ໄດ້ຮັບການປັບປຸງຍົກລະດັບທັງທາງດ້ານປະລິມານ ແລະ ຄຸນນະພາບ, ເນື້ອໃນຂອງການຮ່ວມມືນັບມື້ນັບເຂົ້າສູ່ລວງເລິກ ໂດຍສະເພາະການພົວພັນຮ່ວມມືລະຫວ່າງລະດັບທ້ອງຖິ່ນ, ຂະແໜງການແມ່ນມີປະສິດທິຜົນຫຼາຍຂຶ້ນ ແລະ ນັບມື້ເປີດກວ້າງອອກ.

ທ່ານ ໂພໄຊ ໄຊຍະສອນ ກໍາມະການສູນກາງພັກ ເລຂາພັກ-ເຈົ້າແຂວງໆສາລະວັນ ໄດ້ໃຫ້ສໍາພາດຕໍ່ສື່ມວນຊົນ ໃນທ້າຍເດືອນສິງຫາ 2022 ຜ່ານມາວ່າ: ເນື່ອງໃນໂອກາດສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ປີ 2022 ແຂວງສາລະວັນ ກໍແມ່ນໜຶ່ງແຂວງທີ່ມີການເພີ່ມພູນຄູນສ້າງສາຍພົວພັນຮ່ວມມືກັບບັນດາແຂວງຕ່າງໆ ຂອງ ສສ ຫວຽດນາມ ມາຮອດໄລຍະປັດຈຸບັນແມ່ນໄດ້ມີການພົວພັນຮ່ວມມືສອງຝ່າຍກັບ 13 ແຂວງ/ນະຄອນຫຼວງ ຂອງ ສສ ຫວຽດນາມ. ໃນນັ້ນການພົວພັນຮ່ວມມືສອງຝ່າຍກໍມີຫຼາຍດ້ານທີ່ພົ້ນເດັ່ນ ໂດຍສະເພາະດ້ານການເມືອງ ແລະ ການຕ່າງປະເທດ, ດ້ານວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ການຄຸ້ມຄອງພັດທະນາຕາມບໍລິເວນຊາຍແດນ, ດ້ານການສຶກສາ ແລະ ພັດທະນາຊັບພະຍາກອນມະນຸດ, ດ້ານການຮັກສາສຸຂະພາບ, ດ້ານການແຮກສ່ຽວ ແລະ ຮ່ວມມືເກັບກູ້ອັດຖິຊ່ຽວຊານທະຫານອາສາສະໝັກຫວຽດນາມ ເສຍຊີວິດຢູ່ລາວໃນປາງສົງຄາມ ຊຶ່ງມັນສະແດງອອກໃຫ້ເຫັນດ້ານການເມືອງໄລຍະຜ່ານມາການນໍາສອງພັກ-ລັດ ໄດ້ສືບຕໍ່ເສີມຂະຫຍາຍສາຍພົວພັນມູນເຊື້ອອັນດີງາມຂອງສອງພັກ-ລັດ ທີ່ມີມາຍາວນານ ຊຶ່ງການນໍາທັງສອງຝ່າຍກໍໄດ້ມີການພົບປະ ແລະ ຢ້ຽມຢາມກັບພະແນກການອ້ອມຂ້າງແຂວງ ແລະ ເມືອງ ສສ ຫວຽດນາມ ເພື່ອຮັດແໜ້ນສາຍພົວພັນໃຫ້ແໜ້ນແຟ້ນ; ການຮ່ວມມືດ້ານປ້ອງກັນຊາດ-ປ້ອງກັນຄວາມສະຫງົບ ແລະ ການຄຸ້ມຄອງ, ພັດທະນາຕາມບໍລິເວນຊາຍແດນ. ນອກນັ້ນ ແຂວງສາລະວັນກໍເປັນອີກແຂວງໜຶ່ງທີ່ໄດ້ຮັບທຶນຊ່ວຍເຫຼືອຈາກບັນແຂວງອ້ອມຂ້າງ ສສ ຫວຽດນາມ ເປັນຕົ້ນ: ແຂວງກວາງຈິ ຈໍານວນ 4 ທຶນ, ແຂວງເທື່ອທຽນເຫວ້ ຈໍານວນ 1 ທຶນ ຊຶ່ງທຶນທີ່ໄດ້ຮັບຈາກແຂວງກວາງຈິ ເປັນທຶນເພື່ອພັດທະນາພື້ນຖານໂຄງລ່າງບໍລິເວນຊາຍແດນ ລາວ-ຫວຽດນາມ ມູນຄ່າ 15,6 ຕື້ກວ່າດົງ, ທຶນກໍ່ສ້າງຫ້ອງການຕໍາຫຼວດບ້ານ ຈໍານວນ 13 ຈຸດ, ມູນຄ່າ 5,2 ຕື້ດົງ, ທຶນກໍ່ສ້າງເຮືອນສາມັກຄີປອງດອງ ຈໍານວນ 5 ຫຼັງ, ໂຄງການນໍ້າສະອາດ 1 ແຫ່ງ ລວມມູນຄ່າ 1,09 ຕື້ດົງ, ແລະ ທຶນເຄື່ອນໄຫວວຽກງານຊາຍແດນລາວ-ຫວຽດນາມ ຈໍານວນ 100 ລ້ານດົງ; ສ່ວນແຂວງເທື່ອທຽນເຫວ້ ກໍໄດ້ຊ່ວຍເຫຼືອທຶນກໍ່ສ້າງ, ສ້ອມແປງໂຮງຮຽນບໍລິເວນຊາຍແດນ ລວມມູນຄ່າທັງໝົດ 976 ລ້ານດົງ; ການຮ່ວມມືດ້ານການສຶກສາ ແລະ ພັດທະນາຊັບພະຍາກອນມະນຸດ ແຂວງສາລະວັນ ກໍຍັງໄດ້ຮັບການການຊ່ວຍເຫຼືອ ຈໍານວນ 2 ທຶນ ໂດຍສະເພາະດ້ານທຶນການສຶກສາຂອງພະນັກງານ-ນັກຮຽນ, ທຶນກໍ່ສ້າງພື້ນຖານໂຄງລ່າງ ຈໍານວນ 4 ທຶນ; ດ້ານທຶນການສຶກສາຂອງພະນັກງານ, ນັກຮຽນ ສາຍວິຊາສະເພາະ ດ້ວຍທຶນຊ່ວຍເຫຼືອ 100% ແລະ 50% ຢູ່ແຂວງກວາງຈິ, ແຂວງເທື່ອທຽນເຫວ້, ນະຄອນດານັງ, ແຂວງບິ່ງດິ້ງ, ແຂວງກອນຕູມ ແລະ ແຂວງດົ່ງຖ໊າບ ແລະ ທຶນການບໍາລຸງສ້າງດ້ານທິດສະດີການເມືອງ-ການປົກຄອງໃຫ້ພະນັກງານຫຼັກແຫຼ່ງລະດັບຊັ້ນກາງ, ລະບົບ 10 ເດືອນ ຢູ່ແຂວງກວາງຈິ; ນອກນັ້ນຍັງໄດ້ທຶນກໍ່ສ້າງພື້ນຖານໂຄງລ່າງຈາກນະຄອນດານັງ ຊ່ວຍກໍ່ສ້າງ, ຍົກລະດັບພື້ນຖານໂຄງລ່າງໂຮງຮຽນ ມ.ສ ມິດຕະພາບ ສາລະວັນ-ດານັງ ມູນຄ່າຫຼາຍກວ່າ 22 ຕື້ດົງ; ກໍ່ສ້າງສູນພາສາຫວຽດນາມ ຢູ່ແຂວງສາລະວັນ ມູນຄ່າ 7,1 ຕື້ກວ່າດົງ ແລະ ສົ່ງຄູມາສອນຢູ່ສູນດັ່ງກ່າວ ໃຊ້ງົບປະມານໃນໄລຍະ 5 ປີ ປະມານ 1,5 ຕື້ດົງ ແລະ ແຂວງເທື່ອທຽນເຫວ້ ໄດ້ຊ່ວຍຕໍ່ເຕີມຫ້ອງຮຽນ ໂຮງຮຽນປະຖົມຫວຽດກຽວເມືອງຄົງເຊໂດນ ມູນຄ່າ 230 ລ້ານດົງ; ການຮ່ວມມືດ້ານການຮັກສາສຸຂະພາບ: ຄະນະຊາວໜຸ່ມ ແຂວງເທື່ອທຽນເຫວ້ ແລະ ນະຄອນດານັງ ໄດ້ຈັດຕັ້ງອາສາສະໝັກມາກວດພະຍາດ, ຈ່າຍຢາບໍ່ເສຍຄ່າ ແລະ ມອບຂອງຂວັນໃຫ້ແກ່ປະຊາຊົນ ມູນຄ່າ 441 ລ້ານກີບ, ກອງບັນຊາການທະຫານນະຄອນດານັງ ຈັດກິດຈະກໍາກວດພະຍາດ, ຈ່າຍຢາບໍ່ເສຍຄ່າ, ມອບຂອງຂວັນໃຫ້ປະຊາຊົນ, ມອບເງິນໃຫ້ແກ່ພະນັກງານ ຜູ້ທຸກຍາກ ມູນຄ່າ 348 ລ້ານກວ່າດົງ ແລະ ຊ່ວຍກໍ່ສ້າງເຮືອນພັກ-ເຮືອນຄົວແພດ-ໂຮງໝໍ 20 ຕຽງ ມູນຄ່າ 2,6 ຕື້ດົງ; ການສ້າງບ້ານແຮກສ່ຽວ: ຈັດຕັ້ງປະຕິບັດຮ່ວມກັບແຂວງກວາງຈິ ໄດ້ທັງໝົດຈຳນວນ 12 ຄູ່ບ້ານ, ຮ່ວມກັບແຂວງເທື່ອທຽນເຫວ້ ແມ່ນລະຫວ່າງກອງຮ້ອຍຊາຍແດນ 511, ກອງບັນຊາການທະຫານແຂວງ ກັບຄ້າຍທະຫານຊາຍແດນດ່ານຮົ່ງເວິນ, ກອງບັນຊາການທະຫານຊາຍແດນແຂວງເທື່ອທຽນເຫວ້ ແລະ ລະຫວ່າງບ້ານອາແດງໂກຕ່າຍ, ເມືອງສະໝ້ວຍ ກັບບ້ານສອງ, ຕາແສງຮົ່ງທຸ້ຍ, ເມືອງອາເຫຼືອຍ; ການຮ່ວມມືເກັບກູ້ອັດຖິ ເລີ່ມແຕ່ປີ 1994 ແຂວງໄດ້ສົມທົບກັບກອງປະຕິບັດງານພິເສດ 192 ຈາກແຂວງເທື່ອທຽນເຫວ້ ດໍາເນີນການຊອກຄົ້ນ, ເກັບກູ້ ແລະ ຈັດຕັ້ງພິທີນໍາສົ່ງອັດຖິທະຫານອາສາສະໝັກ, ຊ່ຽວຊານຫວຽດນາມ ທີ່ເສຍສະຫຼະຊີວິດໃນປາງສົງຄາມຢູ່ຂອບເຂດຂອງແຂວງສາລະວັນ ກັບຄືນສູ່ປິຕິພູມ ໄດ້ທັງໝົດ 855 ອັດຖິ.

ສໍາລັບແຂວງສາລະວັນ ກໍໄດ້ຊ່ວຍທຶນການສຶກສາວິຊາສະເພາະ ລະດັບປະລິນຍາຕີ ໄລຍະ 5 ປີ ຢູ່ມະຫາວິທະຍາໄລແຫ່ງຊາດ ໃຫ້ແກ່ນັກຮຽນຈາກແຂວງກວາງຈິ ແລະ ແຂວງເທື່ອທຽນເຫວ້, ຊຸກຍູ້ຊ່ວຍເຫຼືອປະຊາຊົນຫວຽດນາມທີ່ມາເຄື່ອນໄຫວ ແລະ ດໍາລົງຊີວິດຢູ່ແຂວງສາລະວັນ ໄດ້ມີການຮ່ວມມືໃນຫຼາຍຂົງເຂດວຽກງານ, ຂະແໜງການ, ທີ່ມີການພົວພັນຮ່ວມມືກັນໃນຮູບການພົບປະ, ແລກປ່ຽນບົດຮຽນ, ສະໜັບສະໜູນທຶນຮອນ, ຊ່ວຍຝຶກອົບຮົມດ້ານວິຊາການ ແລະ ອື່ນໆອີກຈໍານວນໜຶ່ງ; ການຮ່ວມມື ລະຫວ່າງແຂວງສາລະວັນ ກັບບັນດາທ້ອງຖິ່ນຂອງຫວຽດນາມໃນໄລຍະຜ່ານມາ ໄດ້ປະກອບສ່ວນເພີ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອແບບພິເສດ ລະຫວ່າງສອງຊາດ ລາວ-ຫວຽດນາມ, ຫວຽດນາມ-ລາວ ແລະ ການພັດທະນາເສດຖະກິດ-ສັງຄົມຂອງແຂວງສາລະວັນ ແລະ ເປັນຂີດໝາຍແຫ່ງການເພີ່ມພູນຄູນສ້າງ ແລະ ເສີມຂະຫຍາຍມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງໃຫ້ຈະເລີນງອກງາມ ແລະ ເກີດດອກອອກຜົນຫຼາຍຂຶ້ນຕື່ມອີກ ປະກອບສ່ວນຢ່າງຕັ້ງໜ້າເຂົ້າໃນການເສີມສ້າງສັນຕິພາບ, ມິດຕະພາບ, ການຮ່ວມມື ແລະ ການເຊື່ອມໂຍງໃນພາກພື້ນ ແລະ ສາກົນ ເພື່ອຄວາມຈະເລີນວັດທະນາຂອງບັນດາປະຊາຊາດ ເຮັດໃຫ້ປີສາມັກຄີມິດຕະພາບ 2022 ເປັນປີທີ່ມີຄວາມ ໝາຍສໍາຄັນຍິ່ງຕໍ່ປວງຊົນສອງຊາດລາວ-ຫວຽດນາມ ໂດຍສະເພາະປະຊາຊົນແຂວງສາລະວັນ ແລະ ບັນດາແຂວງໃກ້ຄຽງ ສສ ຫວຽດນາມ ມີຄວາມຮັກແພງສາມັກຄີປອງດອງ ນັບມື້ເພີ່ມພູນຄູນສ້າງຍິ່ງໆຂຶ້ນ.