ເມື່ອບໍ່ດົນມານີ້ ທີ່ບ້ານໂຮມໄຊ ເມືອງເງິນ ແຂວງໄຊຍະບູລີ ໄດ້ຈັດພິທີສະເຫຼີມສະຫຼອງບຸນປົດປີ (ບຸນເກຼີ) ຂອງເຜົ່າກຶມມຸ ຊຶ່ງມີ ທ່ານ ທະວິສັກ ໄຊຍະວົງ ວ່າການເຈົ້າເມືອງ, ມີທ່ານ ອິນເນດ ຂຽວສີຟ້າ ປະທານແນວລາວສ້າງຊາດເມືອງ, ມີອົງການຈັດຕັ້ງບ້ານ, ເຖົ້າແກ່ຜູ້ຊົງຄຸນວຸດທິ, ບັນດາແຂກຖືກເຊີນພ້ອມດ້ວຍປະຊາຊົນພາຍໃນບ້ານເຂົ້າຮ່ວມ.

ທ່ານ ບຸນໄຊ ໄຊຍະລາດ ນາຍບ້ານໆໂຮມໄຊ ກ່າວວ່າ: ບຸນເກຼີມີຊື່ເອີ້ນວ່າບຸນປົດປີ ຊຶ່ງແມ່ນປະເພນີ ສົ່ງທ້າຍປີເກົ່າ ແລະ ຕ້ອນຮັບປີໃໝ່ຂອງເຜົ່າກຶມມຸທີ່ຈັດຂຶ້ນໃນແຕ່ລະປີ ໂດຍໄດ້ຜັດປ່ຽນກັນເປັນເຈົ້າພາບ. ສຳລັບປີ 2023 ນີ້ ບ້ານໂຮມໄຊໄດ້ເປັນເຈົ້າພາບ. ພາຍຫຼັງເກັບກ່ຽວຜົນລະປູກລະດູຝົນສຳເລັດ, ເປັນຕົ້ນເຂົ້າ ໃໝ່, ເຜືອກ, ມັນ ແລ້ວເອົາມາໂຮມກັນເຮັດພິທີບູຊາຕາມຄວາມເຊື່ອທີ່ສືບຖອດກັນມາແຕ່ດຶກດຳບັນ ທັງເປັນການສືບສານວັດທະນະທຳອັນດີງາມຂອງເຜົ່າ, ເປັນການເຕົ້າໂຮມຄວາມສາມັກຄີລະຫວ່າງບ້ານຕໍ່ບ້ານ, ຈາກນັ້ນກໍໄດ້ມອບການເປັນເຈົ້າພາບປີຕໍ່ໄປໃຫ້ບ້ານດອກເກດ.

ກິດຈະກຳພາຍໃນງານມີການສະແດງສິລະປະ-ວັນນະຄະດີຂອງໂຮງຮຽນ, ຂອງບ້ານ, ບາສີສູ່ຂວັນໃຫ້ອົງການຈັດຕັ້ງບ້ານ, ເຖົ້າແກ່ຜູ້ຊົງຄຸນວຸດທິ, ຮ່ວມພາເຂົ້າສາມັກຄີ ແລະ ອື່ນໆ.

ຂ່າວ-ພາບ: ສຸລິຍາ ແສງເດືອນ