ໃນວັນທີ 19 ຕຸລາຜ່ານມາ, ອົງການກາແດງແຂວງອັດຕະປື ແລະ ສູນບໍລິຈາກເລືອດແຂວງໄດ້ລົງເຄື່ອນໄຫວຈັດກິດຈະກໍາບໍລິຈາກເລືອດເພື່ອຊ່ວຍເຫຼືອສັງຄົມຢູ່ໂຮງຮຽນ ມສ ສະໜາມໄຊ ເມືອງສະໜາມໄຊ ແຂວງອັດຕະປື, ຊຶ່ງມີທ່ານນາງ ດາວວັງ ນາມສີນາ ຮອງຫົວໜ້າອົງການກາແດງແຂວງ, ມີພະນັກງານແພດໝໍຈາກສູນເລືອດແຂວງ, ຄູ-ອາຈານ ແລະ ນັກຮຽນເຂົ້າຮ່ວມ.

ການຈັດງານບໍລິຈາກເລືອດຄັ້ງນີ້ເພື່ອຊ່ວຍເຫຼືອສັງຄົມຍ້ອນວ່າໃນໂລກນີ້ບໍ່ມີປະເທດໃດທີ່ສາມາດຜະລິດເລືອດຂຶ້ນມາໄດ້ມີແຕ່ໄດ້ມາຈາກ ການບໍລິຈາກເລືອດຂອງຄົນເຮົາເທົ່ານັ້ນ ຈຶ່ງຈະໄດ້ເລືອດເພື່ອມາສົ່ງຕໍ່ໃຫ້ຄົນເຈັບທີ່ຂາດເລືອດທີ່ນອນຮັກສາປິ່ນປົວຢູ່ໂຮງໝໍແຫ່ງຕ່າງໆ. ສະນັ້ນ, ການທີ່ຄົນເຮົາບໍລິຈາກເລືອດຍັງເປັນການສ້າງບຸນກຸສົນອັນໃຫຍ່ຫຼວງທີ່ໄດ້ຊ່ວຍເຫຼືອເພື່ອນມະນຸດດ້ວຍກັນ, ການບໍລິຈາກເລືອດບໍ່ມີຜົນກະທົບໃດໆຕໍ່ຮ່າງກາຍຂອງຄົນເຮົາ ພ້ອມນັ້ນການບໍລິຈາກເລືອດຍັງມີຜົນດີຫຼາຍຢ່າງເປັນຕົ້ນ: ຜູ້ບໍລິຈາກເລືອດຮູ້ໄດ້ໝວດເລືອດ, ຮູ້ກ່ຽວກັບພະຍາດຂອງຕົນເພາະເລືອດທີ່ໄດ້ຈາກການບໍລິຈາກທາງສູນເລືອດຂອງແຂວງຈະໄດ້ນໍາໄປວິເຄາະວິໃຈຢ່າງລະອຽດ ເພື່ອໃຫ້ໄດ້ເລືອດທີ່ບໍລິສຸດ ຖ້າເຮົາມີພະຍາດໃດແດ່ທາງສູນເລືອດກໍ່ຈະແຈ້ງໃຫ້ຜູ້ບໍລິຈາກໄດ້ຮັບຮູ້, ຜ່ານການປຸກລະດົມມີຜູ້ເຂົ້າຮ່ວມບໍລິຈາກເລືອດຈໍານວນ 41 ຄົນ, ຍິງ 10 ຄົນ, ໄດ້ເລືອດຕົວຈິງ 36 ຖົງ.

ຂ່າວ: ວັດທະນາ